កីឡាអន្តរជាតិ
អន្តរជាតិ
Monaco បណ្ដេញ Henry ហើយដាក់គ្រូចាស់វិញដើម្បីគេចពីតំបន់កាត់ចោល លោក Thierry Henry (ឆ្វេង) និងលោក Leonardo Jardim
× ក្លិប AS Manaco បានបញ្ចប់តំណែង Thierry Henry ដែលទើបឡើងដឹកនាំក្រុមបាន ២០ប្រកួត ហើយតែងតាំងគ្រូចាស់ Leonardo Jardim ជាអ្នកចាត់ការទូទៅវិញសម្រាប់ការប្រកួតដែលនៅសេសសល់រដូវកាលនេះ។
លោក Henry អាយុ៤១ឆ្នាំ ដែលបានឡើងទៅជំនួសតំណែងរបស់លោក Jardim កាលពីខែតុលា ឆ្នាំ២០១៨កន្លងទៅ មិនអាចមានលទ្ធភាពជួយស្រោចស្រង់ក្រុមរួចផុតពីតំបន់ត្រូវកាត់ចោលក្នុងក្របខណ្ឌ Ligue 1 បាននោះទេ។ Monaco បានធ្លាក់ពីចំណាត់ថ្នាក់ទី១៨ ទៅ១៩ អំឡុងការដឹកនាំរបស់អ្នកចាត់ការសញ្ជាតិបារាំងនេះ ចំនួន ១២ប្រកួតចុងក្រោយ។
អតីតខ្សែប្រយុទ្ធ Arsenal, Barcelona និង Juventus រូបនេះ ត្រូវបាន Monaco ផ្តល់កិច្ចសន្យារយៈពេល៣ឆ្នាំឯណោះសម្រាប់តំណែងអ្នកចាត់ការទូទៅនេះ បន្ទាប់ពីលោកចាកចេញពីតំណែងជំនួយការរបស់លោក Roberto Martinez នៅជម្រើសជាតិបែលហ្ស៊ិក។
ប៉ុន្តែដោយសារមើលឃើញពីទម្រង់លេងធ្លាក់ចុះរបស់ក្រុមខ្លាំងពេកដូច្នេះ Manaco បានសម្រេចដក Henry ហើយយកអ្នកចាត់ការចាស់ Jardim សញ្ជាតិព័រទុយហ្គាល់ វ័យ៤៤ឆ្នាំ ដែលបានធ្លាប់ដឹកនាំក្រុមរយៈពេល៤ឆ្នាំ ឈ្នះពាន Ligue 1 មួយលើក និងឈានទៅវគ្គពាក់កណ្តាលផ្តាច់ព្រ័ត្រ Champions League ទៀតផងនោះមកស្តារក្រុមវិញ។
ម្ចាស់ជើងឯកលីគកំពូលបារាំងឆ្នាំ២០១៧ ស្ថិតនៅចំណាត់ថ្នាក់ទី១៩ ដែលជាតំបន់ត្រូវកាត់ចោល ដោយរកបានតែ១៥ពិន្ទុប៉ុណ្ណោះ តាមពីក្រោយក្រុមលេខ១៧ចំនួន៣ពិន្ទុ ក្នុងចំណោមការប្រកួត២១លើកចុងក្រោយ។
ដូច្នេះការប្រកួតដែលនៅសេសសល់១៧ប្រកួតទៀត នឹងត្រូវសម្រេចលើលោក Jardim ដើម្បីជួយស្រោចស្រង់ Monaco ឲ្យបន្តលេងក្នុងក្របខណ្ឌ Ligue ១ នេះទៀត៕
Tag:
បាល់ទាត់
Thierry Henry
Monaco
Leonardo Jardim
© រក្សាសិទ្ធិដោយ thmeythmey.com