ជាតិ
សេដ្ឋកិច្ច
រូបពីហ្វេសប៊ុកសម្ដេច ហ៊ុន សែន
×![]()
ភ្នំពេញ៖ រដ្ឋាភិបាលបានបើកការដ្ឋានសាងសង់ផ្លូវក្រវាត់ក្រុងទី៣ ប្រវែង ៥៣គីឡូម៉ែត្រ នៅថ្ងៃទី១៤ខែមករានេះ។
ផ្លូវក្រវាត់ក្រុងទី៣ តភ្ជាប់ចេញពីផ្លូវជាតិលេខ៤ ត្រង់គីឡូម៉ែត្រលេខ ១៤.១០៥ ទៅចំណុចបញ្ចប់នៅគីឡូម៉ែត្រ ២៤.៨៤០ នៃផ្លូវជាតិលេខ១។ ផ្លូវនេះមានប្រវែង ៥៣គីឡូម៉ែត្រ ដែលក្នុងនោះ ១៥គីឡូម៉ែត្រស្ថិតក្នុងភូមិសាស្ត្ររាជធានីភ្នំពេញ និងចម្ងាយ៣៨គីឡូម៉ែត្រ ឆ្លងកាត់ភូមិសាស្ត្រខេត្តកណ្ដាល។ មុននឹងតភ្ជាប់ដល់ផ្លូវជាតិលេខ១ គម្រោងនេះក៏នឹងត្រូវសាងសង់ស្ពានឆ្លងទន្លេចំនួនពីរនៅតំបន់កោះអន្លង់ចិនផងដែរ។
ផ្លូវនេះមានទំហំទទឹង ២៧ម៉ែត្រនៅទីប្រជុំជន និង ២៥ម៉ែត្រនៅក្រៅទីប្រជុំជន។ ហើយគម្រោងផ្លូវក្រវាត់ក្រុងទី៣ ដែលសាងសង់ដោយក្រុមហ៊ុនចិននេះ នឹងបង្កើតស្ពានអាកាសចំនួន៤ ។
ការស្ថាបនាផ្លូវនេះ នឹងប្រើរយៈពេល ៤២ខែ ដែលនឹងបញ្ចាប់នៅខែធ្នូឆ្នាំ២០២១ ។ ហើយការសាងសង់នេះ គ្រោងចំណាយ ២៧៣ លានដុល្លារអាមេរិក ដែលជា ប្រាក់កម្ចីសម្បទានពីរដ្ឋាភិបាលចិន និងថវិកាបដិភាគរបស់រដ្ឋាភិបាលកម្ពុជាលើផ្នែកដោះស្រាយផលប៉ះពាល់ និងពន្ធអាករ។ នេះបើតាមការថ្លែងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងពិធីបើកការដ្ឋានសាងសង់ផ្លូវក្រវាត់ក្រុងទី៣នេះ។
គម្រោងផ្លូវក្រវាត់ក្រុងទី៣នេះផងដែរ ក៏នឹងធ្វើឲ្យមានការតភ្ជាប់ទៅផ្លូវទំនប់កប់ស្រូវ ផ្លូវជាតិលេខ៥ កាត់ស្ពានព្រែកព្នៅ មហាវិថីឈ្នះឈ្នះ ឆ្ពោះទៅផ្លូវជាតិលេខ៦ ។ លោក ស៊ុន ចាន់ថុល បញ្ជាក់ថា គម្រោងផ្លូវក្រវាត់ក្រុងមួយនេះ នឹងក្លាយជាហេដ្ឋារចនាសម្ព័ន្ធដ៏ចាំបាច់ ដែលតភ្ជាប់ផ្លូវ និងទីតាំងសំខាន់ៗ ដូចជា ផ្លូវជាតិលេខ៦ ផ្លូវជាតិលេខ៥ ផ្លូវជាតិលេខ៤ ផ្លូវជាតិលេខ៣ ផ្លូវជាតិលេខ២ ផ្លូវជាតិលេខ២១ ផ្លូវជាតិលេខ១ និងចំណតផែកុងតេន័រថ្មីរបស់កំពង់ផែស្វយ័តភ្នំពេញ ព្រមទាំងផ្លូវរបៀងសេដ្ឋកិច្ចសំខាន់ៗមួយចំនួនផងដែរ៕
Tag:
ផ្លូវក្រវាត់ក្រុងទី៣
© រក្សាសិទ្ធិដោយ thmeythmey.com
