លោកសុខ ឥសាន ថា មិនចាញ់គ្នាទេ បើកម្ពុជា មានពេលអភិវឌ្ឍ២០០ឆ្នាំ ដូចអាមេរិក

ជាតិ

នយោបាយជាតិ

លោកសុខ ឥសាន ថា មិនចាញ់គ្នាទេ បើកម្ពុជា មានពេលអភិវឌ្ឍ២០០ឆ្នាំ ដូចអាមេរិក

17, Jan 2019 , 9:39 pm

រូបភាព

លោក សុខ ឥសាន អ្នកនាំពាក្យគណបក្សប្រជាជនកម្ពុជា

ដោយ: ថ្មីៗ

លោក សុខ ឥសាន អ្នកនាំពាក្យគណបក្សកាន់អំណាច ទើសត្រចៀក នៅពេលឮគេរិះគន់ថា សម្តេច ហ៊ុន សែន ធ្វើជានាយករដ្ឋមន្ត្រីដល់ទៅ៣៤ឆ្នាំហើយ តែមិនអាចអភិវឌ្ឍប្រទេសឲ្យដូចសហរដ្ឋអាមេរិក ឬប្រទេសជឿនលឿនផ្សេងទៀត។

អ្នកនាំពាក្យរូបនេះ សុខចិត្តទទួលយក ដែលថា កម្ពុជា ពិតជាមិនទាន់រីកចម្រើនដូចសហរដ្ឋអាមរិក។ ប៉ុន្តែ លោក ឆ្លើយតបបែបចំអកទៅវិញថា ឲ្យដូចយ៉ាងដូចម្តេច បើសហរដ្ឋអាមេរិក បានកសាងប្រទេស ចាប់តាំងសតវត្សរ៍ទី១៨មកម្ល៉េះ ឯសម្តេច ហ៊ុន សែន ទើបតែធ្វើជានាយករដ្ឋមន្ត្រីបាន៣៤ឆ្នាំប៉ុណ្ណោះ។

លោក បន្តថា បើប្រៀបធៀបទៅ រយៈពេលនៃការអភិវឌ្ឍរវាងសហរដ្ឋអាមេរិកនិងកម្ពុជា គឺខុសគ្នាដល់ទៅជាង២០០ឆ្នាំឯណោះ។ លោក បន្ថែមថា នេះមិននិយាយពីផលវិបាកនៃសង្គ្រាមនិងរបបប្រល័យពូជសាសន៍នៅកម្ពុជាផង។

បន្ទាប់មក មន្ត្រីជាន់ខ្ពស់គណបក្សកាន់អំណាចរូបនេះ ក៏បង្ហាញការជឿជាក់ថា បើមានរយៈពេលស្មើគ្នាក្នុងការអភិវឌ្ឍ កម្ពុជា ច្បាស់ជាមិនចាញ់សហរដ្ឋអាមេរិកនោះទេ។ លោក បានសរសេរសារក្នុងបណ្តាញទំនាក់ទំនងតេឡេក្រាម នៅថ្ងៃទី១៧ ខែមករា ឆ្នាំ២០១៩ យ៉ាងដូច្នេះថា៖«បើមិនជឿ ទុកឲ្យសម្តេចតេជោ ដឹកនាំប្រទេស២០០ឆ្នាំទៀត បើមិនរីកចម្រើនដូចសហរដ្ឋអាមេរិក ឬមិនលើសសហរដ្ឋអាមេរិកទេ ហ៊ានភ្នាល់ ហើយចាំដល់ពេលនោះ ចាំអស់លោកអ្នកវិភាគ បន្ទោសសម្តេចតេជោចុះ អត់តវ៉ាឡើយ»។

គិតត្រឹមថ្ងៃទី១៤ ខែមករា ឆ្នាំ២០១៩ សម្តេច ហ៊ុន សែន បានកាន់តំណែងជានាយករដ្ឋមន្ត្រី អស់រយៈពេល៣៤ឆ្នាំហើយ។ សម្តេច ហ៊ុន សែន ប្រកាសថា នឹងបន្តធ្វើជានាយករដ្ឋមន្ត្រីរហូតដល់ឆ្នាំ២០២៨។

ប្រមុខរដ្ឋាភិបាល ធ្លាប់អះអាងថា កម្ពុជា ទើបតែមានឱកាសជាង២០ឆ្នាំប៉ុណ្ណោះ ក្នុងការកសាងប្រទេសឡើងវិញ ពោលគឺ គិតចាប់តាំងពីចុងឆ្នាំ១៩៩៨មក ដែលជាពេលដែលកម្ពុជា មានសន្តិភាពពេញលេញ ហើយក៏ជាពេលកម្ពុជា មានតំបន់ត្រួតត្រាតែមួយ រដ្ឋាភិបាលតែមួយ រដ្ឋធម្មនុញ្ញតែមួយ និងកម្លាំងប្រដាប់អាវុធតែមួយ៕