ដោយ៖ Matias Andres
កីឡាករមកពីក្លិបអាណាចក្រប្រយុទ្ធ គង់ សំបូរ ត្រូវប៉ះជាមួយជើងខ្លាំងមកពីចិន Zhang Chenglong ក្នុងការប្រដាល់សេរីកម្មវិធី ONE Super Series នៅឯប្រទេសសិង្ហបុរីថ្ងៃទី២២ ខែកុម្ភៈ ក្នុងព្រឹត្តិការណ៍ ONE: CALL TO GREATNESS។ ក្នុងនោះ ក៏មានកីឡាករតំណាងកម្ពុជាមួយរូបទៀតគឺ ខុន ស៊ីចាន់ ដែលនឹងបញ្ចេញស្នាដៃក្នុងកម្មវិធីជាមួយគ្នានេះដែរ។
អ្នកលេងគុនខ្មែរ គង់ សំបូរ បានចាត់ទុកការចូលរួមប្រកួតក្នុងព្រឹត្តិការណ៍ ONE Championship ជាឱកាសមួយដ៏ល្អសម្រាប់រូបគេក្នុងការផ្សព្វផ្សាយពីគុនខ្មែរទៅកាន់ពិភពលោក។ រូបគេ នឹងយកព្រឹត្តិការណ៍ដ៏ធំលើពិភពលោកមួយនេះ ដើម្បីផ្សព្វផ្សាយពីភាពខ្លាំងរបស់ក្បាច់គុនកេរតំណែលរបស់បុព្វបុរសខ្មែរ ឲ្យពិភពលោកបានស្គាល់។
សំបូរ និយាយថា៖«ខ្ញុំមានមោទកភាពខ្លាំងមែនទែន ដែលបានឡើងបញ្ចេញសមត្ថភាពនៅ ONE Championship ខ្ញុំចង់បង្ហាញគេគ្រប់គ្នាថា ក្បាច់គុនខ្មែរនៅតែខ្លាំងមិនបានចុះខ្សោយឡើយ។ ខ្ញុំចង់ប្រាប់ទៅបងប្អូនខ្មែរគ្រប់រូបដែលរង់ចាំមើលការប្រកួតរបស់ខ្ញុំនៅ ONE ថាខ្ញុំនឹងប្រកួតឲ្យអស់ពីលទ្ធភាព និងមិនធ្វើឲ្យបងប្អូនបាក់ទឹកចិត្តលើរូបខ្ញុំឡើយ»។
ថ្វីដ្បិតរូបគេដឹងថា ការប្រកួតនេះមិនងាយស្រួលដូចការប្រកួតក្នុងស្រុក ប៉ុន្តែសម្រាប់គេនឹងធ្វើឲ្យអស់ពីសមត្ថភាពយកជ័យជម្នះពីសិង្ហបុរីមកកម្ពុជាឲ្យបាន។ រូបគេលើកឡើងថា៖«ការប្រកួតមួយនេះវាសំខាន់ណាស់សម្រាប់ខ្ញុំ។ ខ្ញុំនឹងហាត់ឲ្យខ្លាំង ហើយវាយឲ្យល្អ ព្រោះខ្ញុំវាយតំណាងឲ្យខ្មែរ ទោះចាញ់ ឬឈ្នះក៏ដោយ ខ្ញុំមានមោទកភាព ដោយសារខ្ញុំបានប្រើអស់ពីកម្លាំងកាយចិត្ត»។
សំបូរ ដែលកំពុងរស់នៅ និងហ្វឹកហាត់នៅខេត្តសៀមរាប បានព្យាយាមអភិវឌ្ឍន៍សមត្ថភាពយ៉ាងខ្លាំង ដើម្បីត្រៀមខ្លួនឲ្យបានល្អមុនចូលសង្វៀនប្រដាល់ធំជាងគេនេះ។ សំបូរ ជាមួយគ្រូបង្វឹកផ្ទាល់នៅក្លិបអាណាចក្រប្រយុទ្ធ ក៏កំពុងរៀបចំស្នៀត ដើម្បីតទល់ជាមួយដៃគូចិន ឲ្យទស្សនិកជនមើលយ៉ាងជក់ចិត្តផងដែរ។
ដើម្បីត្រៀមតទល់ជាមួយកីឡាករចិន Zhang Chenglong នៅថ្ងៃទី២២ ខែកុម្ភៈ នៅប្រទេសសិង្ហបុរីខាងមុខ កីឡាកររូបនេះអះអាងថា រូបគេហ្វឹកហាត់មិនដែលសម្រាកឡើយ សូម្បីថ្ងៃបុណ្យជាតិក៏ដោយ។ ក្រៅពីហ្វឹកហាត់នៅក្នុងក្លិប សំបូរ បានព្យាយាមហ្វឹកហាត់នៅខាងក្រៅបន្ថែម ដើម្បីកាយសម្បទាឲ្យកាន់តែរឹងមាំ។
ទោះបីកីឡាករចិន Zhang ជាកីឡាករមានកេរ្តិ៍ឈ្មោះល្អ និងបទពិសោធច្រើនប្រហែលជាង៥០ប្រកួតរួចមកហើយនៅស្ថាប័នប្រដាល់ដូចជា Glory ជាដើម។ តែអ្នកប្រដាល់តំណាងក្លឹបអាណាចក្រប្រយុទ្ធរូបនេះ ជឿថា ឱកាសដែលបានប្រកួតជាមួយជើងខ្លាំង Zhang នឹងជំរុញឲ្យគេកាន់តែល្អជាងមុន។
ទន្ទឹមនឹងនេះ កីឡាករមកពីខេត្តសៀមរាបរូបនេះអះអាងថា រូបគេបានដឹងពីចំណុចខ្សោយក្នុងការយកឈ្នះកីឡាករចិននេះរួចហើយ។ រូបគេមើលឃើញយ៉ាងដូច្នេះថា៖«Zhang គាត់ខ្លាំងដែរ ប៉ុន្តែប៉ះជាមួយអ្នកខ្លាំង បានធ្វើឲ្យយើងល្អ ប៉ះអ្នកខ្សោយៗ វាអត់សូវល្អទេ។ ខ្ញុំដឹងគាត់ល្អតែប្រើដៃ តែជើងគាត់អត់សូវល្អទេ។ អញ្ចឹងឥឡូវកំពុងហាត់ការពារច្រើន»៕