អន្តរជាតិ
បក្សអតីតនាយករដ្ឋមន្ត្រីថៃ អាប់ភីស៊ីត មានសមាជិកសកម្មច្រើនជាងគេក្នុងចំណោមបក្សជាង១០០
× ទោះបីជាការបោះឆ្នោតថៃ មានការប្រែប្រួលជាបន្តបន្ទាប់ក៏ដោយក្តី បក្សនយោបាយថៃ នៅតែបន្តយុទ្ធនាការស្វែងរកសមាជិក និងអ្នកគាំទ្ររបស់ខ្លួនដដែល។ គួរឲ្យកត់សម្គាល់នោះ តាមគណៈកម្មាធិការរៀបចំការបោះឆ្នោតថៃ បក្សនយោបាយរបស់អតីតនាយករដ្ឋមន្ត្រីលោក អាប់ភីស៊ីត វ៉េចាជីវ៉ា (Abhisit Vejjajiva) មានចំនួនសមាជិកច្រើនជាងច្រើន។
គិតត្រឹមថ្ងៃ២១ មករា មានបក្សនយោបាយថៃចំនួន ១០៤ ហើយ បានចុះបញ្ជីតាមនីតិវិធីច្បាប់ដើម្បីប្រកួតប្រជែងក្នុងការបោះឆ្នោតលើកដំបូងរបស់រាជាណាចក្រថៃ បន្ទាប់ពីរដ្ឋប្រហារយោធាឆ្នាំ២០១៤មក។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការរៀបចំការបោះឆ្នោតថៃ ដែលបានចុះផ្សាយដោយសារព័ត៌មានថៃ Nation ។
តាមគណៈកម្មរៀបចំការបោះឆ្នោតថៃ ក្នុងចំណោមបក្សនយោបាយជាង ១០០ នោះ បក្សប្រជាធិបតេយ្យរបស់អតីតនាយករដ្ឋមន្ត្រី លោក អាប់ភីស៊ីត មានសមាជិកជាង១២ម៉ឺននាក់ ដែលចំនួននេះ ធ្វើឲ្យបក្សប្រជាធិបតេយ្យ ក្លាយជាបក្សដែលមានសមាជិកច្រើនជាងគេ ខណៈ បក្ស តៃរ៉ាក់ថាំ មានសមាជិក ៤៩៧២១, បក្សទើបបង្កើតថ្មីរបស់អ្នកនយោបាយជំនាន់ក្រោយអនាគតឆ្ពោះទៅមុខ ៤៣២០១, បក្សអំណាចប្រជាជនថៃក្នុងតំបន់ ៣០០៧២ និងបក្ស ភុំចៃថៃ ៣០០៣១ នាក់។
សម្រាប់បក្សភឿថៃ ដែលធ្លាប់គ្រប់គ្រងដោយផ្ទាល់ដោយអតីតនាយករដ្ឋមន្ត្រីថៃត្រកូល ស៊ីណាវ៉ាត់វិញ តាមប្រភពដដែលនោះ មានសមាជិករបស់ខ្លួន ជាងពីរម៉ឺននាក់ ហើយបក្ស Palang Pracharat ដែលទើបតែបង្កើតថ្មី និងត្រូវបានគេស្គាល់ថាជាបក្សមានទំនោរទៅរករបបសឹកថៃរបស់លោកនាយករដ្ឋមន្ត្រី ប្រាយុទ្ធ ចន្ទ មានសមាជិករបស់ខ្លួនប្រមាណ ជាងបួនពាន់នាក់ប៉ុណ្ណោះ។
យ៉ាងណាក៏ដោយ ចំនួននេះ មិនអាចក្លាយជាហេតុផលគួរជឿទុកចិត្តសម្រាប់ការវាស់វែងលទ្ធភាពនៃជ័យជម្នះនៃការបោះឆ្នោតថៃបានឡើយ។ តែអ្វីដែលគួរចាប់អារម្មណ៍នោះ បក្សនយោបាយដែលទើបតែបង្កើតថ្មី ជាក់ស្តែងនោះ បក្សអនាគតឆ្ពោះទៅមុខរបស់អ្នកនយោបាយជំនាន់ក្រោយ ហាក់មានការទទួលការគាំទ្រច្រើនពីប្រជាពលរដ្ឋ។
សូមជម្រាបផងដែរ គិតចាប់ពីរដ្ឋប្រហារយោធាទម្លាក់អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ នៅថ្ងៃ២២ ឧសភា ឆ្នាំ២០១៤មក រាជាណាចក្រថៃ ពុំទាន់មានការបោះឆ្នោតឡើយ។ ក្រោមការដឹកនាំរបស់របបសឹក ដែលមានលោកនាយករដ្ឋមន្ត្រី ប្រាយុទ្ធ ចន្ទ អូចា ជាប្រមុខ ផែនការនៃការបោះឆ្នោត ត្រូវបានគ្រោងរៀបចំតាំងពីឆ្នាំ២០១៥មកម៉េះ ក៏ប៉ុន្តែក៏ត្រូវបានពន្យារពេលជាបន្ទាប់។
ថ្មីៗនេះ បន្ទាប់ពីប្រកាសរំសាយផែនការបោះឆ្នោតនៅខែកុម្ភៈឆ្នាំនេះ ព្រះមហាក្សត្រថៃ បានចេញព្រះរាជក្រឹត្យមួយដើម្បីកំណត់ពីកាលបរិចេ្ឆទថ្មី និងត្រូវបានគេសង្ឃឹមថាជាកាលបរិច្ឆេទចុងក្រោយដោយកំណត់ថ្ងៃបោះឆ្នោតនៅថ្ងៃ២៤ មីនា វិញ៕
Tag:
ថៃ
អាស៊ាន
បោះឆ្នោត
© រក្សាសិទ្ធិដោយ thmeythmey.com