អន្តរជាតិ
អាមេរិកអាចប្រើទាហានស៊ីឈ្នួលជំនួសទ័ពថ្មើរជើងដែលត្រូវដកចេញពីស៊ីរី
× អតីតនាយកប្រតិបត្តិក្រុមហ៊ុនសន្តិសុខឯកជន Blackwater បានផ្តល់យោបល់នៅសប្តាហ៍នេះ ឲ្យរដ្ឋបាលអាមេរិកប្រើប្រាស់ទាហានស៊ីឈ្នួលនៅក្នុងសង្គ្រាមស៊ីរីវិញ បន្ទាប់ពីមានការដកកងទ័ពថ្មើរជើង ២០០០នាក់ចេញពីទីនោះ។
យោបល់ស្តីពីការប្រើប្រាស់ទាហានស៊ីឈ្នួលនៅស៊ីរីរបស់លោក Erik Prince ដែលធ្លាប់ធ្វើជាទាហាន Navy SEAL ដែរនោះត្រូវបានលើកឡើងក្នុងបទសម្ភាសមួយជាមួយទូរទស្សន៍ Fox កាលពីថ្ងៃអង្គារទី ១៥ ខែមករា។
លោក Prince បាននិយាយថា វាជារឿងចាំបាច់ដែលអាមេរិកត្រូវប្រើប្រាស់ទាហានស៊ីឈ្នួលជំនួសកងទ័ពអាមេរិកនៅស៊ីរី ដ្បិតថា អាមេរិកគ្មានយុទ្ធសាស្ត្រយូរអង្វែងក្នុងការបន្តវត្តមានយោធានៅទីនោះឡើយ។
លោក និយាយបែបនេះ៖ «អាមេរិកមិនមានកាតព្វកិច្ចយុទ្ធសាស្ត្រយូរអង្វែងឡើយសម្រាប់ការបន្តវត្តមាននៅស៊ីរី ប៉ុន្តែខ្ញុំគិតថា វាមិនមែនជាគំនិតល្អឡើយដែលត្រូវបោះបង់ចោលសម្ព័ន្ធមិត្តនៅទីនោះ។ ក្នុងប្រវត្តិសាស្ត្រអាមេរិកគឺតែងតែមានភាពជាដៃគូរវាងរដ្ឋនិងឯកជន។ វាកើតមាននៅកន្លែងណាដែលវិស័យឯកជនអាចជួយបំពេញបន្ថែមបាន រួមទាំងកន្លែងទាំងឡាយណាដែលការចំណាយលើវិស័យយោធាច្រើនសន្ធឹកសន្ធាប់មិនគួរកើតមានដែរ»។
វាមិនមែនជារឿងគួរឲ្យភ្ញាក់ផ្អើល ហើយក៏មិនមែនជាលើកទីមួយដែរ ដែលលោក Prince បានផ្តល់យោបល់ដល់រដ្ឋបាលអាមេរិកពីការប្រើប្រាស់ទាហានស៊ីឈ្នួលក្នុងសង្គ្រាមនោះ។ កាលពីឆ្នាំមុន លោក Prince បានដាក់សំណើរទៅកាន់ក្រសួងការពារជាតិអាមេរិកដើម្បីធ្វើឯកជនភាវូបនីយកម្មសង្គ្រាមនៅអាហ្វហ្គានីស្ថានដែរ ដោយលុយចំណាយលើគម្រោងនេះមានទំហំ ប្រាំពាន់លានដុល្លារអាមេរិក។
ប៉ុន្តែអតីតរដ្ឋមន្ត្រីការពារជាតិអាមេរិកលោក ជេម ម៉ាធីស បានទាត់ចោលសំណើរនេះ។ លើកនេះ ដោយគ្មានវត្តមានលោក ម៉ាធីស ទៀត សំណើរឈានទៅប្រើប្រាស់ទាហានស៊ីឈ្នួលនៅស៊ីរី ពេលទាហានអាមេរិកដកចេញអស់នោះក្លាយជារឿងមួយដែលអាចទៅរួច។ មកដល់ពេលនេះ គេមិនដឹងថា វានឹងមានការសម្រេចចិត្តបែបណាឡើយ។ ក្នុងករណី ដែលមានការយល់ព្រមទទួលសំណើរមែននោះ សំណួរសំខាន់មួយលេចឡើងគឺថាតើអ្នកណាទទួលខុសត្រូវថ្លៃចំណាយលើទាហានស៊ីឈ្នួលទាំងនោះ។
ដោយឡែក ក្នុងករណីដែលសម្រេចប្រើប្រាស់ទាហានស៊ីឈ្នួលនៅស៊ីរី មហាអំណាចនេះក៏មិនមែនជាប្រទេសទីមួយដែរ។ រុស្ស៊ីបានបញ្ជូនទាហានស៊ីឈ្នួលរបស់ខ្លួនរួចរាល់ហើយទៅជួយគាំទ្ររដ្ឋាភិបាលស៊ីរីប្រឆាំងក្រុមរដ្ឋឥស្លាម រាប់ចាប់តាំងពីពេលដែលមហាអំណាចនេះចូលប្រឡូកក្នុងសង្គ្រាមនៅក្នុងឆ្នាំ ២០១៥មកនោះ។ មានការផ្សព្វផ្សាយថា ទាហានទាំងនោះស្ថិតក្រោមក្រុមហ៊ុន Wagner Group ដែលដើមឡើយត្រូវបានបង្កើតឡើងដើម្បីក្រឡុកតំបន់ភាគខាងកើតអ៊ុយក្រែន។ ក្រុមហ៊ុននេះមានខ្សែរយៈជាមួយអ្នកជំនួញដ៏ល្បីម្នាក់គឺលោក Yevgeny Prighozin ដែលជាមនុស្សស្និទ្ធនឹងលោក វ្ល៉ាឌីមៀ ពូទីន៕
Tag:
អាមេរិក
ទាហានស៊ីឈ្នួល
ស៊ីរី
Erik Prince
Blackwater
© រក្សាសិទ្ធិដោយ thmeythmey.com