ភ្នំពេញ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដាក់វិធានការសំខាន់៤ចំណុច ក្នុងការលើកកម្ពស់ផលិតកម្ម និងធុរកិច្ចស្រូវអង្ករ ដើម្បីជំរុញលទ្ធភាពនៃប្រកួតប្រជែងនាំចេញ។ ការដាក់វិធានការនេះ ធ្វើឡើងក្រោយ សហភាពអឺរ៉ុប ប្រកាសយកពន្ធអង្ករនាំចូលពីកម្ពុជា រយៈពេលបីឆ្នាំជាប់គ្នា ចាប់ពីឆ្នាំ២០១៩ ដល់ឆ្នាំ២០២១។
យោងតាមសេចក្តីជូនដំណឹងរបស់ក្រសួងកសិកម្ម វិធានការសំខាន់ទាំង៤ចំណុច ដែលត្រូវអនុវត្តតាមនោះមាន ចំណុច១ មន្ត្រីជំនាញរបស់ក្រសួង ត្រូវបន្តការស្រាវជ្រាវ និងបញ្ចេញប្រភេទពូជស្រូវក្រអូបប្រណិត និងផលិតកម្មគ្រាប់ពូជស្រូវក្រអូបសុទ្ធ តាមរយៈការផលិតនៅថ្នាក់សហគមន៍ និងក្រុមកសិករផលិតគ្រាប់ពូជ។ បន្តធ្វើយ៉ាងណាឱ្យមានគ្រាប់ពូជគ្រប់គ្រាន់ និងតម្លៃសមរម្យ ដើម្បីពង្រីកផលិតកម្មស្រូវក្រអូប។ ជាមួយគ្នានេះស្នើវិស័យឯកជន ចូលរួមដាក់ទុនវិនិយោគក្នុងការផលិតគ្រាប់ពូជស្រូវក្រអូប ដែលមានគុណភាពខ្ពស់ស្របតាមស្តង់ដារ និងតម្រូវការទីផ្សារអន្តរជាតិ។
ចំណុច២៖ ត្រូវព្យាយាមកាត់បន្ថយថ្លៃដើមផលិតកម្ម ណាដែលមិនចាំបាច់ ហើយត្រូវជំរុញឱ្យបានខ្លាំងបន្ថែម នូវវិធានការបច្ចេកទេសផលិតកម្ម ដែលទទួលបានទិន្នផលខ្ពស់ និងចំណាយតិច រួមជាមួយនឹងការអនុវត្តទំនើបភាវូបនីយកម្មកសិកម្ម។ អគ្គនាយកដ្ឋានកសិកម្ម ត្រូវសម្រួលដល់ការនាំចូលជីកសិកម្ម ថ្នាំកសិកម្ម និងសម្ភារកសិកម្មដទៃទៀត ដោយធានាបានពីគុណភាពស្របតាមស្តង់ដារកំណត់ ឱ្យបានលឿន និងមានប្រសិទ្ធភាពជាងមុន ដើម្បីសម្រួលដល់ការផលិតស្រូវបានកាន់ប្រសើរ។
ចំណុច៣៖ អ្នកប្រមូលទិញស្រូវពីអ្នកផលិត ត្រូវបន្តទំនាក់ទំនងជាមួយធនាគារអភិវឌ្ឍជនបទ ដើម្បីទទួលបានឥណទាន ប្រមូលទិញស្រូវពីកសិករ សហគមន៍កសិកម្ម ដោយមិនត្រូវយកហេតុផលនៃការដាក់វិធានការការពារទីផ្សាររបស់សហគមន៍អឺរ៉ុប មកទម្លាក់ថ្លៃទិញស្រូវពីកសិករឡើយ។ ក្រុមហ៊ុននាំចេញអង្ករ ត្រូវពិនិត្យនិងធានាគុណភាពអង្ករក្រអូបឱ្យបានសុទ្ធល្អមិនត្រូវលាយបន្លំអង្ករប្រភេទផ្សេង ដែលនាំឱ្យអតិថិជនបាត់បង់ជំនឿលើគុណភាពអង្ករក្រអូបកម្ពុជា។
ចំណុច៤៖ សហព័ន្ធស្រូវ អង្ករកម្ពុជា គួរយកចិត្តទុកដាក់ជំរុញឱ្យសមាគមន៍ម៉ាស៊ីនកិនស្រូវ ខិតខំបង្កើនសមត្ថភាពកែច្នៃអង្ករ ឱ្យមានគុណភាពបន្ថែមទៀត សម្រាប់បម្រើឱ្យទីផ្សារអន្តរជាតិ។ ពិសេសទីផ្សារប្រទេសចិន ដែលមានរហូតដល់៤០ម៉ឺនតោន ក្នុងឆ្នាំ២០១៩។ លើសពីនេះទៀត សមាជិកសហព័ន្ធស្រូវអង្ករកម្ពុជា គួរពិគ្រោះយោបល់គ្នា ដើម្បីពិនិត្យលើប្រឈម ពីផលប៉ះពាល់ នៃការដាក់វិធានការការពារទីផ្សារអង្កររបស់សហគមន៍អឺរ៉ុប រួចលើកសំណើ ឬសំណូមពរមកក្រុមការងារផ្នែកស្រូវ-អង្គរ នៃវេទិការាជរដ្ឋាភិបាល-ផ្នែកឯកជន ពិនិត្យនិងរកដំណោះស្រាយតាមការចាំបាច់។
ឆ្នាំ២០១៧-២០១៨ កម្ពុជាផលិតស្រូវបានជាង១០,៥លានតោន និងមានភាពលើស(អតិរេក)ស្បៀងជាអង្ករចំនួន៣,៥៥លានតោន ឬ៥,៥៦លានតោនស្រូវ សម្រាប់បម្រើឱ្យការប្រើប្រាស់ឧស្សាហកម្មស្បៀងក្នុងស្រុក និងនាំចេញទៅទីផ្សារអន្តរជាតិ។ ក្នុងនោះការនាំចេញអង្ករកម្ពុជាទៅសហគមន៍អឺរ៉ុបមានជិត ២៧ម៉ឺនតោន ស្មើនឹង៧,៥ភាគរយ នៃចំនួនអង្ករសរុប ក្នុងប្រទេស និងស្មើជិត៤៣ភាគរយ នៃចំនួននាំចេញទៅទីអន្តរជាតិសរុប។
សូមរម្លឹកថា សហគមន៍អឺរ៉ុប បានសម្រេចយកពន្ធលើការនាំចេញអង្កររបស់កម្ពុជា ចាប់ពីថ្ងៃទី១៨ មករា ឆ្នាំ២០១៩ ដែលជាឆ្នាំទីមួយ មានតម្លៃ១៧៥អឺរ៉ូ ក្នុងមួយតោន ហើយធា្លក់ចុះ១៥០អឺរ៉ូ ក្នុងឆ្នាំ២០២០ ជាឆ្នាំទីពីរ និងឆ្នាំទីបីនៅត្រឹម១២៥អឺរ៉ូ ក្នុងឆ្នាំ២០២១៕