កីឡាអន្តរជាតិ
អន្តរជាតិ
កូរ៉េខាងត្បូងចាប់ផ្តើមស៊ើបអង្កេត ជុំវិញការរំលោភបំពានផ្លូវភេទក្នុងវិស័យកីឡា នាង Shim Suk-hee ម្ចាស់មេដាយមាសអូឡាំពិក២សម័យ
× កូរ៉េខាងត្បូងនឹងបើកការស៊ើបអង្កេតទ្រង់ទ្រាយធំមិនធ្លាប់មានពីមុនមកជុំវិញការរំលោភបំពានផ្លូវភេទក្នុងវិស័យកីឡារបស់ខ្លួន។ នេះបើតាមការលើកឡើងរបស់គណៈកម្មការទទួលបន្ទុកសិទ្ធិមនុស្សកូរ៉េខាងត្បូង (NHRC) នៅថ្ងៃទី ២២ ខែមករា ការចោទប្រកាន់របស់ម្ចាស់មេដាយមាសអូឡាំពិក កីឡាស្គីល្បឿនលឿន (Speed Skating) ទៅលើអតីតគ្រូរបស់ខ្លួន។
លោកស្រី Choi Young-a ប្រធាន NHRC បាននិយាយថាការស៊ើបអង្កេតនេះក្នុងគោលបំណងដោះស្រាយបញ្ហារំលោភបំពានជាប្រព័ន្ធក្នុងកីឡាដែលបានកើតឡើងជាយូរមកហើយ ប៉ុន្តែអ្នកខ្លះមិនហ៊ានរាយកាណ៍ដ្បិតខ្លាចមានការបណ្តេញចេញពីក្រុមកីឡារបស់ពួកគេ។
លោកស្រី Choi បានប្រាប់សន្និសីទសារព័ត៌មានថា លោកស្រីនឹងស៊ើបអង្កេតរកការពិតជុំវិញករណីនេះដែលមានទ្រង់ទ្រាយធំបំផុតមិនធ្លាប់មាន។
បើតាមការលើកឡើងពីមន្ត្រីគណៈកម្មាការ មានអ្នកជាប់ពាក់ព័ន្ធប្រមាណ ៣ម៉ឺននាក់ដែលក្នុងនោះមានទាំងអត្តពលិកមកពីគ្រប់ប្រភេទកីឡា គ្រូបង្វឹក ក្រុមមន្ត្រី ទំនងជានឹងត្រូវគេស៊ើបសួរក្នុងអំឡុងនៃការស៊ើបអង្កេតរយៈពេលពេញមួយឆ្នាំ។
រូបភាពពី AFP
យុទ្ធនាការ #MeToo ទទួលបានលទ្ធផលវិជ្ជមានយ៉ាងឆាប់រហ័សក្នុងការបង្ក្រាបបុរសកូរ៉េខាងត្បូងក្នុងការប្រព្រឹត្តបទល្មើសផ្លូវភេទជាយូរមកហើយ។ ប៉ុន្តែបញ្ហានេះបានផ្ទុះឡើងនៅក្នុងពិភពកីឡាទៅវិញបន្ទាប់ពីកីឡាការិនីស្គីល្បឿនលឿននាង Shim Suk-hee អាយុ ២១ ឆ្នាំបានចោទប្រកាន់អតីតគ្រូបង្វឹករបស់នាងគឺលោក Cho Jae-beom ពីបទរំលោភផ្លូវភេទ។
លោក Jae-beom ដែលជាអតីតគ្រូបង្វឹកកីឡាស្គីល្បឿនលឿនជម្រើសជាតិកូរ៉េខាងត្បូងត្រូវបានគេកាត់ទោសឲ្យជាប់គុក១០ខែ កាលពីខែកញ្ញាឆ្នាំមុន ពីបទរំលោភបំពានទៅលើម្ចាស់ជើងឯកអូឡាំពិកពីរដងនាង Suk-hee ដោយទាត់និងដាល់នាងអំឡុងពេលហ្វឹកហាត់។
លោក Cho Jae-beom អតីតគ្រូកីឡាស្គី (Speed Skating)
រហូតដល់ខែធ្នូកន្លងទៅនាង Suk-hee បានបន្តចោទប្រកាន់អតីតគ្រូរបស់នាងដដែលនេះពីបទរំលោភបំពានផ្លូវភេទម្តងទៀត។ ប៉ុន្តែលោក Jae-beom បានបដិសេធការចោទប្រកាន់នេះ។
ចាប់តាំងពីមានការប្តឹងផ្តល់គ្នាជុំវិញករណីនេះមក មានអត្តពលិកជាច្រើនមកពីកីឡាផ្សេងៗ រួមមានកីឡាយូដូ កីឡាបាញ់ព្រួញជាដើមចាប់ផ្តើមបង្ហាញព័ត៌មានពីការរំលោភ និងការបំពានផ្លូវភេទជាហូរហែ៕
Tag:
រំលោភបំពានផ្លូវភេទ
កូរ៉េខាងត្បូង
#Metoo
© រក្សាសិទ្ធិដោយ thmeythmey.com