Moraes គ្រងខ្សែក្រវាត់ Flyweight ក្រោយយកឈ្នះម្ចាស់ខ្សែក្រវាត់ Eustaquio

ONE Championship

កីឡាអន្តរជាតិ

អន្តរជាតិ

Moraes គ្រងខ្សែក្រវាត់ Flyweight ក្រោយយកឈ្នះម្ចាស់ខ្សែក្រវាត់ Eustaquio

30, Jan 2019 , 7:59 am

រូបភាព

ដោយ៖ Matias Andres

កាលពីល្ងាចថ្ងៃសុក្រ ទី២៥ ខែមករា ONE Championship បានត្រលប់ទៅបើកព្រឹត្តិការណ៍ ONE: HERO'S ASCENT នៅទីក្រុងម៉ានីឡា ប្រទេសហ្វីលីពីន ហើយបាននាំយកមកនូវភាពរំជើបរំជួលដល់ទស្សនិកជន ជាមួយការប្រកួតក្បាច់គុនមួយថៃ ប្រដាល់សេរី និងកីឡាករគុនចម្រុះស្តង់ដារពិភពលោក។

១. Moraes សម្រេចបំណងយកបានខ្សែក្រវាត់ ONE Flyweight World Title មកវិញ

កម្មវិធីសំខាន់នៃព្រឹត្តិការណ៍រាត្រីនោះមានគូពិសេសមួយគូ គឺ Geje Eustaquio ប៉ះ Adriano Moraes ជាលើកទីបីដែលមិនធ្លាប់មានពីមុនឡើយនៅលើសង្វៀន ONE Championship។ ធ្លាប់ជាម្ចាស់ខ្សែក្រវាត់ Eustaquio ហ៊ានដាក់ខ្សែក្រវាត់ខ្លួនឲ្យគេដណ្តើមក្នុងការប្រកួតចំនួនប្រាំទឹក ដើម្បីស្វែងកីឡាករសក្តិសមជាម្ចាស់ខ្សែក្រវាត់ ONE Championship Flyweight World Champion ឲ្យពិតប្រាកដ។

ការជួបគ្នាពីរលើកមុនរបស់ពួកគេ គឺទីមួយនៅព្រឹត្តិការណ៍ ONE: RISE OF THE KINGDOM រាជធានីភ្នំពេញ និងទីពីរនៅ ONE: PINNACLE OF POWER ទីក្រុងម៉ាកាវ។

នាការប្រកួតលើកទីបីខាងម្ចាស់ផ្ទះហ្វីលីពីន Eustaquio ហ៊ោកញ្ជៀវស្ទើរបែកឆាកដោយសារគូមួយនេះប្រកួតយ៉ាងស្វិតស្វាញ ម្នាក់ៗស្ទុះចូលចាប់ក្លេរគ្នា និងដាល់គ្នាដូចរន្ទះ។ ក្រោយប្រកួត៥ទឹកពេញ ចៅក្រមបានសម្រេចជាឯកច្ឆន្ទឲ្យ Moraes ឈ្នះការប្រកួតនេះ ហើយក្លាយជាម្ចាស់ថ្មីរបស់ខ្សែក្រវាត់ ONE Flyweight World Champion។

២. Lowen Tynanes ជាប់វគ្គជម្រុះ ONE World Lightweight Grand Prix

ក្រោយពីបាត់មុខពីសង្វៀនប្រដាល់ជាង៣ឆ្នាំដោយសារមានរបួសខ្នងមក Lowen Tynanes បានបង្ហាញមុខសាជាថ្មីនៅ ONE ព្រោះមិនចង់ខាតពេលវេលាយូរជាងនេះឡើយ។ Tynanes ត្រូវប្រឈមមុខជាមួយជើងខ្លាំងរបស់ម្ចាស់ផ្ទះឥណ្ឌូនេស៊ី Honorio Banario កីឡាករតំណាងក្រុម Lakay ដែលពីមុនជាអតីតម្ចាស់ខ្សែក្រវាត់ ONE Featherweight World Champion ដ៏ល្បីឈ្មោះមួយរូប។ ពេលប្រយុទ្ធ Tynanes មានប្រៀបច្រើនទៅលើភាគីម្ចាស់ផ្ទះដោយការចូលចាប់ផ្តួលយ៉ាងរហ័ស និងឡើងគៀបពីលើជាប់ ហើយប្រើកណ្តាប់ដៃដាល់ផ្តួនៗ។

