ជាតិ
ប្រមុខការទូតអាស៊ាន ប្ដេជ្ញាជួយស្វែងរកដំណោះស្រាយដល់មីយ៉ាន់ម៉ា លើបញ្ហារ៉ូហ៊ីងយ៉ា នៅរដ្ឋរ៉ាក់ខាន
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋមន្ត្រីការបរទេសអាស៊ាន ប្តេជ្ញាជួយស្វែងរកដំណោះស្រាយដល់រដ្ឋាភិបាលមីយ៉ាន់ម៉ា លើបញ្ហារ៉ូហ៊ីងយ៉ា នៅរដ្ឋរ៉ាក់ខាន។ ការប្ដេជ្ញារបស់ប្រមុខការទូតទាំងនេះ ធ្វើឡើងបន្ទាប់ពីមេដឹកនាំមីយ៉ាន់ម៉ា បានលើកឡើងពីបញ្ហានេះ នៅក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅប្រទេសថៃ កាលពីថ្ងៃទី១៧-១៨ ខែមករា ។
បញ្ហាដែលរដ្ឋមន្ត្រីការបរទេសអាស៊ានទាំងអស់ បានផ្លាស់ប្តូរយោបល់នោះ គឺផ្ដោតទៅលើបញ្ហាតំបន់ និងអន្តរជាតិ ដែលរួមមានការប្រយុទ្ធប្រឆាំងភេរវកម្ម និងហិង្សាជ្រុលនិយម នៅរដ្ឋរ៉ាក់ខាន ,ឧបទ្វីបកូរ៉េ និងសមុទ្រចិនខាងត្បូងជាដើម។
និយាយដល់បញ្ហាហិង្សានៅតំបន់រ៉ាក់ខាន ប្រទេសមីយ៉ាន់ម៉ា នោះ ប្រមុខការទូតអាស៊ាន សន្យាប្ដេជ្ញាគាំទ្ររដ្ឋាភិបាលមីយ៉ាន់ម៉ា ដើម្បីស្វែងរកដំណោះស្រាយឲ្យបានទូលំទូលាយនិងយូរអង្វែង ដែលនាំមកនូវសន្ដិភាព ស្ថិរភាព ដើម្បីលើកកម្ពស់សុខដុមនីយកម្ម និងការផ្សះផ្សាក្នុងចំណោមសហគមន៍នានា ។ ជាពិសេសធានានូវការអភិវឌ្ឍដោយចីរភាព និងសមធម៌ នៅរដ្ឋរ៉ាក់ខាន នេះ។
តាមរយៈសេចក្តីថ្លែងការណ៍ក្រសួងការបរទេសកម្ពុជា ដែលបានបង្ហាញពីរបាយការណ៍ក្នុងកិច្ចប្រជុំចង្អៀតនោះ បានសរសេរដូច្នេះថា៖«រដ្ឋមន្ដ្រីទាំងអស់ក៏បានផ្លាស់ប្ដូរទស្សនៈ ថាតើអាស៊ានអាចជួយដល់ប្រទេសមីយ៉ាន់ម៉ាយ៉ាងដូចម្តេច និងតួនាទីរបស់មជ្ឈមណ្ឌលសម្របសម្រួលជំនួយមនុស្សធម៌អាស៊ាន ស្តីពីការគ្រប់គ្រងគ្រោះមហន្តរាយ និងភ្នាក់ងារអង្គការសហប្រជាជាតិដទៃទៀត ពាក់ព័ន្ធនឹងបញ្ហានេះ»។
