កីឡាអន្តរជាតិ
អន្តរជាតិ
Asian Cup៖ កូរ៉េខាងត្បូងប៉ះកាតា រីឯម្ចាស់ផ្ទះ ជួបអូស្ត្រាលី វគ្គ១/៤
× ក្រុមកីឡាបាល់ទាត់ជម្រើសជាតិកូរ៉េខាងត្បូង នឹងត្រូវតទល់ជាមួយជម្រើសជាតិកាតានាការប្រកួតវគ្គ៨ក្រុមចុងក្រោយពានរង្វាន់ AFC Asian Cup ឆ្នាំ២០១៩ នៅថ្ងៃទី២៥ ខែមករានេះ វេលាម៉ោង៨:០០នាទីយប់ [ម៉ោងនៅម្ពុជា]។ ចំណែកម្ចាស់ផ្ទះអេមីរ៉ាតអារ៉ាប់រួម ទទួលម្ចាស់ការពារជើងឯកអូស្ត្រាលីនៅវេលាម៉ោង១១:០០នាទីយប់។
កូរ៉េខាងត្បូងដែលទម្លាក់បារ៉ែននៅវគ្គ១៦ក្រុមចុងក្រោយបានបន្តយុទ្ធនាការរបស់ខ្លួនប្រជែងជាមួយកាតាដើម្បីដណ្តើមយកកៅអីទៅកាន់វគ្គពាក់កណ្តាលផ្តាច់ព្រ័ត្រ។ កូរ៉េខាងត្បូងជាក្រុមមានប្រៀបជាងដ្បិតពួកគេឡើងមកដល់វគ្គនេះច្រើនដងនិងជាក្រុមដែលចាស់ទុំសម្រាប់ពានប្រចាំតំបន់អាស៊ីនេះ ខណៈកាតាមិនដែលឆ្លងចូលដល់វគ្គ១/២ឡើយ។
រីឯជំនួបមួយគូទៀត ម្ចាស់ផ្ទះដែលធ្លាប់បានចំណាត់ថ្នាក់ទី២ពាននេះម្តងក្នុងឆ្នាំ១៩៩៦ ត្រូវប្រជែងជាមួយម្ចាស់ការពារតំណែងជើងឯកឆ្នាំ អូស្ត្រាលី ក្នុងវគ្គ១/៤ផ្តាច់ព្រ័ត្រនេះ។ អេមីរ៉ាតអារ៉ាប់រួមក៏ធ្លាប់ឆ្លងផុតដល់វគ្គពាក់កណ្តាល់ផ្តាច់ព្រ័ត្រ៣លើក ខណៈអូស្ត្រាលីដែលទើបចូលរួមពាន Asian Cup នេះលើកដំបូងក្នុងនាមម្ចាស់ផ្ទះឆ្នាំ២០១៥ និងក្លាយជាម្ចាស់ពាននេះផងដែរ។
ក្រុមពីរក្នុងចំណោមក្រុមទាំង៤ ដែលអាចឆ្លងផុតវគ្គ១/៤នេះ នឹងត្រូវជួបគ្នានៅវគ្គ ១/២ផ្ទាច់ព្រ័ត្របន្តទៀត៕
© រក្សាសិទ្ធិដោយ thmeythmey.com