សៀមរាប៖ ទោះបីប្រទេសកម្ពុជា ត្រូវបានគេចាត់ទុកថាជាប្រទេសកសិកម្មយ៉ាងណាក្ដី ប៉ុន្តែគេសង្កេតឃើញថា ការវិនិយោគធំៗលើផ្នែកនេះ មិនទាន់មានច្រើននៅឡើយ។ យុវជន ឃុត សុខា ចាត់ទុកថាជាមនុស្សដ៏កម្រមួយរូប ដែលសម្រេចបោះទុនវិនិយោគទំហំធំក្នុងវិស័យកសិកម្ម។ កសិករមួយរូប រវិនិយោគនេះច្រើនដំណាក់កាល បង្កើតរោងកសិដ្ឋានទំនើប ដាំបន្លែសរីរាង្គមួយកន្លែងនៅស្រុកពួក ដោយបានបោះទុនសរុបជាងមួយលានដុល្លារអាមេរិក។ គម្រោងនេះ ក៏មានការចូលរួមពីជនជាតិអូស្រា្ដលីមួយរូបដែលស្រឡាញ់វិស័យកសិម្មនេះផងដែរ។ កសិដ្ឋាននេះ ដើរតួជាអ្នកផ្គត់ផ្គង់បន្លែ ដល់បណ្ដាភោជនីយដ្ឋាន និងសណ្ឋាគារធំៗ ក្នុងក្រុងសៀមរាបសរុបប្រមាណ២០០កន្លែង។
ដើម្បីលម្អិត សូមស្ដាប់បទយកការណ៍ ដែលរៀបរៀងដោយ អ៊ីសា រ៉ហានី ពីខេត្តសៀមរាបដូចតទៅ៖
ខេត្តសៀមរាប មានតម្រូវការបន្លែច្រើនជារៀងរាល់ថ្ងៃ ដ្បិតថាជាខេត្តទេសចរណ៍ មានភោជនីយដ្ឋាន អាហារដ្ឋាន និងសណ្ឋាគារច្រើនសន្ធឹក។ ប្រជាជននៅជុំវិញខេត្តនេះ ភាគច្រើនក៏មានរបរដាំបន្លែដែរ។ យ៉ាងណាការដាំនោះនៅខ្នាតតូច លក្ខណៈគ្រួសារនៅឡើយ ដែលពិបាកក្នុងការផ្គត់ផ្គង់ទៅតាមភោជនីយដ្ឋាន និងសណ្ឋាគារធំៗ ដែលត្រូវការទាំងបរិមាណ និងគុណភាព។
យុវជន ឃុត សុខា ចាត់ទុកថាជាកសិករមួយរូប ដែលកំពុងជោគជ័យផ្នែកកសិកម្ម តាមរយៈការដាំបន្លែសរីរាង្គ ក្នុងរោងកសិដ្ឋានតាមបច្ចេកទេសទំនើប។ ការដាំបន្លែដោយប្រើរោងលក្ខណៈ ហ្គ្រីនហោស (Green House) និង Hydroponics ត្រូវការសម្ភារ និងបច្ចេកទេសទំនើប មកចូលពីប្រទេសក្រៅ។ យុវជនរូបនេះបានឱ្យដឹងថា គោលបំណងនៃការបង្កើតកសិដ្ឋាននេះ គឺចង់រួមចំណែកអភិវឌ្ឍន៍វិស័យកសិកម្ម និងចង់ឱ្យពលរដ្ឋមានជម្រើសល្អក្នុងការហូបបន្លែដែលមានសុវត្ថិភាព មិនប៉ះពាល់ដល់សុខភាព។
លោក ឃុត សុខា ដែលបច្ចុប្បន្នមានវ័យ៣៦ឆ្នាំ បានចាប់ផ្តើមបង្កើតកសិដ្ឋាន ហែបភី អែន កូ (Happy + Co) នៅអំឡុងឆ្នាំ ២០១២ នៅពេលដែលលោកសម្រេចចោលការងារនៅក្នុងសណ្ឋាគារ ដែលជាការងារដំបូងក្នុងជីវិតលោក ការងារដែលធ្វើឱ្យមានទំនាក់ទំនងជាមួយមនុស្សជាច្រើន និងជួយលោកឱ្យមានលទ្ធភាពរៀនថ្នាក់មហាវិទ្យាល័យ។ លោកចាប់ផ្តើមប្រឡូក ក្នុងការដាំបន្លែសរីរាង្គបែបទំនើបនេះតាមរយៈការសិក្សាស្រាវជ្រាវ និងអនុវត្តន៍ផ្ទាល់ គួបផ្សំនឹងចំណង់ចំណូលចិត្តពីកំណើតផង។
កសិដ្ឋានដាំបន្លែរបស់លោក សុខា បង្កើតឡើងអំឡុងឆ្នាំ ២០១២ ។ តែយ៉ាងណាទីតាំងនេះ ត្រូវបានធ្វើពិសោធន៍ និងព្យាបាលដី ដោយបានចំណាយពេល៣ទៅ៥ឆ្នាំ ទម្រាំក្លាយជាកសិដ្ឋានមួយដែលមានស្ដង់ដាត្រឹមត្រូវ។ បន្លែដែលមានដាំក្នុងរោងកសិដ្ឋាននេះ ភាគច្រើនជាប្រភេទសាលាដអឺរ៉ុប។ ក្រៅពីនោះ មានប្រភេទប៉េងប៉ោះអឺរ៉ុប ស្ពៃ ត្រប់ ត្រសក់ជាដើម។ល។ ក្រៅពីព្យាយាមផលិតបន្លែដែលមិនទាន់មានក្នុងស្រុកហើយនោះ កសិដ្ឋានហែបភី អែន កូ មានគោលដៅផលិតបន្លែដែលមានគុណភាពខ្ពស់ ចង់ឱ្យអ្នកហូបមានសុខភាព និងបានរួមចំណែកកាត់បន្ថយការចំណាកស្រុករបស់ពលរដ្ឋខ្មែរ ដែលកម្មករទាំងអស់ អាចយកចំណេះផ្នែកកសិកម្ម ទៅអភិវឌ្ឍន៍មុខរបរ រៀងៗខ្លួនទៅថ្ងៃអនាគតផងដែរ។
