កម្ពុជា បញ្ជូនទ័ពថ្មីជិត២០០នាក់ ទៅរក្សាសន្តិសុខនៅលីបង់ ហើយទ័ពចាស់ ត្រូវមកវិញ

ជាតិ

សង្គមជាតិ

កម្ពុជា បញ្ជូនទ័ពថ្មីជិត២០០នាក់ ទៅរក្សាសន្តិសុខនៅលីបង់ ហើយទ័ពចាស់ ត្រូវមកវិញ

28, Jan 2019 , 9:39 pm

រូបភាព

រូបពីក្រសួងការពារជាតិ

ដោយ:

ភ្នំពេញ៖ នៅយប់ថ្ងៃទី២៧ ខែមករា ឆ្នាំ២០១៩ កម្ពុជា បានបញ្ជូនកងកម្លាំងមួកខៀវ១៨៤នាក់ ទៅការពារសន្តិសុខនៅសាធារណរដ្ឋលីបង់ ក្រោមឆត្ររបស់អង្គការសហប្រជាជាតិ។ នេះបើតាមការផ្សាយព័ត៌មានរបស់ក្រសួងការពារជាតិ។

ក្រសួងការពារជាតិ បានចុះផ្សាយពីប្រសាសន៍របស់លោក សែម សុវណ្ណនី អនុប្រធានគណៈកម្មាធិការជាតិ និងអគ្គនាយកមជ្ឈមណ្ឌលជាតិរក្សាសន្តិភាព ថា ដំណើរទៅដល់របស់កងកម្លាំងទាំងនោះ ក៏មានអមដោយកម្លាំងដោះមីនផងដែរ ដែលជាអ្នកមានជំនាញត្រូវតាមស្តង់ដាររបស់អង្គការសហប្រជាជាតិ។ លោក អះអាងថា កងកម្លាំងទាំងអស់នេះ នឹងអនុវត្តសកម្មភាព ដោះមីន សាងសង់ព្រំដែនសីមា រវាងប្រទេសអ៊ីស្រាអែល និងលីបង់។

ការបញ្ជូនកងកម្លាំងមួកខៀវថ្មីនេះ គឺជាការផ្លាស់ប្តូរកងកម្លាំងមួកខៀវចាស់ ដែលត្រូវផុតអាណត្តិ នៅលីបង់។ ក្រសួងការពារជាតិ បានបញ្ជាក់ថា កងកម្លាំងមួកខៀវចាស់ទាំង១៨៤នាក់ នឹងត្រូវបញ្ជូនមកកម្ពុជាវិញ នៅថ្ងៃទី២៩ ខែមករានេះ។

គិតត្រឹមឆ្នាំ២០១៨ កម្ពុជា បានបញ្ជូនកងកម្លាំងសរុបជាង៥៧០០នាក់ ដោយក្នុងនោះមានស្ត្រីចំនួន២៦០នាក់ ចូលរួមបេសកម្មរបស់អង្គការសហប្រជាជាតិ។ បច្ចប្បន្នកម្ពុជា មានកងកម្លាំងជិត១០០០នាក់ ដែលកំពុងបំពេញបេសកម្មនៅតាមប្រទេសនានា ដូចជា ស៊ូដង់ ស៊ូដង់ខាងត្បូង អាហ្វ្រិកកណ្តាល លីបង់ និងម៉ាលី ជាដើម។

កម្ពុជា ត្រូវបានគេចាត់ទុកថា ជាប្រទេស ដែលបរិច្ចាគកងកម្លាំងបំពេញបេសកម្មរបស់អង្គការសហប្រជាជាតិលំដាប់ទី២ នៅតំបន់អាស៊ាន៕

អត្ថបទទាក់ទង

ត្រឹម២០១៨ កម្ពុជា បញ្ជូនទ័ពជិត៦ពាន់នាក់ ទៅរក្សាសន្តិសុខពិភពជាមួយ UN