ជាតិ
នយោបាយជាតិ
សម្តេច ហ៊ុន សែន៖ រុស្ស៊ី បានជួយបណ្តុះធនធានមនុស្ស និងបន្សល់ទុកស្នាដៃនៅកម្ពុជា ជំនួបរវាងនាយករដ្ឋមន្រ្តីកម្ពុជា និង អនុប្រធានក្រុមប្រឹក្សាសហព័ន្ធនៃសហព័ន្ធរុស្ស៊ី
× សម្ដេចនាយករដ្ឋមន្ត្រី ហ៊ុន សែន បានជួបពិភាក្សាជាមួយលោក Ilyas Umakhanov អនុប្រធានក្រុមប្រឹក្សាសហព័ន្ធនៃសហព័ន្ធរុស្ស៊ី នៅខេត្តសៀមរាប នាថ្ងៃទី១៦ ខែមករា ឆ្នាំ២០១៩នេះ។ ក្នុងជំនួបនោះ ប្រមុខរដ្ឋាភិបាល បានរម្លឹកពីគុណសម្បត្តិខ្លះៗរបស់រុស្ស៊ី ដែលមានចំពោះកម្ពុជា នាពេលកន្លងមក។
សម្តេច ហ៊ុន សែន បាននិយាយទៅកាន់លោក Ilyas យ៉ាងដូច្នេះថា៖«ទំនាក់ទំនងរវាងកម្ពុជា និងរុស្ស៊ី គឺជាទំនាក់ទំនងប្រវត្តិសាស្ត្រជាយូរមកហើយ ជាពិសេសរុស្ស៊ីបានជួយដល់កម្ពុជានៅពេលដែលកម្ពុជា ជួបការលំបាកបំផុត ក្រោយពីទើបរំដោះប្រទេសចេញពីរបបប្រល័យពូជសាសន៍ប៉ុល ពត»។
ប្រមុខរដ្ឋាភិបាលកម្ពុជា បន្ថែមទៀតថា៖«រុស្ស៊ី ក៏បានបន្សល់ទុកនូវស្នាដៃប្រវត្តិសាស្ត្រមួយចំនួននៅកម្ពុជាផងដែរ ដូចជា មន្ទីរពេទ្យរុស្ស៊ី និងសាលាតិចណូ ជាដើម។ ទន្ទឹមនឹងនេះ រុស្ស៊ីក៏បានជួយដល់កម្ពុជា ក្នុងការបណ្ដុះបណ្ដាលធនធានមនុស្សនៅប្រទេសរុស្ស៊ីផ្ទាល់ ដែលសព្វថ្ងៃនេះ បញ្ញវ័ន្តទាំងនោះ កំពុងបំពេញការងារនៅក្នុងជួររដ្ឋាភិបាលកម្ពុជា»។
លោក Ilyas បានអបអរសាទរកម្ពុជា ចំពោះការរៀបចំកិច្ចប្រជុំលើកទី២៧នៃវេទិកាសភាអាស៊ី-ប៉ាស៊ីហ្វិក (APPF) និងការប្រកាសបើកក្រុមប្រឹក្សាវប្បធម៌អាស៊ី (ACC) នៅលើទឹកដីកម្ពុជាជាលើកដំបូង។ លោក Ilyas បានលើកឡើងថា គណៈប្រតិភូរបស់លោកទាំងអស់ នឹងខិតខំធ្វើយ៉ាងណា ដើម្បីរួមចំណែកក្នុងការជំរុញទំនាក់ទំនងរវាងប្រទេសទាំងពីរឲ្យកាន់តែល្អ។
លោក Ilyas និងគណៈប្រតិភូ បានមកកម្ពុជា ដើម្បីចូលរួមក្នុងកិច្ចប្រជុំនៃវេទិកាសភាអាស៊ី-ប៉ាស៊ីហ្វិក និងចូលរួមអបអរសាទរការប្រកាសក្រុមប្រឹក្សាវប្បធម៌អាស៊ី។ កិច្ចប្រជុំនៃវេទិកាសភាអាស៊ី-ប៉ាស៊ីហ្វិក មានរយៈពេល៤ថ្ងៃទី គឺចាប់ពីថ្ងៃទី១៤ដល់ថ្ងៃទី១៧ ខែមករា ឆ្នាំ២០១៩ ដោយមានការចូលរួមពីថ្នាក់ដឹកនាំខាងស្ថាប័ននីតិបញ្ញត្តិនៃប្រទេសចំនួន២១ ដោយរួមទាំងកម្ពុជា ជាម្ចាស់ផ្ទះផងដែរ៕
Tag:
ហ៊ុន សែន
កម្ពុជា-រុស្ស៊ី
© រក្សាសិទ្ធិដោយ thmeythmey.com