កីឡាអន្តរជាតិ
អន្តរជាតិ
Pacquiao ប្រាប់ឲ្យ Floyd ចេញពីការចូលនិវត្តន៍ដើម្បីឡើងសង្វៀនវាយគ្នាម្តងទៀត
× Manny Pacquiao បបួល Floyd Mayweather ឲ្យបញ្ចប់ខ្លួនពីការចូលនិវត្តន៍ដើម្បីឡើងសង្វៀនវាយគ្នាម្តងទៀត បន្ទាប់ពីរូបគេបានយកឈ្នះកីឡាករអាមេរិក Adrienne Broner ដោយពិន្ទុ នាការប្រកួតដណ្តើមខ្សែក្រវាត់ទម្ងន់មធ្យមពិភពលោក WBA នៅថ្ងៃទី២០ ខែមករា នៅសង្វៀន MGM Grand Garden Arena ក្នុងទីក្រុងឡាសវេហ្កាស សហរដ្ឋអាមេរិក។
ជ័យជម្នះរបស់ស្តេចប្រដាល់ហ្វីលីពីនលើកនេះ បាននាំឲ្យរូបគេរក្សាកំណត់ត្រាឈ្នះ៦១ដងក្នុងចំណោម៧០ប្រកួត និងជាការការពារខ្សែក្រវាត់ WBA របស់គេលើកដំបូង បន្ទាប់ពីដណ្តើមបានពីអ្នកប្រដាល់អាហ្សង់ទីន Lucas Matthysse កាលពីឆ្នាំមុន។
បើទោះឈ្នះលើកីឡាករ Broner ក្តី ប៉ុន្តែនៅលើសង្វៀនអំឡុងឆ្លើយសំណួររបស់ពិធីករ Pacquiao បានបង្វែរការចាប់អារម្មណ៍ទៅកាន់ដៃគូចាស់របស់គេគឺ Mayweather ឯណោះវិញ និងថែមទាំងបបួលឡើងប្រកួតសងសឹកជាមួយខ្លួនថែមទៀត ខណៈដែលកំពូលអ្នកប្រដាល់មិនដែលចាញ់របស់អាមេរិកក៏មានវត្តមាននៅទីនោះដែរ។
«ត្រឡប់មកកាន់សង្វៀនវិញមក ហើយយើងនឹងប្រកួតគ្នាម្តងទៀត ប្រសិនបើគេចង់»។ Pacquiao និយាយសំដៅទៅ Floyd បែបនេះ។
សមាជិកព្រឹទ្ធសភាហ្វីលីពីន វ័យ៤០ឆ្នាំបន្ថែមថា៖«ប្រសិនបើគាត់ (Floyd) ចង់ចាកចេញពីការចូលនិវត្តន៍នោះ មកវាយជាមួយខ្ញុំមក។ ខ្ញុំជាម្ចាស់ជើងឯក ហើយខ្ញុំមិនប្រកួតជាមួយអ្នកណាផ្សេងឡើយ។ សាររបស់ខ្ញុំខាងលើនេះគឺនៅតែទុកជាការបានរហូត ប្រសិនបើគាត់វិលត្រលប់មកកាន់សង្វៀនដើម្បីប្រកួតប្រជែងខ្ញុំដែលជាជើងឯក។ ខ្ញុំនៅរង់ចាំមើលថាតើនរណានឹងឡើងមកប្រកួតដណ្តើមខ្សែក្រវាត់របស់ខ្ញុំ»។
Pacquiao បានចាញ់ Floyd ដោយពិន្ទុឯកច្ឆន្ទ នាជំនួបនៃព្រឹត្តិការណ៍ «The Fight of the Century» នៅសង្វៀន MGM Grand Garden Arena ក្នុងទីក្រុងឡាសវេហ្កាស សហរដ្ឋអាមេរិក កាលពីខែឧសភា ឆ្នាំ ២០១៥។
អ្នកប្រដាល់មិនដែលស្គាល់ចាញ់របស់អាមេរិកដែលបច្ចុប្បន្នមានវ័យ៤១ឆ្នាំ ធ្លាប់បានប្រកាសចូលនិវត្តន៍ពីអាជីពជាអ្នកប្រដាល់របស់គេក្រោយពីទទួលបានកំណត់ត្រាប្រកួត៥០ ឈ្នះទាំង៥០ដង ជាមួយនឹងជ័យជម្នះចុងក្រោយលើកីឡាករវាយក្នុងទ្រុង Conor McGegor នៅខែសីហា ឆ្នាំ២០១៧។
តើ Floyd ពិតជាព្រមឡើងសង្វៀនតាមការបបួលរបស់ដៃគូដ៏ល្អរបស់គេ Pacquiao ដែរឬទេ?
Tag:
ប្រដាល់
Manny Pacquiao
Floyd Mayweather
Adrienne Broner
© រក្សាសិទ្ធិដោយ thmeythmey.com