កីឡាជាតិ
ជាតិ
សំ ថារ័ត្ន ទៅផ្សព្វផ្សាយគុនល្បុក្កតោខ្មែរដល់គេហដ្ឋានរបស់ Pacquiao កីឡាការិនី សំ ថារ័ត្ន ជួបនិងហ្វឹកហាត់ជាមួយ Pacquiao ក្នុងអំឡុងផ្សព្វផ្សាយពីគុនល្បុក្កតោនៅសហរដ្ឋអាមេរិក
× ក្នុងអំឡុងពេលផ្សព្វផ្សាយពីគុនល្បុក្កតោនៅសហរដ្ឋអាមេរិកកាលពីពេលថ្មីៗ កីឡាការិនី សំ ថារ័ត្ន ទទួលបានឱកាសដ៏អស្ចារ្យតាមរយៈការជួបសំណេះសំណាល និងហ្វឹកហាត់រួមគ្នាជាមួយស្តេចប្រដាល់សកលរបស់ហ្វីលីពីន Manny Pacquiao។ ឆ្លៀតក្នុងឱកាសនោះ ថារ័ត្ន បានផ្សព្វផ្សាយពីគុនល្បុក្កតោដល់ស្តេចប្រដាល់រូបនេះផងដែរ។ កីឡាការិនីរូបនេះ បានចាត់ទុកការជួបនេះជារឿងដែលនឹកស្មានមិនដល់។
កីឡាការិនីគុនល្បុក្កតោ សំ ថារ័ត្ន អាចជាកីឡាការិនីកម្ពុជាដំបូងគេ ដែលបានទៅលេងផ្ទះស្តេចប្រដាល់សកលរបស់ហ្វីលីពីន Manny Pacquiao។ ក្រៅពីពិភាក្សា និងពិសាអាហារ ពួកគេបានហ្វឹកហាត់រួមគ្នាទៀតផង។ នេះជាឱកាសមួយដ៏កម្រនឹងកើតមានសម្រាប់កីឡាករកីឡាការនីកម្ពុជា ក៏ដូចជាបណ្តាប្រទេសផ្សេងៗ ព្រោះ Pacquiao ជាបុគ្គលល្បីល្បាញរបស់ហ្វីលីពីនទាំងលើវិស័យកីឡា និងនយោបាយ។
ជាមួយការបង្ហាញអារម្មណ៍ភ្ញាក់ផ្អើល និងរំភើបរីករាយជាមួយឱកាសដ៏កម្រខាងលើ សំ ថារ័ត្ន បានរៀបរាប់បែបកំប្លែងដូច្នេះថា៖«យី! គិតសព្វៗទៅដូចម៉េចមិនដឹងទេរកថាមិនត្រូវ] បានទៅដល់ផ្ទះផ្ទាល់ខ្លួនគេហើយ មើលទូរទស្សន៍ផ្ទះគេ ហូបបាយកកផ្ទះគេទៀត ជុំគ្នីគ្នាគេ ជុំឯងអីណាណី។ ឱកាសចឹងៗមានមិនច្រើនទេម៉ែ! មិត្តភក្តិអាគាំង សួរខ្ញុំថា មានខ្មែរប៉ុន្មានអ្នក បានមកលេងផ្ទះពូប៉ាកគីអាវចឹង? ខ្ញុំថា ណាដឹង! បើជុំវិញសុទ្ធតែហ្វីលីពីន និងពួកអាគាំង! ប្រហែលខ្ញុំជាខ្មែរទីមួយ? អត់ដឹងដែរ តែបើមែនឡូយណាស់»។
ឆ្លៀងក្នុងឱកាសជួបសំណេះសំណាលរយៈពេល២ថ្ងៃនោះដែរ ថារ័ត្ន បាននិយាយពីគុនល្បុក្កតោប្រាប់ Pacquiao ហើយស្តេចប្រដាល់រូបនេះ ក៏បានប្រើពាក្យល្បុក្កតោ និងកម្ពុជាដែរ។ កីឡាការិនីរូបនេះបានរៀបរាប់ដូច្នេះថា៖«បើខ្ញុំស្ដាប់មិនច្រឡំ អ្វីដែលខ្ញុំបានលឺពីគាត់ គឺពាក្យ Bokator និងពេលក្រោយមកទៀតគឺ Cambodia។ មិនជាជោរអីប៉ុន្មានទេ តែសប្បាយចិត្ត ដែលខ្ញុំបានអួតពីខ្មែរ។ អរគុណលោក Robert Lyons ដែលតែងតែទៅនិយាយអួតដាក់ត្រចៀក ប៉ាគីអាវ ជាញយៗពីឈ្មោះ ល្បុក្កតោ និងកម្ពុជាជំនួសខ្ញុំរហូត»។
លើសពីនេះ ថារ័ត្ន ត្រូវបានស្តេចប្រដាល់រូបនេះ ហៅទៅទស្សនាការប្រកួតរបស់គេជាមួយកីឡាករអាមេរិក Adrien Broner ដែលរៀបចំនៅថ្ងៃទី២០ ខែមករា ឆ្នាំ២០១៩ នៅក្នុងរដ្ឋ Las Vegas សហរដ្ឋអាមេរិក។ ប៉ុន្តែសំណើរនេះត្រូវបានកីឡាការិនីកម្ពុជារូបនេះ បដិសេដដោយសាររឿងទិដ្ឋការ ពោលគឺនាងត្រូវចាកចេញពីសហរដ្ឋអាមេរិកមកកម្ពុជានៅថ្ងៃទី១៤ ខែមករា ឆ្នាំ២០១៩។
ការជួបសំណេះសំណាល ហូបអាហារ និងហ្វឹកហាត់រួមគ្នាជាមួយស្តេចប្រដាល់ហ្វីលីពីន Manny Pacquiao ខាងលើធ្វើឡើងក្នុងអំឡុងពេលកីឡាការិនី សំ ថារ័ត្ន ទៅផ្សព្វផ្សាយពីគុនល្បុក្កតោនៅសហរដ្ឋអាមេរិក។ ថារ័ត្ន ជួប Pacquiao ពីរលើក គឺនៅថ្ងៃទី១១ និង ១៣ មករា។ «អត់ចង់ជឿថា ខ្ញុំបានមកដល់គេហដ្ឋានគាត់ទេ មិនចង់ជឿសោះឡើយ។ ភ្លាមៗពេក!»។ នេះជាការបង្ហាញអារម្មណ៍ភ្ញាក់ផ្អើលរបស់កីឡាការិនី សំ ថារ័ត្ន៕
Tag:
ល្បុក្កតោ
សំ ថារ័ត្ន
Manny Pacquiao
© រក្សាសិទ្ធិដោយ thmeythmey.com