កីឡាអន្តរជាតិ
អន្តរជាតិ
កីឡាករ Cardiff ចូលហ្វឹកហាត់ទាំងក្រៀមក្រំ ខណៈឱកាសរស់របស់ Sala លែងមាន
× គ្មានឱកាសទៀតទេក្នុងការស្វែងរកកីឡាករ Emiliano Sala ដែលស្ថិតនៅលើយន្តហោះធុនស្រាលមួយគ្រឿងដែលគេជឿជាក់ថា បានធ្លាក់ចូលសមុទ្រដែលមានសីតុណ្ហភាពត្រជាក់ខ្លាំង ក្បែរកោះ Channel Islands។ យន្តហោះធុនស្រាលមួយគ្រឿងនោះ បានបាត់ការទាក់ទងតាំងពីយប់ថ្ងៃទី២២ ខែមករាមក។ នេះបើតាមសម្តីរបស់ប៉ូលិសក្នុងតំបន់ Guernsey ដែលស្ថិតលើកោះនោះ។
លោក Neil Warnock អ្នកចាត់ការទូទៅក្រុម Cardiff City រួមទាំងកីឡាកររបស់លោកទាំងអស់បានត្រឡប់ចូលជំរំហ្វឹកហាត់វិញជាមួយអារម្មណ៍ក្រៀមក្រំក្រោយពេលក្រុមអ្នកជួយសង្គ្រោះរបស់អង់គ្លេសនៅតំបន់ដៃសមុទ្រសារភាពថាគ្មានឱកាសរក Sala ឃើញឡើយ។
Sala ត្រូវបាន Cardiff City ទិញពីក្រុម Nantes ក្នុងតម្លៃឯតទគ្គកម្មក្លិប ១៥លានផោន (១៩លានដុល្លារអាមេរិក)។ រូបគេបានធ្វើដំណើរពីប្រទេសបារាំងទៅក្រុង Cardiff ប្រទេសវែលិ៍ ប៉ុន្តែជាអកុសល យន្តហោះដែលរូបគេជិះបានបាត់ការទាក់ទងរហូតមកទល់ពេលនេះ។
សមាជិក្រុមទាំងមូលបានបង្ហាញការភ័យខ្លាច និងស្រងូតស្រងាត់ក្រោយខ្សែប្រយុទ្ធសញ្ជាតិអាហ្សង់ទីន វ័យ២៨ឆ្នាំរូបនេះ បានផ្ញើសារសំឡេងតាមរយៈ WhatsApp ទៅកាន់មិត្តភ័ក្ដិ អំឡុងពេលរូបគេកំពុងមានការភិតភ័យលើយន្តហោះឯកជនម៉ាក Piper Malibu មុនពេលបាត់ការទាក់ទងជាមួយអ្នកបើកបរម្នាក់ទៀត។ យន្តហោះនោះត្រូវបានគេជឿជាក់ថាបានធ្លាក់ចូលសមុទ្រ ចន្លោះពីប្រទេសបារាំងទៅចក្រភពអង់គ្លេស។
បើតាមការអះអាងរបស់លោក John Fitzgerald ប្រធានក្រុមអ្នកស្រាវជ្រាវ Channel Island Air Search បានប្រាប់ភ្នាក់ងារព័ត៌មាន AFP ថាទឹកសមុទ្រនៅទីនោះត្រជាក់ខ្លាំង ហើយមានខ្យល់បក់ខ្លាំងទៀតផង។ លោកបន្ថែមថាទោះបីមនុស្សរឹងមាំប៉ុណ្ណាក៏មិនអាចទប់ទល់នឹងអាកាសធាតុត្រជាក់ខ្លាំងបែបនេះបានដែរ៕
Tag:
Emiliano Sala
Cardiff City
© រក្សាសិទ្ធិដោយ thmeythmey.com