កីឡាអន្តរជាតិ
អន្តរជាតិ
មិនទាន់មានតម្រុយឡើយជុំវិញការបាត់យន្តហោះដែលដឹកកីឡាករ Sala
× Emiliano Sala ខ្សែប្រយុទ្ធចំណូលថ្មីរបស់ Cardiff City ដែលស្ថិតនៅលើយន្តហោះធុនស្រាលមួយគ្រឿងបានបាត់នៅលើកោះ Channel Islands ដែលស្ថិតនៅប្រជុំកោះក្នុងតំបន់អឺរ៉ុបចន្លោះពីប្រទេសបារាំងទៅចក្រភពអង់គ្លេស។
ខ្សែប្រយុទ្ធសញ្ជាតិអាហ្សង់ទីនវ័យ២៨ឆ្នាំរូបនេះ គឺជាមនុស្សម្នាក់ក្នុងចំណោមពីរនាក់នៅលើយន្តហោះឯកជនម៉ាក Piper Malibu ដែលបានបាត់ការទាក់ទងនៅលើកោះនោះកាលពីយប់ថ្ងៃចន្ទ ទី២១ ខែមករា ឆ្នាំ២០១៩។
ប៉ូលិសក្នុងតំបន់ដែលស្ថិតលើកោះ Channel Islands នោះ និយាយថាមិនទាន់រកឃើញមានដានអ្វីអំពីយន្តហោះនោះឡើយ ខណៈការស្វែងរកត្រូវបានផ្អាកបណ្តោះអាសន្នសិន។ រីឯកងកម្លាំងប្រចាំតំបន់នោះក៏លើកឡើងដូចគ្នានេះដែរ។
ពួកគេបានអះអាងថា ប្រសិនបើយន្តហោះនោះធ្លាក់ទៅក្នុងទឹក ឱកាសរស់គឺមានតិចតួចប៉ុណ្ណោះ។
Sala ត្រូវបាន Cardiff City ទិញពីក្រុម Nantes ក្នុងតម្លៃឯតទគ្គកម្មក្លិប ១១លានផោន (១៤លានដុល្លារអាមេរិក)។ រូបគេបានធ្វើដំណើរពីប្រទេសបារាំងទៅក្រុង Cardiff ប្រទេសវែលិ៍ ប៉ុន្តែជាអកុសល យន្តហោះដែលរូបគេជិះបានបាត់ការទាក់ទងរហូតមកទល់ពេលនេះ។
ជុំវិញការបាត់ខ្លួននេះ ក្រុមអ្នកគាំទ្ររបស់ក្រុម Nantes នៃលីគកំពូលបារាំងរាប់ពាន់អ្នកបានចេញមកបួងសួងដើម្បីជូនពរឲ្យ Sala មានសុវត្ថិភាព និងមានដំណឹងឆាប់ៗ៕
Tag:
បាល់ទាត់
Emiliano Sala
© រក្សាសិទ្ធិដោយ thmeythmey.com