ជាតិ
ឆ្នាំ២០១៨ខេត្តកំពង់ធំ ប្រមូលផលនេសាទបានជិត ៦ម៉ឺនតោន
× ភ្នំពេញ៖ ក្នុងឆ្នាំ ២០១៨កន្លងទៅ ប្រជានេសាទខេត្តកំពង់ធំ ប្រមូលផលនេសាទបានចំនួន ៥៩៧០០តោន ដោយក្នុងនោះការនេសាទលក្ខណៈគ្រួសារក្នុងដែននេសាទបានចំនួន ៤១៥០០តោន និងនេសាទលក្ខណៈគ្រួសារតាមវាលស្រែបានចំនួន ១៨២០០តោន។ នេះបើតាមគេហទំព័រក្រសួងព័ត៌មាន ដកស្រង់សម្ដីលោក ប៉ែន វណ្ណរឹទ្ធ នាយខណ្ឌរដ្ឋបាលជលផលកំពង់ធំ។
លោក ប៉ែន វណ្ណរឹទ្ធ នាយខណ្ឌរដ្ឋបាលជលផលកំពង់ធំ បានមានប្រសាសន៍នៅថ្ងៃទី៨ មករានេះថា៖ «ក្នុងឆ្នាំ២០១៨ ប្រជានេសាទខេត្តកំពង់ធំប្រមូលផលនេសាទស្រស់បានចំនួន ៥៩៧០០តោន ក្នុងនោះការធ្វើនេសាទជាលក្ខណៈគ្រួសារក្នុងដែននេសាទបានចំនួន៤១៥០០តោន និងនេសាទគ្រួសារតាមវាលស្រែចំនួន១៨២០០តោន»។
ក្នុងរយៈពេល១ឆ្នាំនេះ ពលរដ្ឋខេត្តកំពង់ធំ ចិញ្ចឹមត្រីសាច់បានចំនួន ២៥៩០០តោន, ចិញ្ចឹមត្រីរ៉ស់-ត្រីឆ្ដោចំនួន ៥៣៤០តោន, ចិញ្ចឹមកង្កែប-អន្ទង់ចំនួន ៣៣តោន, ចិញ្ចឹមគន្ធាយ ៨០០០ក្បាល និងចិញ្ចឹមក្រពើ១៦៣០០ក្បាល។ នេះបើតាមការបញ្ជាក់របស់នាយខណ្ឌរដ្ឋបាលជលផលកំពង់ធំ។
បើតាមគេហទំព័រក្រសួងព័ត៌មាន ខេត្តកំពង់ធំមានកសិដ្ឋានផលិតកូនត្រី២កន្លែង ដែលផលិតកូនត្រី បាន២លានក្បាល។ ក្រៅពីមានកសិដ្ឋានផលិតកូនត្រី ខេត្តកំពង់ធំ ក៏មានស្រះចិញ្ចឹមត្រីប្រមាណ ៨៤០ស្រះ បែរចិញ្ចឹមចំនួន ៤៨៣បែរ និងស្រះជម្រកត្រីសហគមន៍ចំនួន ៤៧ស្រះ។ ខេត្តកំពង់ធំ ក៏បានកែច្នៃផលនេសាទបានចំនួន ១៣១០០តោន និងផលិតទឹកត្រីបានចំនួន៤លាន៥សែនលីត្រផងដែរ។ លោក ប៉ែន វណ្ណរឹទ្ធ អះអាងថា ឆ្នាំ២០១៨ ខណ្ឌរដ្ឋបាលជលផលបានសហការ ជាមួយអាជ្ញាធរមូលដ្ឋាន និងកងកម្លាំងទាំងបី ចុះបង្កាបបទល្មើសនេសាទបានចំនួន២៨៥ករណី៕
Tag:
ត្រី
កំពង់ធំ
នេសាទ
ជលផល
© រក្សាសិទ្ធិដោយ thmeythmey.com