ជាតិ
សង្គមជាតិ
បេក្ខជនជាង១ពាន់នាក់ ចូលរួមប្រឡងក្របខណ្ខយោធាខេមរភូមិន្ទ រូបភាពពីទីភ្នាក់ងារសារព័ត៌មានកម្ពុជា
× ភ្នំពេញ៖ បេក្ខជនចំនួន ១.៣២៣នាក់ ដែលមកពីបណ្តាខេត្តផ្សេងៗគ្នា មានដូចជា ខេត្តសៀមរាប កំពង់ធំ ព្រះវិហារ និងឧត្តរមានជ័យ បានចូលរួមប្រឡងជ្រើសរើសទាហានយោធា។ បើតាមការផ្សាយព័ត៌មានរបស់ទីភ្នាក់ងារសារព័ត៌មានកម្ពុជា គោលបំណងនៃការជ្រើសរើសបេក្ខជនប្រឡងនេះ គឺដើម្បីបន្តវេនយោធាដែលបានចូលនិវត្តន៍ និងពលីក្នុងក្របខណ្ឌយោធា។
លោក ពៅ ហេង មេបញ្ជាការយោធាភូមិភាគទី៤ ត្រូវបានទីភ្នាក់ងារសារព័ត៌មានកម្ពុជា ស្រង់សម្តីដែលបានថ្លែងនៅក្នុងថ្ងៃប្រឡងជ្រើសរើសមន្ត្រីក្របខណ្ឌកងយោធាពលខេមរភូមិន្ទ ថាការប្រឡងនេះ គឺជាការបំពេញនូវក្របខណ្ឌ ហើយក៏ជាឱកាសសម្រាប់ពួកគេ ក្នុងការវាស់ស្ទង់សមត្ថភាព និងកម្រិតចំណេះដឹង។
ជាមួយគ្នាផងដែរ លោក ពៅ ពិសិដ្ឋ អភិបាលរងនៃអភិបាលខេត្តសៀមរាប បានមានប្រសាសន៍ថា ការប្រឡងនេះគឺជាការពង្រឹងចំណេះដឹង ស្មារតីរបស់ខ្លួនដើម្បីការពារបូរណភាពទឹកដី និងកសាងប្រទេសជាតិ និងការដឹកនាំកងយោធាខេមរភូមិន្ទឲ្យរឹងមាំ ប្រកបដោយគុណភាព មានមនសិការស្នេហាជាតិ និងស្មោះត្រង់ចំពោះជាតិ និងប្រជាជនផងដែរ។ «ដូច្នេះ យើងត្រូវការមានកងទ័ពគ្រប់ប្រភេទខ្លាំងពូកែ ប្រកបដោយវិន័យ សីលធម៌ គុណភាព ក្នុងការធ្វើសឹកសង្គ្រាម ក្នុងការការពារបូរណភាពទឹកដី និងកសាងប្រទេសលើគ្រប់វិស័យ»។ នេះជាការរៀបរាប់របស់លោក ពៅ ពិសិដ្ឋ។
បេក្ខជនជាង១ពាន់នាក់ ចូលរួមប្រឡងជ្រើសរើសមន្ត្រីយោធាខេមរភូមិន្ទ មានការបែងចែកជាការប្រឡងផ្សេងៗគ្នា រួមមានដូចជា ការប្រឡងវគ្គនាយទាហានសកម្មជំនាន់ទី២៣ ចំនួន៤០៥នាក់ វគ្គនាយទាហានជើងគោកជំនាន់ទី១១ ចំនួន៥៩២នាក់ វគ្គនាយទាហានបន្តវេនជំនាន់ទី១២ ចំនួន១៨២នាក់ និងនាយទាហានជំនាញបច្ចេកទេសយោធា ចំនួន១៤០នាក់៕
© រក្សាសិទ្ធិដោយ thmeythmey.com