Banario វិញក៏បានបង្ហាញស្មារតីអ្នកប្រយុទ្ធដ៏រឹងមាំម្នាក់ដែរ ដោយសារគាត់នៅតែមិនព្រមចាញ់ស្រួលៗហើយព្យាយាមរកវិធីដោះក្លេរឲ្យបាន ប៉ុន្តែទោះប្រឹងយ៉ាងណា Tynanes នៅតែរក្សាកម្លាំងគៀបរឹតជាប់ រួចបន្ថែមការដាល់ធ្ងន់ៗមិនសំចៃ រហូតអាជ្ញាកណ្តាល Yuji Shimada សម្រចបញ្ឈប់ការប្រកួតនៅនាទី៤:៤០ នៃទឹកទី១។

គួរឲ្យដឹងដែរថា Tynanes មានប្រវត្តិប្រកួតឈ្នះជាប់ៗគ្នាចំនួន១០ដងរួចមកហើយ។ អ្វីដែលរឹតែសំខាន់នោះគឺ កីឡាករអាមេរិកវ័យ២៨ឆ្នាំនេះនឹងត្រូវប្រកួតវគ្គបន្ត ONE World Lightweight Grand Prix ជាមួយកីឡាករជ័យលាភី ដែលអាចជា Eddie Alvarez ឬក៏ Timofey Nastyukhin។ ការប្រកួតនោះនឹងប្រព្រឹត្តិទៅនៅថ្ងៃទី៣១ ខែមីនា ក្នុងព្រឹត្តិការណ៍ ONE: A NEW ERA ទីក្រុងតូក្យូប្រទេសជប៉ុន។

៣. ជោគជ័យគួរឲ្យភ្ញាក់ផ្អើលរបស់កីឡាករ ONE Super Series

ONE: HERO'S ASCENT ដំណើការទៅយ៉ាងរំភើបក្តុកក្តួល ប៉ុន្តែអ្វីដែលកាន់តែអស្ចារ្យទៀតនោះ គឺតារាប្រដាល់របស់ ONE Championship ជាច្រើនបានសម្តែងស្នៀតក្បាច់គុនថ្មីមិនគួរឲ្យជឿ។

Elias Mahmoudi ចំណូលថ្មីរបស់ ONE ដែលជាជើងឯក៣លើកក្នុងកម្មវិធី Muay Thai World Champion ទទួលបានជោគជ័យដ៏ធំធេងមួយ ដោយយកឈ្នះភាគីជប៉ុន Yukinori Ogasawara ក្នុងការប្រកួតមួយថៃទម្ងន់៦៥គីឡូក្រាម វគ្គ ONE Super Series។ Mahmoudi អ្នកប្រដាល់មកពីប្រទេសអាល់ហ្សេរី បានប្រើប្រាស់ក្បាច់គុនគ្រប់បទផែននៅក្នុងការប្រយុទ្ធរបស់គេ ដូច្នេះឃើញថាកីឡាករផ្សេងៗទៀតត្រូវតែញញើតពេលចូលប្រកួតសេរីជាមួយកីឡាកររូបនេះ។

កីឡាករហ្វីលីពីន Danny Kingad ហាក់មានអំនួតខ្លាំង ព្រោះមានការហ៊ោអបអរសាទរពីអ្នកគាំទ្រពេលរូបគេត្រូវប្រឈមមុខនឹងដៃគូជប៉ុន Tatsumitsu Wada ក្នុងការប្រកួតបែបគុនចម្រុះ។

មួយគូនេះសម្រុកចូលគ្នាធ្វើឲ្យអ្នកមើលមិនហ៊ានព្រិចភ្នែក។ អ្វីដែលគួរឲ្យរន្ធត់នោះ គឺពេល Wada យកបានឱកាសកាប់ជើងក្រោម ហើយដាល់ចំៗទៅលើ Kingad ស្ទើរត្រូវអាជ្ញាកណ្តាលបញ្ឈប់ឲ្យរូបគេឈ្នះ។ ប៉ុន្តែភាគីម្ចាស់ផ្ទះគ្រប់គ្រងកម្លាំងនិងស្តារស្ថានការណ៍ឡើងវិញ រួចត្រលប់ទៅដាល់ពីក្រោមអស់ពីទំហឹងជាហូរហែរ។

បន្ទាប់ពីប្រកួតអស់ពីសមត្ថភាពជាមួយគ្នាចំនួន៣ទឹករួចមក ចៅក្រមទាំងបីបានសម្រេចជ័យលាភីទៅឲ្យកីឡាករហ្វីលីពីន និងមានឈ្មោះជាប់ក្នុងវគ្គបន្តនៅ ONE Flyweight World Grand Prix៕