អាជ្ញាធរថៃប្រើប្រាស់ដ្រូនបាញ់ទឹក ដើម្បីទប់ទល់នឹងខ្យល់កខ្វក់ក្នុងក្រុងបាងកក

អន្តរជាតិ

អាជ្ញាធរថៃប្រើប្រាស់ដ្រូនបាញ់ទឹក ដើម្បីទប់ទល់នឹងខ្យល់កខ្វក់ក្នុងក្រុងបាងកក

23, Jan 2019 , 7:39 pm

រូបភាព

ដោយ:

អាជ្ញាធរថៃបានដាក់ចេញវិធានការថ្មីមួយ ដោយប្រើប្រាស់ដ្រូនដើម្បីប្រយុទ្ធប្រឆាំងទៅនឹងខ្យល់កខ្វក់ ដែលកំពុងវាយប្រហារលើរាជធានីបាងកក និងខេត្តមួយចំនួនដែលនៅក្បែរនោះ ក្នុងរយៈពេលជាងពីរសប្តាហ៍កន្លងមកនេះ។

ការសាកល្បងនេះ គឺត្រូវបានចាប់ផ្តើមអនុវត្តនៅក្នុងសបា្តហ៍នេះ។ នេះបើតាមការបញ្ជាក់របស់លោក Preecha Pradapmuk ប្រធានវិទ្យាស្ថានបច្ចេកវិទ្យាការពារ។ ចំពោះការសាកល្បងនេះ លោកបានអះអាងថា ស្ថាប័នរបស់លោក កំពុងសហការជាមួយភ្នាក់ងារពាក់ព័ន្ធរបស់រដ្ឋផ្សេងៗ ក្នុងគោលដៅប្រយុទ្ធទៅនឹងការបំពុល ដោយប្រើប្រាស់ដ្រូន។

យោងតាមការចុះផ្សាយរបស់កាសែត Bangkok Post លោក Preecha បាននិយាយថា ដ្រូនចំនួន ១២ គ្រឿង ត្រូវបានផ្តល់ឲ្យដោយស្ថាប័នរដ្ឋនិងឯកជន សម្រាប់បើកការសាកល្បងនេះ។ នៅថ្ងៃអង្គារ ទី២២ មករា ដ្រូនទាំងនោះគឺត្រូវបានអាជ្ញាធរដាក់ពង្រាយនៅលើឧទ្យានមួយកន្លែងក្នុងក្រុងបាងកកឈ្មោះថា Vachirabenjatas ដែលស្ថិតក្នុងសង្កាត់ Chatuchak ។

យោងតាមការអះអាងរបស់លោក Preecha ដដែល ដ្រូនទាំង១២នោះបានបើកប្រតិបត្តិការបាញ់ទឹកពីលើអាកាសក្នុងរយៈកម្ពស់ ២៥ ម៉ែត្រ សម្រាប់រយៈពេលប្រមាណ ៣០ ទៅ ៤០ នាទី។ ក្រោយប្រតិបត្តិការនេះ លទ្ធផលបង្ហាញ ផង់ធូលីល្អិតៗនៅក្នុងខ្យល់ត្រូវបានកាត់បន្ថយ។ លើសពីនេះ អាជ្ញាធរថៃក៏កំពុងពិចារណាដាក់ពង្រាយដ្រូនទាំងនេះនៅតំបន់មួយចំនួនទៀតក្នុងទីក្រុងបាងកក ដែលរងប៉ះពាល់ខ្លាំងដោយខ្យល់កខ្វក់។

ទាក់ទិននឹងការប្រើប្រាស់ដ្រូននេះដែរ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានចាត់ទុកការសាកល្បងនេះថាជា ភាពជោគជ័យមួយ។ ត្រង់ចំណុចនេះ លោក ប្រាយុទ្ធ បានលើកឡើងថា ចិនក៏ធ្លាប់បានប្រើប្រាស់ដ្រូនដើម្បីប្រយុទ្ធប្រឆាំងទៅនឹងខ្យល់កខ្វក់ផងដែរ ដោយរួមមាន ការបាញ់រូបធាតុគីមីនៅក្នុងខ្យល់ជាដើម។ លោកថា «យើងត្រូវតែស្វះស្វែងរកវិធានការចម្បងៗដើម្បីដោះស្រាយបញ្ហាបំពុលខ្យល់នេះ»៕