នាយករដ្ឋមន្ត្រីវៀតណាម ង្វៀន សួនហ្វ៊ុក លើកឡើងថា វៀតណាមនឹងព្យាយាមបង្កើនការនាំចូលទំនិញបន្ថែមពីអាមេរិកដើម្បីធានាតុល្យភាពពាណិជ្ជកម្មទ្វេភាគី តាមការចង់បានរបស់រដ្ឋបាលក្រុងវ៉ាស៊ីនតោន។ ក្រៅពីពង្រីកទំនាក់ទំនងសេដ្ឋកិច្ចទ្វេភាគីជាមួយអាមេរិក មេដឹកនាំវៀតណាមរូបនេះក៏ប្រកាសត្រៀមខ្លួនជួយសម្របសម្រួល និងរៀបចំកិច្ចប្រជុំប្រវត្តិសាស្ត្ររវាងលោក ដូណាល់ ត្រាំ និងលោក គីម ជុងអ៊ុនជាលើកទីពីរផងដែរ បើសិនជាភាគីជ្រើសរើសយកវៀតណាមមែននោះ។
ក្នុងបទសម្ភាសន៍ថ្មីមួយជាមួយទូរទស្សន៍ Bloomberg នៅថ្ងៃព្រហស្បតិ៍ ទី ១៧ ខែមករា នាយករដ្ឋមន្ត្រីវៀតណាមលោក ង្វៀន សួនហ្វ៊ុក បង្ហើបថា វៀតណាមកំពុងបន្តនាំចូលកាន់តែច្រើននូវផលិតផលពីក្រុមហ៊ុនអាមេរិកដូចជា ប៊ូអ៊ីង ក្រុមហ៊ុន General Electric ជាដើមនៅពេលបច្ចុប្បន្ន។
នាយករដ្ឋមន្ត្រីរូបនេះបន្តថា វាជាចំណាត់ការរបស់វៀតណាមក្នុងការធានាឲ្យបាននូវការកាត់បន្ថយគម្លាតទំហំពាណិជ្ជកម្ម និងធ្វើឲ្យមានតុល្យភាពពាណិជ្ជកម្ម តាមការចង់បានរបស់ប្រធានាធិបតី។
«យើងមានគោលដៅសម្រេចឲ្យបាននៅពាណិជ្ជកម្មដែលមានតុល្យភាពជាងនេះជាមួយអាមេរិក។ ការបញ្ជាទិញទំនិញបន្ថែមនេះនឹងជួយឲ្យមានតុល្យភាព និងជំរុញពាណិជ្ជកម្មរវាងប្រទេសវៀតណាមជាមួយមហាអំណាចសេដ្ឋកិច្ចទីមួយនេះផង»។ លោក ហ្វ៊ុកបាននិយាយដូច្នេះ។
ចាប់ពីពេលឡើងកាន់តំណែងជាប្រធានាធិបតីដើមឆ្នាំ ២០១៧ បញ្ហាឱនភាពពាណិជ្ជកម្មជាបញ្ហាធំដែលលោក ត្រាំ ចង់ដោះស្រាយ។ ប្រធានាធិបតីរូបនេះដាក់សម្ពាធឲ្យបណ្តាប្រទេសដែលមានឱនភាពពាណិជ្ជកម្មធំៗជាមួយអាមេរិកបង្កើនការបញ្ជាទិញទំនិញពីអាមេរិកដែរ។
វៀតណាមក្លាយជាដៃគូសេដ្ឋកិច្ចដ៏សំខាន់មួយរបស់អាមេរិក ប៉ុន្តែឱនភាពពាណិជ្ជកម្មទ្វេភាគីមានរហូតដល់ ៣៣ ពាន់លានដុល្លារឯណោះគិតត្រឹមរយៈពេល ១០ ខែនៃឆ្នាំ ២០១៨។ ជារួមវៀតណាមស្ថិតនៅលំដាប់ថ្នាក់ទីប្រាំមួយក្នុងចំណោមប្រទេសដែលមានឱនភាពពាណិជ្ជកម្មធំបំផុតជាមួយអាមេរិកបន្ទាប់ពី ចិន, ម៉ិកស៊ិក, អាលឺ្លម៉ង់, កាណាដា និង ជប៉ុន។
