កីឡាអន្តរជាតិ
អន្តរជាតិ
Asian Cup៖ ហ្វីលីពីន និងវៀតណាម សល់ឱកាសដណ្តើមលេខ៣ល្អបំផុត
× ក្រុមកីឡាបាល់ទាត់ជម្រើសជាតិពីតំបន់អាស៊ានពីររួមមានហ្វីលីពីន និងវៀតណាមនឹងត្រូវប្រជែងជាមួយគូប្រកួតរៀងៗខ្លួនក្នុងជំនួបចុងក្រោយដើម្បីដណ្តើមយកចំណាត់ថ្នាក់ទី៣ក្នុងពូលដែលជាឱកាសចុងក្រោយតែមួយគត់សម្រាប់ពួកគេឈានទៅវគ្គ១៦ក្រុមចុងក្រោយ នៃពានរង្វាន់ AFC Asian Cup ឆ្នាំ២០១៩។
ហ្វីលីពីនដែលដឹកនាំដោយគ្រូវបង្វឹកមានឈ្មោះល្បីលោក Sven-Goran Eriksson ត្រូវតទល់ជាមួយ កៀហ្ស៊ីស៊ីស្ថានក្នុងជំនួបផ្តាច់ព្រ័ត្រពូល C នៅថ្ងៃទី១៦ ខែមករា វេលាម៉ោង ៨:៣០នាទីយប់ [ម៉ោងនៅកម្ពុជា] ដើម្បីដណ្តើមយក៣ពិន្ទុ សម្រាប់តំណែងលេខ៣ក្នុងពូល ខណៈក្រុមទាំងពីរមិនទាន់ស្គាល់ឈ្នះដូចគ្នា។
កូរ៉េខាងត្បូង និងចិនដែលកក់កៅអីទៅកាន់វគ្គ១/៨ផ្តាច់ព្រ័ត្ររួចហើយនោះក៏ត្រូវប្រជែងគ្នាយកចំណាត់ថ្នាក់ទី១ពូល C នៅម៉ោងដំណាល់គ្នានេះដែរ។
មិនខុសពីហ្វីលីពីន និងកៀហ្ស៊ីស៊ីស្ថានឡើយ ម្ចាស់ជើងឯក AFF Suzuki Cup 2018 វៀតណាមក៏ត្រៀមខ្លួនតតាំងជាមួយយេម៉ែនដែលមានសូនពិន្ទុដូចគ្នានៅវេលាម៉ោង ១១:០០នាទីយប់នេះដែរ ដើម្បីប្រជែងគ្នាយក៣ពិន្ទុសម្រាប់ចំណាត់ថ្នាក់ទី៣ពូល D។ ក្នុងពូលនេះដែរ អ៊ីរ៉ាក់ត្រូវប៉ះអ៊ីរ៉ង់ដើម្បីយកតំណែងកំពូលតារាង ដ្បិតក្រុមទាំងពីឡើងដោយស្វ័យប្រវត្តិរៀងខ្លួន។
ក្នុងព្រឹត្តិការណ៍ប្រចាំតំបន់អាស៊ីលើកទី១៧នេះ ចំណាត់ថ្នាក់ទី៣ក្នុងពូលទាំង៦ នឹងត្រូវជ្រើសយក៤ក្រុមដែលមានពិន្ទុល្អបំផុត ដើម្បីយកទៅបំពេញបង្គ្រប់១២ក្រុមដែលយកបានចំណាត់ថ្នាក់ទី១ និងទី២តាមពូល សម្រាប់ប្រជែងគ្នានៅវគ្គ១៦ក្រុមចុងក្រោយ៕
© រក្សាសិទ្ធិដោយ thmeythmey.com