ពីនេះ ពីនោះ
×![]()
ដោយ: គី ចំណា
បដិវត្តន៍ឧស្សាហកម្មបានក្លាយជាផ្នែកមួយដ៏សំខាន់នៃប្រវត្តិសាស្ត្រមនុស្សជាតិ។ ការចាប់កំណើតនៃឧស្សាហកម្មក្នុងរយៈពេលជិត៤០០ឆ្នាំមកនេះ បានធ្វើឲ្យមានការផ្លាស់ប្តូរយ៉ាងច្រើនជាពិសេសការរស់នៅប្រជាជនក្នុងពិភពលោកតែម្តង។ បើតាមការដកស្រង់ពីគេហទំព័រ sentryo.net បដិវត្តន៍ឧស្សាហកម្មត្រូវបានបែងចែកជាបួនដំណាក់កាលធំៗដូចខាងក្រោម៖
១.ដំណាក់កាលទីមួយ នៅឆ្នាំ១៧៦៥
ជាពេលចាប់កំណើតរបស់ម៉ាស៊ីនដើរដោយចំហាយទឹក។ នេះជាទេពកោសល្យដ៏មហាសាលរបស់អ្នកប្រាជ្ញអ៊ឺរ៉ុប ដែលបានបង្កើតម៉ាស៊ីនមិនដែលមានពីមុនមក។ គេបានប្រើប្រាស់វាក្នុងនាវាដឹកជញ្ជួន រថភ្លើងធំៗ និងរោងចក្រជាច្រើនដទៃទៀត។ វាបានធ្វើឲ្យដំណើររុករកតាមផ្លូវទឹក ការផ្លាស់ប្តូរទំនិញតាមផ្លូវដែក មានភាពងាយស្រួលយ៉ាងខ្លាំង។ រោងចក្រអាចផលិតទំនិញបានច្រើនជាងមុន ហើយមនុស្សអាចផ្លាស់ប្តូរទីកន្លែងរស់នៅបានឆាប់រយៈ នាំឲ្យមានការរីកដុះដាលនូវទីក្រុងថ្មីៗជាច្រើន។
២.ដំណាក់កាលទីពីនៅឆ្នាំ១៨៧០
ការកកើតនូវភ្លើងអគ្គីសនីដែលមានតម្លៃទាប និងប្រើប្រាស់បានដោយមនុស្សទូទៅ។ ការលេចឡើងនូវវិធីសាស្ត្រក្នុងការប្រើប្រាស់ប្រេងសាំង ជីវឧស្ម័ន ជៀសជាងធ្យូងថ្ម។ ការចម្រាញ់រ៉ែដែកក្នុងទ្រង់ទ្រាយធំ បោះជំនាញដល់ការផលិតរថយន្តដែលងាយស្រួលប្រើប្រាស់ដំបូង មានដូចជា Ford Model T ក្នុងឆ្នាំដើមឆ្នាំ១៩០០។ ការបង្កើតខ្សែតេលេក្រាមដំបូងសម្រាប់ទំនាក់ទំនង។
៣. ដំណាក់កាលទី៣ នៅឆ្នាំ១៩៦៩
ការបង្កើតនូវថាមពលនុយក្លេអ៊ែរ ឧបករណ៍អេឡិចត្រូនិច មានដូចជា ត្រង់ស៊ីស្ទ័រ Microprocessors, ប្រព័ន្ធទូរគមនាគមន៍ ដែលមានទូរសព្ទចល័តដំបូង Motorola ក្នុងអំឡុងឆ្នាំ១៩៨០ និងកុំព្យូទ័រ Macintosh របស់ Apple ក្នុងពេលជាមួយគ្នា។ ជារួមគឺជាពេលវេលាដែលបច្ចេកវិទ្យាមានទំហំតូចទៅៗ សម្រាប់ភាពងាយស្រួលក្នុងការប្រើប្រាស់របស់មនុស្សទូទៅ។
៤.ដំណាក់កាលទី៤ នៅពេលបច្ចុប្បន្ន
ការចាក់បញ្ចូលគ្នារវាងពិភពឌីជីថល និងពិភពពិត។ ក្នុងនោះមានដូចជា អ៊ីនធឺណិតល្បឿនលឿន ទិន្នន័យអេឡិចត្រូនិច (Data) ប្រព័ន្ធស្វ័យប្រវត្តិទំនើបក្នុងកន្លែងការងារ (Automation) និង បញ្ញាសិប្បនិម្មិត(Artificial Intelligence)ឬអាចនិយាយថា ភាពឆ្លាតវ័យរបស់កុំព្យទ័រដែលជួយសម្រួលការងាររបស់មនុស្ស។ បច្ចេកវិទ្យាចុងក្រោយនេះ កំពុងតែស្ថិតនៅក្នុងជំហានដំបូង។ ទាំងអស់គ្នាអាចនឹងឃើញការលូតលាស់របស់វាក្នុងរយៈពេលប៉ុន្មានឆ្នាំខាងមុខ៕
Tag:
បដិវត្តន៍ឧស្សាហកម្ម
ពិភពលោក
© រក្សាសិទ្ធិដោយ thmeythmey.com
