មេដឹកនាំសមាជិកព្រឹទ្ធសភាអាមេរិកទាំងពីរបក្សបានឯកភាពគ្នាបើកផ្លូវឲ្យមានការបោះឆ្នោតសំខាន់មួយនៅថ្ងៃព្រហស្បតិ៍ដើម្បីឈានទៅបើកដំណើរការងារភ្នាក់ងាររដ្ឋាភិបាលសហព័ន្ធដែលត្រូវបិទអស់រយៈពេលមួយខែនេះឡើងវិញ។ សំណើរធំៗមានពីរដែលត្រូវដាក់ឲ្យសមាជិកព្រឹទ្ធសភាបោះឆ្នោត ក្នុងនោះមានក្នុងនោះមានសំណើរមួយចែងពីកញ្ចប់ថវិកាសម្រាប់សង់ជញ្ជាំងព្រំដែនតាមការទាមទាររបស់លោក ត្រាំផង។
ការបិទរដ្ឋាភិបាលសហព័ន្ធដោយផ្នែកចូលដល់ខែទីពីរហើយគិតត្រឹមថ្ងៃ ២២ ខែមករាឆ្នាំ ២០១៩នេះ ប៉ុន្តែគេមិនទាន់ឃើញមានការស្រុះស្រួលគ្នារវាងប្រធានាធិបតី និងបក្សប្រជាធិបតេយ្យដើម្បីបើកដំណើរការរដ្ឋាភិបាលជាប្រក្រតីវិញឡើយ។ ផ្ទុយទៅគេគ្រាន់តែឃើញការឯកភាពគ្នាបើកឲ្យមានការបោះឆ្នោតអនុម័តសំណើរពីរនៅក្នុងព្រឹទ្ធសភាប៉ុណ្ណោះ។
បើតាមការចុះផ្សាយរបស់ទីភ្នាក់ងារព័ត៌មាន AFP សមាជិកព្រឹទ្ធសភាបក្សសាធារណរដ្ឋលោក Mitch McConnell ដែលមេដឹកនាំក្រុមភាគភាគច្រើន និងសមាជិកបក្សប្រជាធិបតេយ្យលោក Chuck Schumer មេដឹកនាំក្រុមភាគតិចបានឯកភាពគ្នាលើការបោះឆ្នោតនេះនៅថ្ងៃអង្គារទី ២២ខែមករា។
អ្នកនយោបាយទាំងពីរអនុញ្ញាតឲ្យមានការបោះឆ្នោតសាកល្បងលើសំណើរធំៗពីរ។ ទីមួយសំណើរនោះគឺចេញវិធានការផ្តល់ហិរញ្ញវត្ថុដល់ស្ថាប័ននិងទីភ្នាក់ងាររដ្ឋាភិបាលដែលត្រូវបានបិទទាំងអស់រហូតដល់ខែកញ្ញា និងផ្តល់កញ្ចប់លុយ ៥,៧ពាន់លានដុល្លារសម្រាប់សង់ជញ្ជាំងតាមការទាមទាររបស់លោក ដូណាល់ ត្រាំនៅព្រំដែនម៉ិកស៊ិកផង។
ចំពោះសំណើរទីពីរគឺ ជាគម្រោងដែលស្នើឡើងដោយតំណាងរាស្ត្របក្សប្រធានាធិបតី ហើយវិធានការនេះមានគោលដៅផ្តល់ហិរញ្ញវត្ថុដល់ទីភ្នាក់ងាររដ្ឋាភិបាលសហព័ន្ធត្រឹមថ្ងៃ ៨ខែកុម្ភៈប៉ុណ្ណោះ ហើយគ្មានកញ្ចប់លុយសង់ជញ្ជាំងទេ។ ប៉ុន្តែបើកផ្លូវសម្រាប់ការចរចាលើបញ្ហាសន្តិសុខព្រំដែននិងអន្តោប្រវេសន៍បន្ថែមទៀត។ វិធានការនេះក៏អនុញ្ញាតឲ្យលោក ត្រាំ ចូលថ្លែងសុន្ទរកថាទៅកាន់ប្រជាជាតិក្នុងសភាមុនដាច់ខែដែរ។
យ៉ាងណាក៏ដោយ ដើម្បីអាចឆ្លងផុតព្រឹទ្ធសភា វាត្រូវការសំឡេងគាំទ្ររហូតដល់ ៦០ ក្នុងសំឡេងសរុប ១០០។ បច្ចុប្បន្ន បក្សសាធារណរដ្ឋកាន់កាប់អាសនៈសរុប ៥១ ប៉ុណ្ណោះ។ វាមានន័យថា ទោះជាសំណើរទីមួយត្រូវចិត្តលោក ដូណាល់ ត្រាំ ក៏ដោយ សមាជិកបក្សសាធារណរដ្ឋនៅតែត្រូវការសំឡេងគាំទ្រចំនួន ៩ទៀត ពីក្រុមសមាជិកព្រឹទ្ធសភាបក្សប្រជាធិបតេយ្យដដែល។ វាទំនងជារឿងដែលមិនអាចកើតឡើងនោះឡើយ។
ចំពោះចំណាត់ការទីពីរវិញនោះ ថ្វីបើវាមានគោលដៅផ្តល់ថវិកាសម្រាប់ផ្គត់ផ្គង់ដំណើរការស្ថាប័នរដ្ឋាភិបាលដែលត្រូវបិទបណ្តោះអាសន្ន និងបើកផ្លូវឲ្យមានការជជែកគ្នាបន្ថែមក្តីលើការពង្រឹសន្តិសុខព្រំដែនក៏ពិតមែន វាមិនមែនជាអ្វីដែលលោក ត្រាំចង់បានឡើយ។ ដូច្នេះ ទោះវិធានការត្រូវសមាជិកព្រឹទ្ធសភាបោះឆ្នោតអនុម័តដោយជោគជ័យក៏ដោយ បើប្រធានាធិបតីលោក ត្រាំ បដិសេធចុះហត្ថលេខា វាក៏គ្មានន័យអ្វីដែរ។
យ៉ាងណាមិញ មេដឹកនាំបក្សប្រជាធិបតេយ្យបានជំរុញឲ្យបណ្តាតំណាងរាស្ត្របក្សសាធារណរដ្ឋចូលរួមគ្នាដើម្បីឈានទៅបើករដ្ឋាភិបាលសហ័ពន្ធទាំងស្រុងឡើងវិញសិន ដោយជ្រើសរើសវិធានការទីពីរ។ យ៉ាងហោចណាស់ វាក៏ផ្តល់ពេលវេលាបន្ថែមសម្រាប់ការជជែក និងដេញដោលគ្នា ដោយមិនចាំបាច់យករដ្ឋាភិបាលជាចំណាប់ខ្មាំងដូចបច្ចុប្បន្នទៀត៕