ចុងក្រោយ ព្រឹទ្ធសភាអាមេរិកនៅបរាជ័យក្នុងការអនុម័តចំណាត់ការសំដៅបើកដំណើរការរដ្ឋាភិបាលសហព័ន្ធទាំងស្រុងឡើងវិញក្នុងការបោះឆ្នោតថ្ងៃព្រហស្បតិ៍ទី ២៤ មករា។ ប៉ុន្តែប្រធានាធិបតី ដូណាល់ ត្រាំ ហាក់បង្ហាញឆន្ទៈថ្មីក្នុងការទទួលយកសំណើរថ្មីណាមួយដែលបក្សទាំងពីរឯកភាពគ្នានិងអាចធានាសន្តិសុខព្រំដែន។ ប៉ុន្តែជញ្ជាំងព្រំដែនតម្លៃ ៥,៧ ពាន់លានដុល្លារនៅតែជាអ្វីដែលលោកចង់បាន។
ដូចការរំពឹងទុកមែន ចំណាត់ការថ្មីចំនួនពីរដែលត្រូវបានដាក់ស្នើចូលក្នុងការបោះឆ្នោតព្រឹទ្ធសភានោះមិនត្រូវបានសមាជិកព្រឹទ្ធសភាទាំងពីរបក្សទទួលយកឡើយក្នុងការបោះឆ្នោតសប្តាហ៍នេះ។ ដូច្នេះ ការបិទរដ្ឋាភិបាលដោយផ្នែកនឹងត្រូវបន្តទៅមុខទៀតទោះវាមានរយៈពេលជាងមួយខែក៏ដោយចុះ។
បើតាមទីភ្នាក់ងារព័ត៌មាន AFP វិធានការទាំងពីរដែលត្រូវបានស្នើឡើងនោះមិនទទួលបានការគាំទ្រ គ្រប់ ៦០សំឡេងក្នុងចំណោមសមាជិកទាំង ១០០នៃព្រឹទ្ធសភាឡើយ។ ភ្លាមៗក្រោយបរាជ័យក្នុងការប៉ឆ្នោតអនុម័តចំណាត់ការនេះ ភាគីពាក់ព័ន្ធនៃសមាជិកបក្សប្រជាធិបតេយ្យ និងសាធារណរដ្ឋប្រញាប់ប្រញាល់ស្វែងរកការចរចាគ្នាផ្សេងទៀតដើម្បីឈានទៅសម្រេចបាននូវចំណាត់ការរួម ដើម្បីបញ្ចប់ការអូសបន្លាយនៃការបិទរដ្ឋាភិបាលនេះផង។
សូមទាញការចាប់អារម្មណ៍បន្តិចថា សំណើរទីនោះគឺចេញវិធានការផ្តល់ហិរញ្ញវត្ថុដល់ស្ថាប័ននិងទីភ្នាក់ងាររដ្ឋាភិបាលដែលត្រូវបានបិទទាំងអស់រហូតដល់ខែកញ្ញា និងផ្តល់កញ្ចប់លុយ ៥,៧ពាន់លានដុល្លារសម្រាប់សង់ជញ្ជាំងតាមការទាមទាររបស់លោក ដូណាល់ ត្រាំនៅព្រំដែនម៉ិកស៊ិកផង។
ចំពោះសំណើរទីពីរគឺ ជាគម្រោងដែលស្នើឡើងដោយតំណាងរាស្ត្របក្សប្រធានាធិបតី ហើយវិធានការនេះមានគោលដៅផ្តល់ហិរញ្ញវត្ថុដល់ទីភ្នាក់ងាររដ្ឋាភិបាលសហព័ន្ធត្រឹមថ្ងៃ ៨ខែកុម្ភៈប៉ុណ្ណោះ ហើយគ្មានកញ្ចប់លុយសង់ជញ្ជាំងទេ។ ប៉ុន្តែបើកផ្លូវសម្រាប់ការចរចាលើបញ្ហាសន្តិសុខព្រំដែននិងអន្តោប្រវេសន៍បន្ថែមទៀត។ វិធានការនេះក៏អនុញ្ញាតឲ្យលោក ត្រាំ ចូលថ្លែងសុន្ទរកថាទៅកាន់ប្រជាជាតិក្នុងសភាមុនដាច់ខែដែរ។