ដោយសារជាបន្លែសរីរាង្គ ដាំដុះដោយប្រើបច្ចេកទេសត្រឹមត្រូវ ឲតាមគោលការណ៍ធម្មជាតិនោះ ទីផ្សារសម្រាប់បន្លែរបស់កសិដ្ឋានលោក សុខា មិនសូវមានកង្វល់ឡើយ។ តាមសណ្ឋាគារ និងភោជនីយដ្ឋានធំៗក្នុងក្រុងសៀមរាប បានតម្រង់ជួរចាំទទួលផលិតផលកសិកម្ម ពីកសិដ្ឋានមួយនេះ ហើយរាល់ផលិតផលទាំងអស់ ទទួលបានទំនុកចិត្តទាំងផ្នែកគុណភាព និងអនាម័យ។ លោក សុខា បន្តថា៖« ទីផ្សារសព្វថ្ងៃសម្រាប់កសិដ្ឋានយើង គឺលក់រាយនៅតាមទីផ្សារធម្មតា ២០ភាគរយ និងផ្តត់ផ្គង់តាមភោជនីយដ្ឋាន សណ្ឋាគារ ចំនួន ៨០ភាគរយ។ សម្រាប់សាលាដ ក្នុងមួយថ្ងៃអាចបញ្ចេញបានពី ៣០០ទៅ៤៥០គីឡូក្រាម។ ក្រៅពីនោះ មានរ៉ូកេត ពី១៥ទៅ២០គីឡូក្រាម ត្រសក់ ៥០ទៅ១០០គីឡូក្រាម ប៉េងប៉ោះ ៣០ទៅ៤៥គីឡូក្រាម»។ល។
កសិដ្ឋានដាំបន្លែ ហែបភី អែន កូ លាតសន្ធឹងលើផ្ទៃដីជាង ៣ហិកតា ក្នុងរោងបន្លែជាង៣០។ ម្ចាស់កសិដ្ឋានបានឱ្យដឹងថា ការដាំដុះដោយប្រើបច្ចេកទេសទំនើបនេះ មិនសូវប្រើកម្លាំងពលកម្មច្រើនទេ។ សព្វថ្ងៃកម្មករដែលកំពុងបម្រើការងារនៅកសិដ្ឋាននេះ សរុបជាង ៤០នាក់ ទាំងកសិករផ្នែកដាំដុះ វេចខ្ចប់ និងដឹកនាំជញ្ជូន។ យ៉ាងណា តាមការបញ្ជាក់របស់ម្ចាស់កសិដ្ឋាន ការចំណាយសម្រាប់ការដាំដុះបន្លែប្រភេទនេះ គឺមានចំនួនច្រើន។ ក្នុងមួយខែការចំណាយជាទូទៅប្រមាណពី១៥០០០ដុល្លារទៅជិត ២ម៉ឺនដុល្លារ។ លោក សុខ រម្លឹកថា កសិដ្ឋានរបស់លោក ទើបនឹងចំណេញក្នុងរយៈពេលមួយឆ្នាំតែប៉ុណ្ណោះ គឺអំឡុងឆ្នាំ២០១៨ ដោយសារការដាំដុះ៦ឆ្នាំដំបូង កសិដ្ឋានលោកខាតបង់រហូត។ លោកថា វិស័យកសិកម្មមានភាពលំបាកច្រើន ត្រូវការការព្យាយាម ភាពអត់ធ្មត់ខ្ពស់ ហេតុនេះហើយទើបមិនសូវមានអ្នកហ៊ានរកស៊ីលើវិស័យនេះច្រើន។
ទៅថ្ងៃខាងមុខ លោក សុខា មានបំណងពង្រីកកសិដ្ឋានដាំបន្លែឱ្យធំជាងនេះ។ តែយ៉ាងណាលោកថា ដោយតម្លៃថាមពលអគ្គិសនីនៅថ្លៃ ទើបរាំងស្ទះក្នុងគម្រោងអភិវឌ្ឍន៍របស់លោក។ ក្នុងនោះ មហច្ឆិតារបស់យុវជនរូបនេះ ក៏ចង់កែច្នៃបន្លែបែកបាក់ក្នុងរោងកសិដ្ឋានទាំងអស់ ទៅជាភេសជ្ជៈសម្រាប់ចែកចាយនៅលើទីផ្សារផងដែរ។ បច្ចុប្បន្ន ភេសជ្ជៈទាំងនោះត្រូវបានកែច្នៃក្នុងទ្រង់ទ្រាយសាកល្បង និងខ្នាតតូចនៅឡើយ សម្រាប់ការផ្គត់ផ្គង់ទៅតាមភោជនីយដ្ឋាន និងសណ្ឋាការ។ លើសពីនេះ លោកចង់អភិវឌ្ឍន៍ដីកសិដ្ឋានដែលនៅសេសសល់ ជាតំបន់ទេសចរណ៍ធម្មជាតិ ទាក់ទាញភ្ញៀវទេសចរចូលមកកម្សាន្ត និងទស្សនារោងបន្លែជាដើម៕