រដ្ឋាភិបាល ស្នើឲ្យប្រព័ន្ធផ្សព្វផ្សាយទាំងអស់ កុំប្រើពាក្យ«របបក្រុងភ្នំពេញ និងរបបលោក ហ៊ុន សែន»

ជាតិ

រដ្ឋាភិបាល ស្នើឲ្យប្រព័ន្ធផ្សព្វផ្សាយទាំងអស់ កុំប្រើពាក្យ«របបក្រុងភ្នំពេញ និងរបបលោក ហ៊ុន សែន»

18, Jan 2019 , 4:13 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាល ស្នើឲ្យប្រព័ន្ធផ្សព្វផ្សាយទាំងអស់ កុំប្រើពាក្យ«របបក្រុងភ្នំពេញ និងរបបលោក ហ៊ុន សែន» នៅក្នុងអត្ថបទព័ត៌មានរបស់ខ្លួន។ រដ្ឋាភិបាល ចាត់ទុកការប្រើប្រាស់ពាក្យទាំងនេះ ជាការញុះញង់ដែលនាំឲ្យបែកបាក់ឯកភាពជាតិ និងប៉ះពាល់ដល់សន្តិភាពជាតិ។

«ការប្រើប្រាស់ពាក្យរបបក្រុងភ្នំពេញ និងរបបលោក ហ៊ុន សែន មានចរិតជាការញុះញង់ ធ្វើវិទ្ធង្សនាបំបែកបំបាក់សាមគ្គី និងឯកភាពជាតិរបស់កម្ពុជា ដែលបាននិងកំពុងរស់នៅក្នុងសង្គមមួយ ដែលមានសុខដុមនីយកម្ម និងកំពុងប្រកាន់យកការអនុវត្តតាមគោលការណ៍នីតិរដ្ឋយ៉ាងម៉ឺងម៉ាត់» ។ នេះជាការលើកឡើងរបស់លោក ផៃ ស៊ីផាន ចាត់ទុកថា ការប្រើពាក្យបែបនេះ នៅក្នុងប្រពន្ធផ្សព្វផ្សាយ គឺវាប៉ះពាល់ទៅដល់ការដឹកនាំរបស់ប្រមុខរដ្ឋាភិបាល ដែលកំពុងការពារ និងពង្រឹងឯកភាពជាតិ អធិបតេយ្យភាព បូរណភាពទឺកដី តាមរយៈគោលនយោបាយបង្រួបបង្រួមជាតិ។

ដោយសារយល់ឃើញបែបនេះ ទើបការិយាល័យរបស់អ្នកនាំពាក្យរដ្ឋាភិបាល ស្នើឲ្យភាគីពាក់ព័ន្ធ និងបណ្ដាញសារព័ត៌មានមួយចំនួន បញ្ឈប់ការប្រើប្រាស់ពាក្យ«របបក្រុងភ្នំពេញ និងរបបលោក ហ៊ុន សែន»។ រដ្ឋាភិបាល យល់ថា ការប្រើប្រាស់ពាក្យបែបនេះ ជារឿងមិនត្រឹមត្រូវឡើយ។ «បើពុំដូច្នេះទេ ការិយាល័យអ្នកនាំពាក្យរដ្ឋាភិបាល នឹងសើរើពិនិត្យចំពោះស្ថាប័នសារព័ត៌មានណា ដែលមិនឆ្លើយតបទៅនឹងការអំពាវនាវនេះ ដោយការប្រើប្រាស់ពាក្យដូចដែលបានលើកមកខាងលើ ដែលបង្កបនូវអត្ថន័យ និងខ្លឹមសារប្រឆាំងនិងសុឆន្ទៈប្រជាជនកម្ពុជា។ នេះជាការបញ្ជាក់របស់លោក ផៃ ស៊ីផាន។

កាលពីថ្ងៃទី១៧ មករា សម្ដេច ស ខេង រដ្ឋមន្ត្រីក្រសួងមហាផ្ទៃ ក៏បានប្រតិកម្មចំពោះអ្នកប្រើប្រាស់ពាក្យ«របបក្រុងភ្នំពេញ និងរបបលោក ហ៊ុន សែន» នេះដែរ។ សម្ដេច ស ខេង ចាត់ទុកអ្នកប្រើប្រាស់ពាក្យនេះ គឺមិនគោរពឆន្ទៈរបស់ប្រជាពលរដ្ឋខ្មែរ ដែលបានចេញទៅបោះឆ្នោតរហូតដល់៨៣ភាគរយ៕