ជាតិ
អ្នកកាសែតខ្មែរដំបូងក្រោយសម័យប៉ុលពត ជួបជុំរំឭកខួប៤០ឆ្នាំនៃកាសែតកម្ពុជា
×![]()
ដោយ: វិច្ឆិកា
ក្រុមអ្នកកាសែតជំនាន់ទីមួយក្រោយរបប ប៉ុល ពត នឹងជួបជុំគ្នានាថ្ងៃសុក្រទី២៥ខែមករានេះ ដើម្បីប្រារព្ធពិធីរំឭកខួប៤០ឆ្នាំនៃការបង្កើតសារព័ត៌មានឈ្មោះ «កម្ពុជា»។
ត្រឹមតែ១៨ថ្ងៃ ក្រោយថ្ងៃដួលរលំនៃរបបខ្មែរក្រហម ទិនានុប្បវត្តិឈ្មោះ «កម្ពុជា» បានចេញផ្សាយលេខទី១របស់ខ្លួនភ្លាមនៅថ្ងៃទី ២៥ ខែមករា ឆ្នាំ ១៩៧៩។ ៤០ឆ្នាំក្រោយ ទាំងអតីតថ្នាក់ដឹកនាំ អតីតសហការីនៃកាសែតកម្ពុជា និងភ្ញៀវកិត្តិយសសរុបប្រមាណ២០០នាក់ នឹងប្រារព្ធពិធីជួបជុំរំឭកខួបឆ្នាំទី៤០នៃការបង្កើតសារព័ត៌មាន «កម្ពុជា» ដែលគ្រោងប្រព្រឹត្តទៅនៅថ្ងៃទី២៥ខែមករាឆ្នាំ២០១៩ នៅភោជនីយដ្ឋាន ឡោទីហ្វាង។
លេខទីមួយនៃកាសែត កម្ពុជា បានចេញផ្សាយប្រវត្តិរបស់លោក ហេង សំរិន និងលោក ប៉ែន សុវណ្ណ ដែលត្រូវបានសរសេរនៅក្រោមរូបទង់ជាតិ បទភ្លេងជាតិ និងទន្ទឹមគ្នានឹងសេចក្តីថ្លែងការណ៍របស់ក្រុមប្រឹក្សាប្រជាជនបដិវត្តន៍កម្ពុជា។
ការជួបគ្នាក្នុងពិធីខួបឆ្នាំទី៤០នៃសារព័ត៌មានកម្ពុជា នឹងផ្តល់ឱកាសឲ្យអតីតសហការីនៃក្រុមអ្នកកាសែតខ្មែរដំបូងក្រោយរបបប្រល័យពូជសាសន៍បានជួបជុំរំឭកអនុស្សាវរីយ៍ និងចែករំលែកបទពិសោធន៍ដល់អ្នកកាសែតជំនាន់ក្រោយផងដែរ។
យោងតាមឯកសាររបស់ក្រុមការងាររៀបចំពិធី កាសែតកម្ពុជា គឺជាប្រព័ន្ធផ្សព្វផ្សាយរបស់រណសិរ្សសាមគ្គីសង្គ្រោះជាតិកម្ពុជា។ ឯកសារដដែលសរសេរថា៖«ការចេញផ្សាយច្បាប់ដំបូងរបស់កាសែតនេះ ធ្វើឡើងដោយការវាយអង្គុលីលេខក្នុងទំហំ A3 ហើយមាន៨ទំព័រ ដែលត្រូវបានបោះពុម្ពនៅប្រទេសវៀតណាម»។
បុគ្គលិកប្រមាណ៣០ ដែលដឹកនាំដោយលោក ចាន់ មិន ជាប្រធាន និងលោក ព្រហ្ម បាយ័ន ជាប្រធានមន្ទីរព័ត៌មាន គឺជាក្រុមនុស្សដំបូងដែលបានរៀបចំការចេញផ្សាយលេខទី១នៃកាសែតកម្ពុជាដែលមានទីតាំងនៅតាមបណ្តោយមហាវិថីព្រះនរោត្តម ក្នុងសង្កាត់ទន្លេបាសាក់។
ឯកសារដដែលបានបញ្ជាក់ថា ក្នុងអំឡុងឆ្នាំ១៩៨០ លោក ខៀវ កាញារីទ្ធ ត្រូវបានតែងតាំងឲ្យធ្វើជាអគ្គនិពន្ធនាយក និងមានអគ្គនិពន្ធនាយករងចំនួន២រូបទៀតគឺ លោក ប៉ែន បញ្ញា និងលោក ព្រហ្មញាណវិចិត្រ៕
Tag:
ខៀវ កាញារីទ្ធ
កាសែតកម្ពុជា
© រក្សាសិទ្ធិដោយ thmeythmey.com
