ភ្នំពេញ៖ ឌីជេ ណាណា (DJ NaNa) ឈ្មោះដើម នាង សុវាត់នា ជាស្ត្រីម្នាក់កំពុងលេចធ្លោក្នុងសង្គម។ ជាមនុស្សរួសរាយរាក់ទាក់ រួមជាមួយភាពជឿជាក់ពោរពេញដោយថាមពល នារីវ័យ៣៣ឆ្នាំរូបនេះ ដើរតួនាទីយ៉ាងសំខាន់ក្នុងការផ្តល់ចំណេះដឹង ការលើកទឹកចិត្តស្ត្រី និងយុវ័យឲ្យក្លាហាន,ចេះគិតគូរ និងពិចារណាឲ្យបានវែងឆ្ងាយ។ តាមរយៈគំនិតសេរីនិយម នាងក៏ជំរុញឲ្យអ្នកគាំទ្រ ហ៊ានធ្វើអ្វីដែលខ្លួនឯងយល់ថាត្រឹមត្រូវដែរ។
ជាកូនស្រីច្បង ក្នុងចំណោមបងប្អូន៤នាក់ សុវាត់នា ជាអ្នករ៉ាប់រងអម្រែកមួយដើម្បីជួយសម្រាលបន្ទុកក្នុងគ្រួសារ ដែលមានឪពុកជាមន្ត្រីអង្គការសង្គមស៊ីវិល និងម្តាយកាលណោះជាអ្នកលក់ដូរ។ ដូច្នេះគ្រប់កាលៈទេសៈនៃដំណើរជីវិតរបស់យុវតីដែលមានវោហារចាក់ទឹកមិនលិចរូបនេះ ចាត់ទុករឿងការងារ រកចំណូលបន្ថែមគឺជារឿងអាទិភាពជានិច្ច។
ក្រោយរៀនចប់បាក់ឌុប សុវាត់នា បានផ្តើមការងារជាជំនួយការគម្រោងនៅក្នុងអង្គការអន្តរជាតិមួយ ដែលជាផ្នែកមួយនៃចំណូលដែលផ្គត់ផ្គង់ការរៀនបន្តរបស់ខ្លួននៅសាកលវិទ្យាល័យផងដែរ។ ទោះមានការងារពេញម៉ោងពេលថ្ងៃ និងរៀនពេលយប់ ដែលស្ទើរគ្មានពេលសម្រាកក៏ដោយ តែយុវតីរូបនេះ មិនស្កប់ស្កល់ចិត្តឡើយ ដោយសារតែនាងមើលឃើញឱកាសរកប្រាក់ចំណូលបន្ថែម។
នៅឆ្នាំ២០០៩ គ្រាដែលខ្លួន មានវ័យ២២ឆ្នាំ នាងបានក្លាយជាអ្នកដោះស្រាយនៅក្នុងកម្មវិធីវិទ្យុ ហើយចាប់តាំងពីពេលនោះមក អ្នកខេត្តកំពង់ចាមរួបនេះ ទទួលបានរហស្សនាមថ្មីគឺ ឌីជេ ណាណា មកដល់បច្ចុប្បន្ន។ ឌីជេ ណាណា រំឭកដូច្នេះថា៖«កាលណោះមានគេពឹងខ្ញុំឲ្យជួយរកពិធីការិនីដែលអាចនិយាយកម្មវិធីវិទ្យុ ម៉ោង៨-៩យប់ប៉ុន្តែខ្ញុំរកអត់បាន។ អ៊ីចឹងខ្ញុំក៏ប្រាប់គេថាខ្ញុំចាប់អារម្មណ៍ បើទោះជាកាលណោះខ្ញុំរៀនវេនយប់ចប់ម៉ោង៨កន្លះក៏ដោយ ព្រោះសម្រាប់ខ្ញុំដោយសារបញ្ហាជីវភាព និងទំនួលខុសត្រូវ ការងារគឺជាអាទិភាពជានិច្ច។
ពេលសម្ភាសទើបខ្ញុំដឹងថា វាជាកម្មវិធីដោះស្រាយវិបត្តិ ហើយកម្មវិធី គេហៅទូរសព្ទសួររឿងវិបត្តិរបស់គេ ក៏ចេះតែឆ្លើយៗទៅកាលហ្នុង ដល់អីចឹងទៅក៏ចេញទៅជាអ្នកដោះស្រាយវិបត្តិអីចឹងទៅ»។
