កីឡាជាតិ
ជាតិ
បន្ថែមលើកីឡាករចាស់របស់ខ្លួន ណាហ្គាវើល មាន Amir Gurbani ជាកម្លាំងថ្មី
× ក្លិបបាល់ទាត់ណាហ្គាវើល កាលពីថ្ងៃទី១៦ ខែមករា បានបង្ហាញសមាសភាពកីឡាករបរទេសចំនួន៤រូប ដើម្បីត្រៀមប្រជែងក្នុងពានរង្វាន់ក្របខណ្ឌមិត្តហ្វូនខេមបូឌានលីករដូវកាលថ្មី។ ក្នុងចំណោមកីឡាករទាំងនេះ មានទាំងកីឡាករចំណូលថ្មី ទើបបន្តកិច្ចសន្យា និងអតីតកីឡាករដែលធ្លាប់រួមរស់ជាមួយក្លិបនេះ។
កីឡាករទាំង៤រូបនោះរួមមានខ្សែប្រយុទ្ធ Atuheire Kipson, Esoh Paul Omogba, ខ្សែការពារ Anderson Zogbe និងខ្សែបម្រើ Amir Gurbani។
ខ្សែប្រយុទ្ធ Atuheire Kipson ដែលជាម្ចាស់ស្បែកជើងមាសឆ្នាំ២០១៧ និង Esoh Paul Omogba ជាអតីតកីឡាកររបស់ណាហ្គាវើលក្នុងអំឡុងរដូវកាលឆ្នាំ២០១៧ ។ ចំណែកខ្សែការពារកូតឌីវ័រ Anderson Zogbe ទើបបន្តកិច្ចសន្យា និងខ្សែបម្រើតួកម៉េនីស្ថាន Amir Gurbani ជាកីឡាករចំណូលថ្មី ដែលទើបចុះកិច្ចសន្យានាំចូល។
ខ្សែប្រយុទ្ធរវ៉ាន់ដា Atuheire Kipson ធ្លាប់ចំណាយពេលរួមរស់ជាមួយណាហ្គាវើល កាលពីរដូវកាលឆ្នាំ២០១៧ មុនរូបគេផ្លាស់ផ្ទេរទៅកាន់ក្លិបលំដាប់ទី២ របស់ម៉ាឡេស៊ី Universiti Kebangsaan Malaysia នៅឆ្នាំ២០១៨។ ក្នុងអំឡុងពេលរួមរស់ជាមួយណាហ្គា កីឡាករវ័យ២៥ឆ្នាំរូបនេះ បង្ហាញខ្លួនបានចំនួន២៣លើក ដោយរកបាន២៨គ្រាប់ ដែលជាគ្រាប់បាល់ជួយឲ្យគេឈ្នះស្បែកជើងមាស។ រូបគេ ក៏ធ្លាប់ចំណាយពេលរួមរស់ជាមួយព្រះខ័នរាជស្វាយរៀងក្នុងឆ្នាំ២០១៦ផងដែរ។
មុនមកចូលរួមជាមួយក្លិបណាហ្គាវើល Amir Gurbani ដែលមានអាយុ៣១ឆ្នាំ បានចំណាយពេល២ឆ្នាំរួមរស់ជាមួយក្លិបក្របខណ្ឌកំពូល កៀហ្ស៊ីស៊ីស្ថាន Dordoi Bishkek ចន្លោះពីឆ្នាំ២០១៧-២០១៩ ក្រោយផ្ទេរពីក្លិប Altyn Asyr FK ទឹកដីកំណើតរបស់ខ្លួន។ កីឡាករកម្ពស់១.៨៧ម៉ែត្ររូបនេះ មិនធ្លាប់ចេញទៅប្រកបអាជីពនៅប្រទេសផ្សេងៗទៀតឡើយ។ ដូច្នេះការមកកាន់ទឹកដីកម្ពុជា វាជាលើកទី២របស់គេសម្រាប់ការប្រកបអាជីពក្រៅប្រទេស៕
Tag:
បាល់ទាត់
ណាហ្គាវើល
Cambodian League
© រក្សាសិទ្ធិដោយ thmeythmey.com