Ronaldo ព្រមបង់ពន្ធ២១លានដុល្លារឲ្យអាជ្ញាធរអេស្ប៉ាញដើម្បីបញ្ចប់ក្តី

កីឡាអន្តរជាតិ

អន្តរជាតិ

Ronaldo ព្រមបង់ពន្ធ២១លានដុល្លារឲ្យអាជ្ញាធរអេស្ប៉ាញដើម្បីបញ្ចប់ក្តី

23, Jan 2019 , 1:46 pm

រូបភាព

ដោយ: ទេព ពិទូរ្យ

ខ្សែប្រយុទ្ធឆ្នើម Cristiano Ronaldo យល់ព្រមបង់ប្រាក់យ៉ាងច្រើនសន្ធឹករហូតដល់ ១៨,៨ លានអ៊ឺរ៉ូ (២១លានដុល្លារអាមេរិក) ទៅឲ្យអាជ្ញាធរពន្ធដារអេស្ប៉ាញដើម្បីបញ្ចប់ក្តី និងរួចផុតពីការជាប់ពនធនាគាររយៈពេល២ឆ្នាំ ជុំវិញបទចោទបន្លំពន្ធអំឡុងរូបគេស្នាក់នៅជាមួយក្រុម Real Madrid កន្លងមក។

កីឡាករចំណូលថ្មីរបស់ Juventus រូបនេះ រួមទាំងមិត្តស្រីរបស់ខ្លួននាង Georgina Rodriguez បានធ្វើដំណើរទៅកាន់តុលាការនៃប្រទេសអេស្ប៉ាញ ដើម្បីបញ្ចប់ក្តីក្តាំពន្ធដាររបស់ខ្លួនជាច្រើនឆ្នាំមក ដោយរូបគេបង្ហាញខ្លួន ចំពោះមុខព្រះរាជអាជ្ញាតែប៉ុន្មាននាទីប៉ុណ្ណោះ។

អាជ្ញាធរពន្ធដារអេស្ប៉ាញ ក៏បានយល់ព្រមលើកិច្ចព្រមព្រៀងទទួលយកប្រាក់២១លានដុល្លារអាមេរិកនេះ ពីខ្សែប្រយុទ្ធសញ្ជាតិព័រទុយហ្គាល់ ដើម្បីបញ្ចប់ក្តី រួមទាំងអាចគេចផុតពីការកាត់ទោសជាប់ពន្ធនាគាររយៈពេល២៣ខែទៀតផង។

តាមច្បាប់ក្នុងប្រទេសអេស្ប៉ាញ អ្នកជាប់ទោសក្រោមរយៈពេល២ឆ្នាំ សម្រាប់អ្នកមានទោសលើកដំបូង គឺអាចអនុញ្ញាតឲ្យនៅក្រៅឃុំបាន ហើយ Ronaldo ស្ថិតក្នុងលក្ខខណ្ឌបែបនេះ។

អ្នកច្បាប់នៅអេស្ប៉ាញបានប្រាប់បណ្តាសារព័ត៌មានថា អតីតខ្សែប្រយុទ្ធ Real Madrid និង Manchester United វ័យ៣៤ឆ្នាំរូបនេះ មានទោសកំហុសចំនួន៤ករណី ជុំវិញការគេចវេះពីការបង់ពន្ធ។

កន្លងមក ព្រះរាជអាជ្ញាប្រទេសអេស្ប៉ាញបានចោទប្រកាន់ថា អត្តពលិកដែលមានប្រាក់ខែខ្ពស់លើលោកនេះ មិនបានបង់ពន្ធចូលរដ្ឋក្នុងចំនួនទឹកប្រាក់ដ៏ច្រើនគិតចាប់តាំងពីឆ្នាំ ២០១០ មក។

ករណីនេះជាប់ពាក់ព័ន្ធនឹងភាពមិនប្រក្រតីមួយចំនួនដែលទាក់ទងទៅនឹងការទាញយកប្រយោជន៍ពីរចនាសម្ព័ន្ធក្រុមហ៊ុនមួយ ដែលបានបង្កើតនៅឆ្នាំ ២០១០ ដើម្បីលាក់ប្រាក់ចំណូលដែលរកបាននៅអេស្ប៉ាញរបស់ម្ចាស់ពាន Ballon d'Or ៥សម័យកាល ក្នុងចន្លោះឆ្នាំ ២០១០ និងឆ្នាំ ២០១៤ ពោលគឺក្នុងអំឡុងពេល ដែលរូបគេត្រូវបានគេគិតថា បានគេចវេសបង់ពន្ធចំនួន ១៤,៧ លានអ៊ឺរ៉ូ (១៧,១២លានដុល្លារ)។

តែចុងក្រោយ Ronaldo នៅតែយល់ព្រមបង់ឲ្យអាជ្ញាធរពន្ធដារអេស្ប៉ាញដដែល ដើម្បីបញ្ចប់រឿង៕