កម្ពុជាប្រឈមបញ្ហាភ្លើងឆេះព្រៃដែលបណ្តាលមកពីបាតុភូតអែលនីណូ និងទង្វើមនុស្ស

ជាតិ

កម្ពុជាប្រឈមបញ្ហាភ្លើងឆេះព្រៃដែលបណ្តាលមកពីបាតុភូតអែលនីណូ និងទង្វើមនុស្ស

27, Jan 2019 , 7:59 pm

រូបភាព

ភ្លើងឆេះព្រៃសហគមន៍ជនជាតិកួយរាប់ពាន់ហិចតានៅខេត្តព្រះវិហារ កាលពីដើមឆ្នាំ២០១៦

ដោយ: អ៊ូ សុខមាន (OU Sokmean)

ភ្នំពេញ៖ កម្ពុជា នឹងមានអាកាសធាតុក្តៅហួតហែងនារដូវប្រាំង ពិសេសក្នុងខែមេសា និងឧសភា ដែលមានសីតុណ្ហភាពពី៤០ ទៅ៤២អង្សាសេ។ ភាពក្តៅបែបនេះ បណ្តាលមកពីការទទួលរងឥទ្ធិពលបាតុភូត អែល នីណូ(El Nino) ដោយប្រយោល ដែលអាចបង្កឲ្យមានភ្លើងឆេះព្រៃ ដោយសារកត្តាធម្មជាតិ និងសកម្មភាពមនុស្ស។

យោងតាមសេចក្តីជូនដំណឹងរបស់ក្រសួងបរិស្ថានកាលពីថ្ងៃទី២១ មករា ឆ្នាំ២០១៩ បញ្ហាភ្លើងឆេះព្រៃតែងតែកើតមានឡើងនៅក្នុងតំបន់ការពារធម្មជាតិ និងរប្រៀងអភិរក្សជីវៈចម្រុះនានានៅកម្ពុជា រៀងរាល់ឆ្នាំ។ កត្តាចម្បងដែលបង្កឲ្យមានភ្លើងឆេះព្រៃញឹកញាប់បំផុតក្នុងរដូវប្រាំង បណ្តាលមកពីសកម្មភាពធ្វេសប្រហែសរបស់មនុស្សមួយចំនួន ដែលមានការកាប់ឆ្ការដុតព្រៃដើម្បីចាប់សត្វព្រៃ ការដុតព្រៃយកដីធ្វើជាកម្មសិទ្ធដាំដំណាំ និងតាំងលំនៅឋានជាដើម។

ជាមួយគ្នានេះក្រសួងបរិស្ថាន មានវិធានការមួយចំនួន ក្នុងការទប់ស្កាត់ភ្លើងឆេះព្រៃ ដោយតម្រូវឲ្យអង្គភាពជំនាញរដ្ឋបាលថ្នាក់ក្រោមជាតិ មន្ទីរបរិស្ថាន អាជ្ញាធរមានសមត្ថកិច្ច ណែនាំប្រជាពលរដ្ឋ និងអនុវត្តន៍វិធានការបច្ចេកទេសសមស្របដែលអាចធានាសុវត្ថិភាព ចំពោះភ្លើងព្រៃ ដែលពលរដ្ឋក្នុងតំបន់បង្កើតឡើងក្នុងគោលបំណងប្រយោជន៍ផ្ទាល់ខ្លួន ឬសាធារណៈ៕