ជាការងារដែលបានមកដោយចៃដន្យ ប៉ុន្តែវាបានបើកផ្លូវឲ្យរូបនាងរកឃើញសក្តានុពលវោហារសព្ទរបស់ខ្លួន និងកសាងកេរ្តិ៍ឈ្មោះ ឈានទៅចាប់យកអាជីពផ្សេងៗទៀត ដូចជាពិធីការិនីឯករាជ្យ អ្នកប្រឹក្សាយោបល់ អ្នកសិល្បៈ និងជាអ្នកជំនួញជាដើម។
ចេះក្តាប់ឱកាស និងប្រើប្រាស់វាឲ្យអស់លទ្ធភាព
ឌីជេ ណាណា អះអាងអមដោយកាយវិការយ៉ាងស្វាហាប់ថា ខ្លួនជាមនុស្សដែលចាប់យកគ្រប់ឱកាស និងព្យាយាមប្រើប្រាស់វាសម្រាប់ជាប្រយោជន៍ដល់អ្នកគាំទ្ររបស់ខ្លួនដែរ។ ស្របពេលដែលបច្ចេកវិទ្យា កាន់តែរីកចម្រើន ហើយនិន្នាការនៃការប្រើប្រាស់បណ្តាញសង្គមក៏កាន់តែទូលាយ ឌីជេណាណា បានប្រើប្រាស់ទំព័រហ្វេសប៊ុកទាំងពីរគឺ DJ Nana TV និង DJ NanaTips ដែលមានអ្នកគាំទ្រសរុបជាង១លាន ជាមធ្យោបាយក្នុងការរកចំណូលផង និងជាពិសេសបណ្តុះគំនិតវិជ្ជមានទៅកាន់អ្នកគាំទ្ររបស់ខ្លួន។ ណាណា បញ្ជាក់ដូច្នេះ៖ «មានរឿងក្នុងសង្គមច្រើនណាស់ដែលខ្ញុំទើស ប៉ុន្តែជាមនុស្សដែលគិតថាខ្ញុំអាចធ្វើអ្វីបាន។ ខ្ញុំអត់សួរថាអ្នកណាផ្សេងធ្វើអ្វីបានទេ។ បើខ្ញុំទើសអ្វី ខ្ញុំធ្វើហ្នឹង។ គ្រប់ការងាររបស់ខ្ញុំទាំងអស់ វាកើតឡើងគឺគ្រាន់តែចង់បង្កើនចំណូលសម្រាប់ខ្លួនឯង ប៉ុន្តែបើវាជារបរដែលយើងរកលុយបាន ហើយយើងជួយគេបានទៀត ឲ្យគេសប្បាយចិត្តទៀត មិនល្អទាំងអស់គ្នា។ យើងជួយគេបានម្នាក់ ប្រសើរជាងអត់សោះ។ ជួយបាន៥នាក់ប្រសើរជាងម្នាក់។ ជួយបានកាន់តែច្រើន កាន់តែល្អ ជួយតាមលទ្ធភាព»។
សូមលោកអ្នកស្តាប់កិច្ចសម្ភាស រវាង កញ្ញា ខន ចំប៉ា នៃសារព័ត៌មានថ្មីៗ និង Dj Nana ខាងក្រោមនេះ៖
ទោះជាមិនមានតួលេខជាក់ស្តែង បញ្ជាក់ថាគំនិតសេរីនិយមរបស់ខ្លួន រយៈពេលប្រមាណ១០ឆ្នាំមកនេះ បានជ្រួតជ្រាបដល់អ្នកគាំទ្ររបស់ខ្លួនបានកម្រិតណា ប៉ុន្តែអ្នកប្រឹក្សាយោបល់រូបនេះ មើលឃើញមាននិន្នាការផ្លាស់ប្តូរ។ ណាណា មើលឃើញថា ស្ត្រីមានភាពក្លាហានជាងមុន ចេះគិតគូរ ពិចារណាវែងឆ្ងាយជាងមុន។ ជាក់ស្តែង នៅក្នុងកម្មវិធីប្រឹក្សាដែលណាណាកំពុងធ្វើរាល់ថ្ងៃ ប្រិយមិត្តជាដែលបានទូរសព្ទចូលរួម