កីឡាអន្តរជាតិ
អន្តរជាតិ
Asian Cup៖ VAR រួមចំណែកជួយជប៉ុនឈ្នះវៀតណាម ខណៈអ៊ីរ៉ង់ស៊ីចិន ៣-០ ឡើងវគ្គ១/២ផ្តាច់ព្រ័ត្រ
×![]()
ដោយ: ទេព ពិទូរ្យ
ការផ្តល់បាល់ពិន័យប៉េណាល់ទី១១ម៉ែត្រទៅឲ្យជប៉ុនក្រោយអាជ្ញាកណ្តាលពិនិត្យមើលវីដេអូជំនួយការ (VAR) ជាការបញ្ចប់ក្តីស្រមៃរបស់វៀតណាមដើម្បីឈានទៅប្រជែងពាន AFC Asian Cup2019 នៅត្រឹមវគ្គ៨ចុងក្រោយនេះតែម្តង។ ចំណែកអ៊ីរ៉ង់បានទម្លាក់ចិនដោយការស៊ុតបញ្ចូលទីដល់ទៅ៣គ្រាប់ ដើម្បីបន្តជួបជប៉ុននៅវគ្គពាក់កណ្តាល់ផ្តាច់ព្រ័ត្រ។
ការប្រកួតដែលធ្វើឡើងនៅកីឡដ្ឋាន Rashid Al-Maktoum Stadium ជប៉ុនដែលគេស្គាល់ថាជាក្រុមខ្លាំងនៅតំបន់អាស៊ីបានបើកការវាយសម្រុកទៅលើវៀតណាមជាច្រើនដងតែធ្វើមិនបានសម្រេច។ យ៉ាងណាវៀតណាមក៏មានឱកាសល្អដើម្បីស៊ុតទីគូប្រកួតមួយជើងដែរទោះមិនបំប៉ោងសំណាញ់ បន្ទាប់ពីអ្នកចាំទីនិងខ្សែការពារជប៉ុនលេងសើចនៅមុខទី ហើយក្រុមទាំងពីរបញ្ចប់វគ្គទី១ដោយលទ្ធផលសូន្យស្មើ។
ចូលដល់វគ្គទី២ម្ចាស់ពាន Asian Cup ៤សម័យនៅតែរក្សាការគ្រប់គ្រងបាល់ និងបង្កើតឱកាសរហូតធ្វើបានសម្រេចគ្រាប់បាល់ដោយការស៊ុតបាល់ពិន័យប៉េណាល់ទី។ អាជ្ញាកណ្តាលកាត់សេចក្តីប្រកួតនេះដែលតម្រូវឲ្យធ្វើការជាមួយប្រព័ន្ធ VAR បានសម្រេចផ្តល់បាល់ពិន័យ១១ម៉ែត្រឲ្យភាគីជប៉ុនបន្ទាប់ពីនិត្យវីដេអូរួចឃើញថាខ្សែការពារវៀតណាមពិតជាបានឈូសជើងខ្សែប្រយុទ្ធជប៉ុនមែន។
ដូច្នេះគ្រាប់បាល់ស៊ុតបញ្ចូលទីរបស់ខ្សែប្រយុទ្ធ Ritsu Doan នៅនាទី៥៧ ជាគ្រាប់បាល់ជ័យជម្នះរបស់ក្រុមរហស្សនាមសាម៉ូរ៉ៃ និងជាការបញ្ចប់ក្រុមផ្កាយមាសដើម្បីឡើងទៅកាន់វគ្គពាក់កណ្តាលផ្តាច់ព្រ័ត្របន្តផងដែរ។
ដោយឡែកអ៊ីរ៉ង់ដែលជាក្រុមខ្លាំងជាងគេបំផុតនៅតំបន់អាស៊ីបានទម្លាក់ចិនពីព្រឹត្តិការណ៍នេះជាមួយលទ្ធផល ៣-០ ហើយត្រូវឡើងទៅប៉ះជប៉ុននៅវគ្គពាក់កណ្តាលផ្តាច់ព្រ័ត្រ៕
Tag:
Asian Cup
© រក្សាសិទ្ធិដោយ thmeythmey.com