ទាក់ទងនឹងបញ្ហានៅរដ្ឋរ៉ាកខាននេះ ខាងក្រុមសិទ្ធិមនុស្សអង្គការសហប្រជាជាតិបានរកឃើញភស្តុតាងថា វាមានករណីសម្លាប់រង្គាល រំលោភសេពសន្ថវៈ ធ្វើទារុណកម្ម និងដុតបំផ្លាញលំនៅដ្ឋានប្រជាពលរដ្ឋនៅរដ្ឋរ៉ាក់ខាន ដែលអាចចាត់ចូលជាបទឧក្រិដ្ឋប្រឆាំងមនុស្សជាតិនិងប្រល័យពូជសាសន៍។ ស្ថាប័ននេះក៏បានទាមទារឲ្យមានការនាំក្រុមឧត្តមសេនីយ៍យោធាមីយ៉ាន់ម៉ាទៅកាត់ទោស ដើម្បីឆ្លើយតបនឹងការបំពានសិទ្ធិមនុស្សធ្ងន់ធ្ងរលើជនជាតិភាគតិចរ៉ូហ៊ីងយ៉ាងនេះ។ ប៉ុន្តែរដ្ឋាភិបាលមីយ៉ាន់ម៉ាបានទាត់ចោលរបាយការណ៍នោះដោយចាត់ទុកថា វាមានភាពលម្អៀងខ្លាំង។
អត្ថបទទាក់ទង
ដោយសារតែបញ្ហារ៉ូហ៊ីងយ៉ា នៅរដ្ឋរ៉ាកខាននេះហើយ ទើបធ្វើឲ្យសហគមអន្តរជាតិមួយចំនួន អស់ជំនឿចិត្តលើរដ្ឋាភិបាលរបស់លោកស្រី អ៊ុងសាន ស៊ូជី ។ ពួកគេទាំងនោះ ក៏បានដកយកពានរង្វាន់ ដែលធ្លាប់ប្រគល់ឲ្យលោកស្រី ស៊ូជី កាលនៅជាប្រមុខប្រឆាំងមកវិញផងដែរ។ រដ្ឋធានីបារីសបានប្រកាសថា ខ្លួននឹងសម្រេចដក «ពានរង្វាន់សេរីភាពប៉ារីស»ដែលបានប្រគល់ជូនទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី ដើម្បីឆ្លើយតបនឹងភាពស្ងៀមស្ងាត់ និងមិនឈឺឆ្អាលចំពោះការរំលោភបំពានសិទ្ធិមនុស្សនៅរដ្ឋរ៉ាក់ខានប្រឆាំងប្រជាជនឥស្លាមរ៉ូហ៊ីងយ៉ា។ ចំណែកមូលនិធិសិទ្ធិមនុស្សដ៏ធំមួយកូរ៉េខាងត្បូង ក៏បានប្រកាសដកហូតពានរង្វាន់របស់លោកស្រី អ៊ុងសាន ស៊ូជី ដែលខ្លួនបានផ្តល់ឲ្យកាលពីឆ្នាំ២០០៤កន្លងទៅដែរ។
តាមពិតទៅលោក ស្រី អ៊ុងសាន ស៊ូជី ត្រូវបានគេចាត់ទុកជានិមិត្តរូបនៃប្រជាធិបតេយ្យដែលដឹកនាំបក្សប្រឆាំងសម្ព័ន្ធជាតិដើម្បីប្រជាធិបតេយ្យរបស់ខ្លួនក្នុងជំនាន់ឆ្នាំ ១៩៩០ ប្រឆាំងនឹងរបបដឹកនាំយោធា និងត្រូវបានតែងតាំងជាទីប្រឹក្សារដ្ឋជាផ្លូវការក្រោយបក្សលោកស្រីឈ្នះឆ្នោតភ្លូកទឹកភ្លូកដីក្នុងឆ្នាំ ២០១៥ ។ ប៉ុន្តែលោកស្រីរងការថ្កោលទោសពីសំណាក់លោកខាងលិចដោយសារភាពស្ងៀមស្ងាត់ និងគ្មានសកម្មភាពចំពោះការបំពារបំពានសិទ្ធិមនុស្សប្រឆាំងជនជាតិរ៉ូហ៊ីងយ៉ានៅរដ្ឋរ៉ាក់ខានកន្លងមកនេះ៕
Tag:
អាស៊ាន
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com
