អត្ថបទពាណិជ្ជកម្ម
ក្រុមហ៊ុនផលិតផល AngkorMilk រៀបចំកម្មវិធីជួបជុំប្រចាំឆ្នាំជាមួយដៃគូធុរកិច្ចរបស់ខ្លួន ដើម្បីសាទរជោគជ័យមួយឆ្នាំកន្លងមក
× ភ្នំពេញ៖ នៅថ្ងៃទី១៩ខែមករាឆ្នាំ២០១៩ នៅសណ្ឋាគារសូហ្វីតែល ក្រុមហ៊ុនអង្គរឌែរី ប្រដាក់ខូអិលធីឌី បានប្រារព្ធពិធីជួបជុំដៃគូធុរកិច្ចរបស់ខ្លួនពីគ្រប់បណ្ដារាជធានីខេត្តទូទាំងប្រទេស ក្នុងគោលបំណងជួបជុំសំណេះសំណាល និងអបអរសាទរសមិទ្ធផលដ៏ល្អដែលទទួលបានក្នុងឆ្នាំ២០១៨កន្លងមក ព្រមទាំងបង្ហាញគោលដៅ និងយុទ្ធសាស្ត្រសំខាន់ៗរបស់ក្រុមហ៊ុនសម្រាប់ឆ្នាំ២០១៩ ។
លោក កុយ សុវណ្ណ នាយកផ្នែកលក់ និងទីផ្សាររបស់ក្រុមហ៊ុនអង្គរឌែរី បានថ្លែងថា៖«ក្រោយពីដំណើរអស់រយៈពេលពីរឆ្នាំ ឃើញថាចំណែកទីផ្សារ និងចង្វាក់ផលិតកម្ម មានការកើនឡើង ពិសេសក្នុងឆ្នាំ២០១៨ កន្លងមកនេះ គួរឲ្យកត់សម្គាល់។ ជាក់ស្ដែងទឹកដោះគោរាវ អាចផលិតបាន ២៣លានលីត្រក្នុងមួយឆ្នាំ ហើយក្នុងឆ្នាំ២០១៨នេះ យើងបានបន្ថែមចង្វាក់ផលិតកម្មដល់ ៤៦លានលីត្រ ហើយរំពឹងថាបរិមាណនេះនឹងកើនដល់ ១០០លានលីត្រនៅឆ្នាំ២០១៩នេះ ដើម្បីបំពេញសេចក្ដីត្រូវការទីផ្សារ។ ចំណែកទឹកដោះគោខាប់ យើងអាចផលិតបាន ៨០លានកំប៉ុងក្នុងមួយឆ្នាំ ហើយយ៉ាអួប្រមាណ ៧៤លានកំប៉ុងក្នុងមួយឆ្នាំ ដោយសារកំណើនសេដ្ឋកិច្ច កម្លាំងទីផ្សារយ៉ាអួនឹងកើនឡើងពីរដងនៅឆ្នាំ២០១៩»។
បើតាមលោក កុយ សុវណ្ណ ក្រុមហ៊ុនអង្គរមីលបានផ្ដល់ការងារប្រមាណ ៣៥០នាក់ និងត្រូវបង្កើន ៥០០នាក់ក្នុងចង្វាក់ផលិត ហើយបណ្ដាញចែកចាយអាចកើនពី ១៥០០០គ្រួសារ ទៅ ២៥០០០គ្រួសារ។
«ដោយសារមានភាពជោគជ័យក្នុងប្រតិបត្តិការទីផ្សារ និងការទទួលបានចំណែកទីផ្សារដ៏លើសលុប លើសក្ដីរំពឹង ដូចនេះយើងរៀបចំពិធីនេះឡើងដើម្បីថ្លែងអំណរដល់ដៃគូសហការ និងការគាំទ្រផលិតផលរបស់យើងនៅទូទាំងប្រទេស»។ នេះបើតាមការលើកឡើងរបស់លោក កុយ សុវណ្ណ ។
បន្ថែមពីនេះបើតាមលោក កុយ សុវណ្ណ ក្រុមហ៊ុនអង្គរឌែរី បានរួមចំណែកលើកិច្ចការសង្គម ដោយកាលពីឆ្នាំ២០១៧ ក្រុមហ៊ុនចែកទឹកដោះគោដល់សិស្សានុសិស្សទូទាំងប្រទេសចំនួនជិត ២០០សាលារៀន ហើយក្រុមហ៊ុនក៏មានកម្មវិធីទទួលសិស្សនិស្សិតទៅទស្សនកិច្ចនៅរោងចក្ររបស់ខ្លួនផងដែរ។
រោងចក្រអង្គរឌែរីទទួលបានវិញ្ញាបណ្ណបត្រសមាជិកក្រុមធុរកិច្ចជនល្អបំផុតពីអគ្គនាយកដ្ឋានគយ និងរដ្ឋាករកម្ពុជា ដែលបញ្ជាក់ពីការតាំងចិត្តចូលរួមបង់ពន្ធជូនរដ្ឋដ៏ឆ្នើម។ បច្ចុប្បន្នរោងចក្របាផលិតផលិតផលទឹកដោះគោចំនួន ១៥ប្រភេទ ដូចជា ទឹកដោះគោខាប់ក្បាលគោ ទឹកដោះគោខាប់ខមមែនឌឺ ទឹកដោះគោបឺត ADM ទឹកដោះគោស្រស់ហ្វ៊ីណូ យ៉ាអ៊ួរអង្គរមីល ទឹកដោះគោជូរអង្គរមីលរស់ជាតិស្ត្រប៊ឺរី និងទឹកសណ្ដែកអង្គរមីល។ ក្នុងឆ្នាំ២០១៩នេះ រោងចក្រនឹងបង្កើនផលិតផលទឹកដោះគោចំនួន៦ប្រភេទទៀត ដើម្បីពង្រឹងការប្រកួតប្រជែង និងកាន់កាប់ចំណែកទីផ្សារកាន់តែធំជូនដល់ដៃគូធុរកិច្ច។
ក្រុមហ៊ុនអង្គរឌែរី សន្យាថានឹងអភិវឌ្ឍន៍ផលិតរបស់ខ្លួនបន្ថែមទៀត ដើម្បីបំពេញសេចក្ដីត្រូវការក្នុងទីផ្សារ បង្កើតការងារ និងរួមចំណែកអភិវឌ្ឍន៍សេដ្ឋកិច្ច។ បន្ថែមពីនេះ ក្រុមហ៊ុនសង្ឃឹមយ៉ាងមុតមាំថា ដៃគូធុរកិច្ច បណ្ដាញចែកចាយ កាន់តែមានភាពជឿជាក់ចំពោះក្រុមហ៊ុន ពង្រឹងកិច្ចសហការ ដើម្បីឲ្យផលិតរបស់ក្រុមហ៊ុនកាន់តែទទួលបានការចាប់អារម្មណ៍នៅលើទីផ្សារ៕
© រក្សាសិទ្ធិដោយ thmeythmey.com