ចុងក្រោយលោកស្រី ថេរ៉េសា ម៉េយ៍ នៅតែមានលទ្ធភាពរួចផុតពីការបញ្ចប់តំណែងក្នុងការបោះឆ្នោតដកសេចក្តីទុកចិត្តពីសំណាក់សមាជិកសភាអង់គ្លេស។ បន្ទាប់ពីរក្សាបានតំណែងនេះ លោកស្រីបានស្វះស្វែងរកលទ្ធភាពចរចា និងពិភាក្សាបន្ថែមជាមួយអ្នកនយោបាយអង់គ្លេសផ្សេងទៀតដើម្បីឈានទៅកែសម្រួលកិច្ចព្រមព្រៀងចាកចេញពីសហភាពអឺរ៉ុប Breixt ដែលលោកស្រីចរចាបានជាមួយក្រុងព្រុចសែលកន្លងមកនោះ។
ការបោះឆ្នោតដកសេចក្តីទុកចិត្តលើនាយករដ្ឋមន្ត្រីអង់គ្លេសពីសំណាក់សមាជិកសភាត្រូវបានរៀបចំឡើងតាមការព្រាងទុកនៅថ្ងៃពុធទី ១៦ខែមករា។ ប៉ុន្តែអ្វីដែលគួរឲ្យកត់សម្គាល់នោះ លោកស្រី ថេរ៉េសា ម៉េយ៍ មិនបានរបូតបាត់តំណែងជាប្រមុខរដ្ឋាភិបាលឡើយ ថ្វីបើបញ្ហាចម្រូងចម្រាសនយោបាយកើនឡើងកាន់តែខ្លាំង និងមានចលនាទិតៀននិងប្រឆាំងលោកស្រីច្រើនក៏ដោយចុះ។
យោងតាមទីភ្នាក់ងារព័ត៌មាន AFP ក្នុងការបោះឆ្នោតនេះ វាមានសមាជិកសភា ៣២៥ រូបដែលបានបោះឆ្នោតបន្តគាំទ្រលោកស្រី ខណៈដែល ៣០៦ សំឡេងផ្សេងទៀតប្រឆាំង។
តាមពិតទៅនីតិវិធីដកសេចក្តីទុកចិត្តលើរដ្ឋាភិបាល និង នាយករដ្ឋមន្ត្រីនេះធ្វើឡើង ២៤ម៉ោងប៉ុណ្ណោះក្រោយពីកិច្ចព្រមព្រៀង Brexit ដាក់ស្នើឡើងដោយលោកស្រី ម៉េយ៍ ផ្ទាល់នោះត្រូវបានសភាទាត់ចោល។ ការបោះឆ្នោតដកសេចក្តីទុកចិត្តនេះដែរ ត្រូវបានស្នើឡើងដោយគណបក្សការងារដែលជាគណបក្សប្រឆាំងដែលចង់ឲ្យមានការបោះឆ្នោតសភាបន្ទាន់មួយផង។
ក្រោយរួចផុតពីការដកហូតតំណែង លោកស្រី ម៉េយ៍ ថ្លែងតាមកញ្ចក់ទូរទស្សន៍ដូច្នេះ៖ «ឥឡូវនេះសមាជិកសភាបានបញ្ជាក់ច្បាស់ហើយពីអ្វីដែលគេចង់បាន។ យើងត្រូវធ្វើការរួមគ្នាដើម្បីឈានទៅសម្រេចបានចំណុចដែលសភាចង់បាននោះ»។
គេឃើញ នាយករដ្ឋមន្ត្រីអង់គ្លេសរូបនេះរួសរាន់ស្កាត់ទៅជួបបណ្តាសមាជិកសភាបក្សប្រឆាំងនិងរាល់អ្នកដែលជំទាស់កិច្ចព្រមព្រៀង Brexit ដែលលោកស្រីចរចាបានកន្លងមកនោះដើម្បីត្រួសត្រាយផ្លូវឲ្យមានការឯកភាពគ្នាលើបញ្ហានេះ។
អ្នកនយោបាយដែលលោកស្រី ម៉េយ៍ស្កាត់ទៅជួបនោះមានសមាជិកគណៈបក្សជាតិនិយមស្កុតឡែន, សមាជិកបក្សជាតិនិយមវ៉ែល (Welsh Nationalist) រួមជាមួយសមាជិក គណបក្សប្រជាធិបតេយ្យសេរីដែលមាននិន្នាការគាំទ្រសហភាពអឺរ៉ុបនោះ។ ចំណែកបក្សការងារដែលជាបក្សប្រឆាំងសំខាន់ជាងគេដឹកនាំដោយលោក Jeremy Corbyn នោះមិនចង់ជួបពិភាក្សាជាមួយលោកស្រី ម៉េយ៍ឡើយ។
លោកស្រី ម៉េយ៍ មានពេលវេលាដល់ត្រឹមថ្ងៃចន្ទដើម្បីរៀបចំផែនការថ្មីមុននឹងត្រូវត្រឡប់យកកិច្ចព្រមព្រៀងនេះមកដាក់ឆ្លងសភាជាថ្មីទៀត។ វាច្បាស់ណាស់ថា លោកស្រីពិបាកយកកិច្ចព្រមព្រៀងនេះទៅចរចាជាថ្មីជាមួយសហភាពអឺរ៉ុប ដ្បិតមេដឹកនាំអឺរ៉ុបប្រកាសហើយថា គ្មានឡើយការចរចាឡើងវិញលើសេចក្តីព្រាងកិច្ចព្រមព្រៀងដែលបានឯកភាពគ្នាក្នុងសន្និសីទក្រុងព្រុចសែលកាលពីខែធ្នូកន្លងទៅ។
វាមានន័យថា អ្វីដែលលោកស្រី ម៉េយ៍ ត្រូវធ្វើគឺប្រឹងបញ្ចុះបញ្ចូលសមាជិកសភាដែលប្រឆាំងកិច្ចព្រមព្រៀងលោកស្រីចរចាបានមុនដល់ថ្ងៃចន្ទ។ យ៉ាងណាក៏ដោយ សមាជិកសភាប្រឆាំងជាច្រើនលើកលក្ខខណ្ឌមួយចំនួនសម្រាប់លោកស្រី ម៉េយ៍ ក្នុងនោះមានការពន្យារពេលនៃការចាកចេញពីសហភាពអឺរ៉ុបថ្ងៃ ២៩ ខែមីនា និងបដិសេធចោលស្ថានភាពដែលអង់គ្លេសត្រូវចាកចេញដោយគ្មានកិច្ចព្រមព្រៀងសោះនោះ។ ខ្លះទៀតក៏ចង់ឲ្យមានការពិចារណាលើលក្ខខណ្ឌរៀបចំប្រជាមតិជាលើកទីពីរទៀតដែរដើម្បីឲ្យប្រជាជនអង់គ្លេសបង្ហាញយោបល់និងឆន្ទៈចុងក្រោយផង៕