ស្ទើរតែ៩៩ភាគរយ សួរនាំពីរឿងការងារ និងការសិក្សា និងបញ្ហាផ្សេងៗទៀត។ និន្នាការនេះ គឺផ្ទុយស្រឡះពីពេលដែលណាណាប្រឡូកនឹងការដោះស្រាយវិបត្តិដំបូងៗ ដែលមានប្រិយមិត្តស្ទើរទាំងអស់សួររឿងស្នេហានោះ។ ណាណា ចាត់ទុកការផ្លាស់ប្តូរនេះ គឺជារឿងដ៏វិជ្ជមានមួយ ហើយនាងក៏ត្រេកអរណាស់ដែរ ដែលខ្លួនបានរួមចំណែកដ៏ស្តួចស្តើងក្នុងការបញ្ជ្រាបការគិតបែបវិជ្ជមាននៅក្នុងសង្គម។
មនុស្សស្រី គួរតែមានគោលការណ៍ដោយខ្លួនឯង ហើយកំណត់ដោយខ្លួនឯង
បើទោះបីជា ក្នុងសម័យសាកលភាវូបនីយកម្មនេះ ស្ត្រីមានឱកាសច្រើនប៉ុន្តែ ក៏នៅមានស្ត្រីជាច្រើនទៀតដែរ ដែលមិនទាន់ចេះក្តោបក្តាប់ឱកាស និងប្រើប្រាស់វាជាប្រយោជន៍សម្រាប់ជីវិត។ បញ្ហាដែលធ្វើឲ្យអ្នកផ្តល់ប្រឹក្សាដែលមានថ្វីមាត់ ណាណា មិនសប្បាយចិត្ត គឺពួកគាត់បានអនុញ្ញាតឲ្យអ្នកនៅជុំវិញខ្លួន ជាអ្នកកំណត់ឱកាស កំណត់ការគិតជំនួសខ្លួនទៅទៀត។
ត្រង់ចំណុចនេះ ណាណា ហាក់ស្រពោនចិត្តបន្តិច និងប្រែពីទឹកមុខញញឹមជាប់ ទៅជា ទឹកមុខស្មើ រួចទើបបន្តថា មនុស្សស្រីគួរតែមានគោលការណ៍ផ្ទាល់ខ្លួន និងកំណត់វាដោយខ្លួនឯង។ ណាណា បញ្ជាក់ដោយសង្កត់សំដីដូច្នេះ៖« មនុស្សស្រីមួយចំនួន គាត់បាត់បង់ឱកាសដោយសារតែខ្លួនគាត់កំណត់ខ្លួនឯង ថាគាត់អាចធ្វើអ្វីបាន ធ្វើអ្វីមិនបាន។ ខ្ញុំបានមកដល់រាល់ថ្ងៃ ដោយសារតែខ្ញុំមិនសូវស្តាប់អ្នកដទៃ គឺខ្ញុំស្តាប់ខ្លួនឯងច្រើន ហើយខ្ញុំប្រកាន់គោលការណ៍៤ គឺតើវាខុសច្បាប់ឬអត់,ខ្ញុំនិយាយក្នុងចេតនាល្អ និងនិយាយដោយក្តីស្រឡាញ់ និងត្រូវស្ថានភាពឬអត់? ខ្ញុំយល់ថាមនុស្សស្រី គួរតែមានគោលការណ៍ផ្ទាល់ខ្លួន ហើយកំណត់ដោយខ្លួនឯង មិនមែនកំណត់ដោយគេ។ រឿងដែលសំខាន់បំផុតជ្រើសរើសដៃគូជីវិតឲ្យត្រឹមត្រូវ និងរៀនឲ្យបានច្រើន»។
សម្រាប់ណាណា ទោះជាទទួលស្គាល់ថាសំដីរបស់ខ្លួនមានឥទ្ធិពល ប៉ុន្តែវានៅមិនទាន់គ្រប់គ្រាន់ឡើយសម្រាប់សង្គម ដែលមានទស្សនៈអវិជ្ជមានដ៏លើសលប់នេះ។ កម្ពុជាត្រូវការ អ្នកមានឥទ្ធិពលដែលទាំងចំណេះ សុវជីវធម៌ និងគុណធម៌ជាច្រើនទៀត មកចូលរួម បន្ថយគំនិត និងរូបភាពអវិជ្ជមាន៕