ជាតិ
លោក ចន ខឺរី ដែលសម្តេច ហ៊ុន សែន ហៅថាជាមិត្តល្អ នឹងមកខ្មែរម្តងទៀត ជំនួបរវាងលោក ចន ខឺរី និងសម្តេច ហ៊ុន សែន នៅវិមានសន្តិភាព កាលពីខែមករា ឆ្នាំ២០១៦
× លោក ចន ខឺរី (John Kerry) អតីតរដ្ឋមន្ត្រីក្រសួងការបរទេសអាមេរិក និងធ្លាប់ឈរឈ្មោះជាបេក្ខជនប្រធានាធិបតី មានបំណងមកទស្សនកិច្ចនៅកម្ពុជាសាជាថ្មី។ នេះជាការលើកឡើងរបស់សម្តេចនាយករដ្ឋមន្ត្រី ហ៊ុន សែន ក្នុងពិធីជួបសំណេះសំណាលជាមួយកម្មករ-កម្មការិនី នៅខេត្តកំពត នាថ្ងៃទី២៥ ខែមករា ឆ្នាំ២០១៩។
យ៉ាងណាក៏ដោយ សម្តេច ហ៊ុន សែន ពុំបានបញ្ជាក់ពីគោលបំណង និងពេលវេលាជាក់លាក់នៃការធ្វើទស្សនកិច្ចរបស់លោក ចន ខឺរី នោះទេ។ សម្តេច ហ៊ុន សែន បានរម្លឹកថា លោក ចន ខឺរី គឺជាមនុស្សម្នាក់ ដែលបានចូលរួមជាមួយសម្តេច ក្នុងការរៀបចំច្បាប់ ទាក់ទងនឹងការកាត់ទោសខ្មែរក្រហម។
នាយករដ្ឋមន្ត្រីកម្ពុជា និយាយបែបនេះថា៖«គាត់គឺជាមិត្តភក្តិដ៏ល្អម្នាក់។ គាត់ ធ្លាប់ជាទាហាន មកប្រយុទ្ធនៅវៀតណាម ហើយត្រូវរបួសនៅវៀតណាម»។
សូមបញ្ជាក់ថា លោក ចន ខឺរី បានមកទស្សនកិច្ចនៅកម្ពុជា កាលពីអំឡុងខែមករា ឆ្នាំ២០១៦ ដោយកាលនោះ លោក នៅជារដ្ឋមន្ត្រីការបរទេសអាមេរិកនៅឡើយ៕
Tag:
ហ៊ុន សែន
ចន ខឺរី
© រក្សាសិទ្ធិដោយ thmeythmey.com