ជាតិ
សេដ្ឋកិច្ច
ថៃ មានទំហំវិនិយោគនៅកម្ពុជា កើនដល់ជាង៦៦លានដុល្លារអាមេរិក លោក ប៉ាន់ សូរស័ក រដ្ឋមន្ត្រីក្រសួងពាណិជ្ជកម្ម និងលោក ផាន់យ៉ារ៉ាក់ ប៉ុលធូប ឯកអគ្គរាជទូតថៃប្រចាំនៅកម្ពុជា
× ភ្នំពេញ៖ ទំហំទុនវិនិយោគរបស់ថៃនៅកម្ពុជា បានកើនឡើងជាង៦៦លានដុល្លារ។ វិនិយោគទាំងនោះ ផ្តោតលើភោជនីយដ្ឋាន បរិក្ខារម៉ាស៊ីនត្រជាក់ គ្រឿងអេឡិចត្រូនិក សំណង់ និងរោងចក្រកែច្នៃផ្លែឈើ ជាដើម។ នេះបើយោងតាមសារព័ត៌មានជាតិAKP។
លោក ជីរ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃប្រចាំនៅកម្ពុជា បានមាននិយាយថា ក្រុមហ៊ុន និងពាណិជ្ជករថៃជាច្រើនបានត្រៀមបោះទុនវិនិយោគដោយផ្ទាល់លើវិស័យជាច្រើននៅកម្ពុជា ដោយសារតែកម្ពុជា មានសក្ដានុពលលើវិស័យសេដ្ឋកិច្ច កម្លាំងពលកម្ម និងស្ថិរភាពនយោបាយ ព្រមទាំងមានច្បាប់វិនិយោគត្រឹមត្រូវ ដែលផ្តល់ទំនុកចិត្ដដល់វិនិយោគិន បរទេសមកបណ្ដាក់ទុន។
លោក បន្ថែមថា ក្រុមពាណិជ្ជករថៃ កំពុងសម្លឹងឱកាសបង្កើនគម្រោងវិនិយោគ ដោយផ្ទាល់នៅកម្ពុជាបន្ថែមទៀត។
រយៈពេល១១ខែ ឆ្នាំ២០១៨ ការដោះដូរពាណិជ្ជកម្មរវាងប្រទេសថៃ និងកម្ពុជា មានទឹកប្រាក់សរុប ៨,០០០លានដុល្លារ ខណៈដែលរាជរដ្ឋាភិបាលប្រទេសទាំងពីរ បានកំណត់ផែនការជំរុញគោលដៅពាណិជ្ជកម្មទ្វេភាគី ឱ្យបាន១៥ពាន់លានដុល្លារ នៅឆ្នាំ២០២០។
ផលិតផលពីកម្ពុជាដែលនាំចេញទៅថៃ ភាគច្រើនជាទំនិញកសិផល មានដូចជា ពោត ដំឡូងមី សណ្តែកជាដើម។ ចំណែកថៃនាំចូលមកកម្ពុជាវិញមានដូចជា គ្រឿងចក្រ ឧបករណ៍អេឡិចត្រូនិក ប្រេងឥន្ធនៈ សម្ភារសំណង់ គ្រឿងឧបភោគបរិភោគ គ្រឿងសម្អាង សម្ភារប្រើប្រាស់ក្នុងផ្ទះ ជាដើម៕
Tag:
ជាតិ
សេដ្ឋកិច្ច
វិនិយោគ
© រក្សាសិទ្ធិដោយ thmeythmey.com