ទីភ្នាក់ងារព័ត៌មាន AFP ផ្សាយថា មេដឹកនាំសភាទាំងពីរបក្សមានមេដឹកនាំក្រុមភាគច្រើនលោក Mitch McConnell និងមេដឹកនាំក្រុមភាគតិចលោក Chuck Schumer ជួបពិភាក្សាគ្នាជាលក្ខណៈឯកជន ដោយផ្តោតលើសំណើរផ្តល់ថវិកាសម្រាប់ដំណើរការភ្នាក់ងាររដ្ឋាភិបាលដែលត្រូវបិទរយៈពេលបីសប្តាហ៍ និងមានការជជែកគ្នាបន្ថែមលើសន្តិសុខព្រំដែន។
ចំណែកសមាជិព្រឹទ្ធសភាបក្សសាធារណរដ្ឋដែលស្និទ្ធលោក ត្រាំ បានអះអាងថា លោកបានពិភាក្សាជាមួយប្រធានាធិបតីពីសំណើរថ្មីដែលមានការបើករដ្ឋាភិបាលបីសប្តាហ៍ដើម្បីចរចា ហើយក្នុងរយៈពេលនេះភាគីពាក់ព័ន្ធនឹងអាចចរចារកវិធានការសមស្របលើសន្តិសុខព្រំដែនដែលលោក ត្រាំ អាចនឹងចុះហត្ថលេខាផង។
ជុំវិញការពិភាក្សាលើសំណើរថ្មីដែលបើកផ្លូវឲ្យមានការចរចាគ្នាបន្ថែមលើបញ្ហាសន្តិសុខព្រំដែននេះ លោក ត្រាំ និយាយថា លោកអាចទទួលយក បើកិច្ចព្រមព្រៀងបង្កើតឡើងដោយទ្វេបក្សនេះសមរម្យ។ ប៉ុន្តែលោក ត្រាំ នៅតែអះអាងថា លោកចង់បានជញ្ជាំងព្រំដែនដដែល។
យ៉ាងណាមិញ ប្រធានសភាតំណាងលោកស្រី Nacy Pelosi បានបញ្ជាក់ជាថ្មីថា រាល់កិច្ចព្រមព្រៀងរួមដែលមានរួមបញ្ចូលលុយសង់ជញ្ជាំងតាមចិត្តប្រធានាធិបតីគ្មានថ្ងៃចេញជាផ្លូវការឡើយ។ វាមានន័យថា បក្សប្រជាធិបតេយ្យមិនយល់ស្របជាដាច់ខាត បើបក្សសាធារណរដ្ឋនៅតែលើកយកលុយ ៥,៧ពាន់លានដុល្លារសម្រាប់សង់ជញ្ជាំងមកដាក់លើតុចរចានោះ។
ខណៈការបិទរដ្ឋាភិបាលលើសមួយខែ ហើយភាគីពាក់ព័ន្ធនៅតែខ្វែគំនិតគ្នា លោក Mitt Romney ដែលជាបេក្ខជនប្រធានាធិបតីឆ្នាំ ២០១២ បានចេញមុខអំពាវនាវឲ្យមេដឹកនាំសភា និងសេតវិមានប្រញាប់ដោះស្រាយរឿងខ្វែងគំនិតគ្នាឲ្យបានឆាប់។ លោកសង្កត់ធ្ងន់ថា ការខ្វះខាតការទាក់ទងគ្នាធ្វើឲ្យភាគីបរាជ័យក្នុងការសម្រេចបានកិច្ចព្រមព្រៀងរួមគ្នាមកដល់ពេលនេះ។
សូមបញ្ជាក់ថា ការបិទរដ្ឋាភិបាលសហព័ន្ធបណ្តោះអាសន្នដោយផ្នែកនេះជាការបិទដំណើរការមួយវែងជាងគេក្នុងប្រវត្តិសាស្ត្រ។ វាឈានដល់លើសមួយខែហើយ ហើយការបិទដំណើរការនេះប៉ះពាល់ដល់ក្រសួងចំនួនប្រាំបួនក្នុងចំណោមក្រសួង ១៥ និងទីភ្នាក់ងារសំខាន់ៗចំនួនច្រើនជាងដប់ដែលត្រូវផ្អាកដំណើរការ។ បុគ្គលិកប្រហែល ៨០ម៉ឺននាក់ដែលរងផលប៉ះពាល់ដោយសារការបិទរដ្ឋាភិបាលសហព័ន្ធដោយផ្នែកនេះ ហើយរាល់ការអូសបន្លាយនឹងបង្កផលប៉ះពាល់កាន់តែធ្ងន់ធ្ងរ៕