ជាតិ
អ្នកជំនាញកំពុងជួសជុលព្រះពុទ្ធរូបពីរអង្គសម័យក្រោយអង្គរ រូបពីក្រសួងវប្បធម៌ និងវិចិត្រសិល្បៈ
× ភ្នំពេញ៖ អ្នកជំនាញអភិរក្សថ្មនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការរបស់អាជ្ញាធរជាតិអប្សរា កំពុងជួសជុលព្រះពុទ្ធរូបពីរអង្គសម័យក្រោយអង្គរ នៅប្រាសាទប្រែរូប។
ក្រុមអ្នកជំនាញបានសម្រង់ស្ថានភាពខូចខាត ដោយរកបំណែកព្រះពុទ្ធរូបទាំងពីរអង្គដែលបាត់បង់នោះ យកមកសម្អាត និងផ្គុំបំណែកនោះ ទៅនឹងដងខ្លួនពុទ្ធរូបរួចរាល់ហើយ។ ចំពោះការងារ ត្រូវធ្វើបន្ត គឺការសិក្សាលើសមាសធាតុបន្សំនៃសម្ភារនីមួយៗ ដែលខ្មែរបុរាណយកមកធ្វើពុទ្ធរូប។ នៅពេលនេះក្រុមអ្នកជំនាញរបស់អាជ្ញាធរអប្សរា បានសហការជាមួយស្ថាប័ន GIZ រួមទាំងអ្នកស្រាវជ្រាវកូរ៉េ កំពុងតាមដានវិភាគយ៉ាងលម្អិតតាមជំនាញនីមួយៗ ដើម្បីប្រើប្រាស់បច្ចេកទេស និងសម្ភារដែលមិនប៉ះពាល់ដល់ការជួសជុលព្រះពុទ្ធរូបពីរអង្គសម័យក្រោយអង្គរ នៅប្រាសាទប្រែរូប។
លក្ខណៈសំខាន់ដែលក្រុមអ្នកជំនាញ កំពុងសិក្សានោះ មាន៧ចំណុច ដោយទី១ ត្រូវការសិក្សាពីថ្មភក់ដែលផ្គុំមានច្រើនប្រភេទផ្សេងគ្នា ហើយខ្លះសន្និដ្ឋានថា យកពីប្រាសាទនៅក្នុងតំបន់ ឯខ្លះទៀតមិនដឹងពីប្រភព។ ចំណុចទី២ សិក្សាពីខ្មុកម្រ័ក្សណ៍ដែលខ្មែរបុរាណយកមកប៉ាតលាបលើរូបបដិមា។ សំណាកខ្មុកម្រ័ក្សណ៍និងគ្រឿងលម្អ ក្រុមការងារបានយកទៅពិសោធនៅប្រទេសកូរ៉េ ដើម្បីដឹងពីប្រភពនិងអាយុកាល ដែលបច្ចុប្បន្នកំពុងរង់ចាំលទ្ធផល។
ចំណុចទី៣ សិក្សាពីពហុវណ្ណភាព (ពណ៌ចម្រុះ) ដែលមានទឹកពណ៌មាស និងក្រហមជាដើម ដែលមិនទាន់ដឹងថាខ្មែរបុរាណយកមកពីប្រទេសចិន ប្រទេសជិតខាង ឬផលិតខ្លួនឯង។ រីឯទី៤ ទាក់ទងនឹងកំបោរបាយអរម្រ័ក្សណ៍៖ ពាសបាយអរដើម្បីភ្ជិតកន្លែងប្រហោង ហើយលាបម្រ័ក្សណ៍ពីលើរូប។ ដោយឡែកទី៥ អំពីដែក៖ មានមូល ស្រួច ទាល ជ្រុង ដែលយកមកធ្វើជន្លួញ ធ្វើខ្ចាប់ដើម្បីតដុំថ្មពីមួយទៅមួយទៀត ក្នុងការធ្វើរូបបដិមា ហើយមានគុណភាពល្អ ប្រើបានយូរ។ ចំណុចទី៦ អំពីឈើ៖ ធ្វើជាស្នៀត ពន្លួញឈើដើម្បីតថ្ម និងចុងក្រោយ គឺគ្រឿងលម្អ៖ នៅលើស្បង់ចីវរ ខ្សែក្រវ៉ាត់មានលម្អដោយសំបកសិប្បីសត្វយ៉ាងស្រស់ស្អាត។
សូមបញ្ជាក់ថា ពុទ្ធបដិមាទាំងពីរអង្គនៅប្រាង្គកណ្ដាលប្រាសាទប្រែរូប គឺបានបាត់បង់ព្រះសីសៈ(ក្បាល) ព្រះហស្តទាំងស្រុង និងដាច់ត្រឹមកជើង។ បដិមាព្រះពុទ្ធទាំងពីរអង្គធ្វើពីថ្មភក់ក្នុងរចនាបទបាយ័ន ទ្រង់ឈរក្នុងកាយវិការអភ័យមុទ្រៈលម្អដោយខ្មុកនិងម្រ័ក្សណ៍ មានក្បាច់បិទលម្អដោយគ្រឿងសិប្បីសត្វថែមទៀត។ បើតាមលក្ខណៈសម្គាល់ខាងផ្នែកក្បាច់លម្អនិងរចនាបទបង្ហាញថា ព្រះពុទ្ធរូបទាំងពីរអង្គប្រហែលជាធ្វើឡើងក្នុងសម័យកណ្ដាល (ស.វ ទី១៥-១៦) ជាសម័យដែលខ្មែរងាកមកគោរពព្រះពុទ្ធសាសនាថេរវាទវិញ ដ្បិតប្រាសាទនេះដើមឡើងគឺសាងឧទ្ទិសដល់ព្រហ្មញ្ញសាសនា។ បច្ចុប្បន្នប្រជាជននៅជុំវិញប្រាសាទ តែងតែមកបន់ស្រន់សុំទឹកភ្លៀង និងបានហៅពុទ្ធបដិមាទាំងពីរអង្គនេះថា «លោកតាសៅ»៕
Tag:
ព្រះពុទ្ធរូប
ប្រាសាទបុរាណ
ក្រសួងវប្បធម៌ និងវិចិត្រសិល្បៈ
© រក្សាសិទ្ធិដោយ thmeythmey.com