អន្តរជាតិ
នាយករដ្ឋមន្ត្រីវៀតណាម ណែនាំគណៈរដ្ឋមន្ត្រីបន្តពង្រឹងសមត្ថភាពនិងវិន័យដើម្បីជាកញ្ចក់ឆ្លុះដល់អ្នកដទៃឲ្យធ្វើតាម
×![]()
នាយករដ្ឋមន្ត្រីវៀតណាម លោក Nguyễn Xuân Phúc បានវាយតម្លៃខ្ពស់លើការបំពេញមុខងាររយៈពេលពេញមួយឆ្នាំ ២០១៨ របស់គណៈរដ្ឋមន្ត្រីរបស់លោក។ ក៏ប៉ុន្តែលោកនាយករដ្ឋមន្ត្រីរូបនេះ ក៏បានក្រើនរម្លឹកឲ្យសមាជិកគណៈរដ្ឋមន្ត្រីទាំងអស់បន្តពង្រឹងសមត្ថភាព និងជំនាញ ក៏ដូចជាស្តាប់មតិសាធារណៈដើម្បីធានាឲ្យបានដំណោះស្រាយលើបញ្ហាទាន់ពេល និងទំនុកចិត្តពីសាធារណៈ។
នាឱកាសបូកសរុបលទ្ធផលការងារឆ្នាំ២០១៨ និងប្រកាសអនុវត្តបេសកកម្មការងារឆ្នាំ២០១៩ នៅថ្ងៃ៩ មករាកន្លងទៅ លោកនាយករដ្ឋមន្ត្រី Nguyễn Xuân Phúc បានលើកឡើងថា គណៈរដ្ឋមន្ត្រី គួរតែស្តាប់មតិសាធារណៈ, សមាជិករដ្ឋាភិបាល និងក្រសួងពាក់ព័ន្ធទាំងអស់ឲ្យបានច្រើនដើម្បីពង្រឹងតួនាទីរបស់ខ្លួន ក្នុងនាមជាអង្គភាពប្រឹក្សាយោបល់ស្នូលរបស់ប្រទេស។ នេះបើយោងតាម Vietnam News។
លោកនាយករដ្ឋមន្ត្រី បន្តថា គណៈរដ្ឋមន្ត្រី ក៏គួរតែលើកកម្ពស់តួនាទីរបស់ខ្លួនក្នុងនាមជា អង្គភាពដើម្បីទទួល និងឆ្លើយតបទៅនឹងមតិយោបល់សាធារណៈ និងកិច្ចការពាក់ព័ន្ធនឹងការធ្វើធុរកិច្ចក្នុងប្រទេស និងបន្តតាមដានរហូតទាល់តែមតិយោបល់នានាត្រូវបានដោះស្រាយ។ លោក ក៏បានស្នើឲ្យគណៈរដ្ឋមន្ត្រី បន្តគ្រប់គ្រងឲ្យបានកម្មវិធីកំណែទម្រង់ទូទាំងប្រទេសដើម្បីកត់បន្ថយនីតិវិធីមិនចាំបាច់ដែលធ្វើឲ្យរាំងស្ទះដល់ការធ្វើធុរកិច្ចក្នុងប្រទេស។
លោកនាយករដ្ឋមន្ត្រី ដែលជាប្រធានគណៈរដ្ឋមន្ត្រីផងនោះ បានបន្ថែមថា គណៈរដ្ឋមន្ត្រី ចាំបាច់ត្រូវតែពង្រឹងការងារផ្សព្វផ្សាយព័ត៌មានដើម្បីទទួលបានការទុកចិត្តពីសាធារណៈ និងប្រយុទ្ធប្រឆាំងនឹងអំពើពុករលួយ និងភាពខ្ជះខ្ជាយ។
អ្វីដែលលោកនាយករដ្ឋមន្ត្រីវៀតណាមរូបនេះ ចង់ឃើញផងដែរនោះគឺ សមាជិករដ្ឋាភិបាល បន្តសិក្សារៀនសូត្រដើម្បីពង្រីកចំណេះដឹង និងជំនាញដើម្បីបំពេញការឲ្យកាន់តែប្រសិទ្ធភាព និងដើម្បីកញ្ចក់ឆ្លុះសម្រាប់អ្នកផ្សេងទៀតឲ្យធ្វើតាម។ លោក បានស្នើឲ្យគណៈរដ្ឋមន្ត្រីផ្តល់យន្តការនានាដល់នាយករដ្ឋមន្ត្រី និងឧបនាយករដ្ឋមន្ត្រីដើម្បីដោះស្រាយបញ្ហាបានឆាប់រហ័ស និងមានប្រសិទ្ធភាព។
ជាប្រទេសស្ថិតនៅក្នុងដំណាក់កាលធ្វើកំណែទម្រង់ វៀតណាម ហាក់ផ្តោតខ្លាំងទៅលើបរិយាកាសនៃការធ្វើធុរកិច្ចក្នុងប្រទេស ដើម្បីទាក់ទាញវិនិយោគដោយផ្ទាល់មកអភិវឌ្ឍប្រទេសខ្លួន។ យន្តការមួយដើម្បីធានាពីភាពល្អប្រសើរនេះ រដ្ឋាភិបាលវៀតណាម បានប្តេជ្ញាប្រយុទ្ធប្រឆាំងអំពើពុករលួយ, សម្រួលនីតិវិធីធ្វើធុរកិច្ច និងពិសេសនោះពង្រឹងមុខងារសាធារណៈរបស់ខ្លួនតែម្តង៕
Tag:
វៀតណាម
អាស៊ាន
© រក្សាសិទ្ធិដោយ thmeythmey.com