រដ្ឋាភិបាលវៀតណាមប្រឹងប្រែងដោះស្រាយបញ្ហានេះ និងព្យាយាមបង្កើតទំនាក់ទំនងទាំងសេដ្ឋកិច្ច និងយោធាជាមួយអាមេរិកផង ដ្បិតរដ្ឋអាស៊ីអាគ្នេយ៍នេះចង់បន្ថយការពឹងផ្អែកខ្លាំងលើទំនាក់ទំនងពាណិជ្ជកម្មជាមួយចិន។ ចិនបច្ចុប្បន្ននៅតែរក្សាតំណែងជាដៃគូពាណិជ្ជកម្មធំបំផុតរបស់វៀតណាម ប៉ុន្តែភាគីទាំងពីរនៅតែប្រឈមមុខដាក់គ្នាក្នុងជម្លោះដែនសមុទ្រចិនខាងត្បូងដដែល។
មេដឹកនាំវៀតណាមរីករាយនឹងជួយរៀបចំជំនួប ត្រាំ-គីម លើកទីពីរ
ក្រៅពីរឿងសេដ្ឋកិច្ច នាយករដ្ឋមន្ត្រីវៀតណាម ង្វៀន សួនហ្វ៊ុក ក៏បានលើកឡើងពីគម្រោងរៀបចំកិច្ចប្រជុំពិសេសរវាងប្រធានាធិបតីអាមេរិក និងកូរ៉េខាងជើងលើការរំសាយនុយក្លេអ៊ែរដែរ។ លោក សួនហ្វ៊ុក បានប្រកាសថា លោកមិនបានដឹងសោះពីគម្រោងរៀបចំជំនួបលោក ដូណាល់ ត្រាំ និងលោក គីម ជុងអ៊ុន នៅហាណូយឡើយ។ ប៉ុន្តែតាងនាមឲ្យប្រជាជនវៀតណាមលោកពិតជាស្វាគមន៍កក់ក្តៅ និងរីករាយក្នុងការជួយរៀបចំជំនួបប្រវត្តិសាស្ត្រនេះ។
«ខ្ញុំពិតជាមិនបានដឹងឡើយថា ភាគីទាំងពីរនឹងសម្រេចយកការជួបប្រជុំគ្នានៅវៀតណាមនោះ។ យើងមិនបានដឹងទេពីការសម្រេចចិត្តចុងក្រោយ។ ប៉ុន្តែប្រសិនបើវាកើតឡើងនៅទីនេះមែន យើងនឹងប្រឹងអស់ពីសមត្ថភាពដើម្បីជួយសម្របសម្រួលដល់កិច្ចប្រជុំនេះ»។ នេះជាការបញ្ជាក់របស់លោក ង្វៀន សួនហ្វ៊ុក។
កន្លងមកមានតែការផ្សព្វផ្សាយពីកាសែតកូរ៉េខាងត្បូងប៉ុណ្ណោះដែលបញ្ជាក់ថា ក្រុងហាណូយជាទីតាំងនៃជំនួបលើកទីពីររវាងលោក ដូណាល់ ត្រាំ និងលោក គីម ជុងអ៊ុន។ ប៉ុន្តែតាមពិតមកដល់បច្ចុប្បន្នមិនទាន់មានការសម្រេចណាមួយត្រូវបានធ្វើឡើងឡើយទាំងកាលបរិច្ឆេទ និងទីតាំងនៃជំនួបនោះ។ មន្ត្រីជាន់ខ្ពស់កូរ៉េខាងជើងកំពុងស្ថិតនៅអាមេរិកដើម្បីជជែកគ្នាជាមួយមន្ត្រីអាមេរិកដើម្បីសម្រេចចុងក្រោយ៕