រយៈពេល១០ឆ្នាំហើយដែលកសិករវ័យ៧៣ឆ្នាំ លោកយាយ ទីវ ឆាត បានងាកមកដាំបន្លែសរីរាង្គ ក្រោមការជួយជ្រោមជ្រែងបច្ចេកទេសពីអ្នកជំនាញអង្គការសេដាក។ ក្នុងបទសម្ភាសជាមួយសារព័ត៌មាន ThmeyThmey កសិករឆ្នើមដែលដាំបន្លែសរីរាង្គនៅភូមិថ្មរាប ឃុំពង្រ ស្រុករលាប្អៀរ ខេត្តកំពង់ឆ្នាំងរូបនេះ លើកឡើងថា៖ «កត្តាដែលជំរុញឲ្យខ្ញុំដាំបន្លែសរីរាង្គ ព្រោះបន្លែនេះ មានតម្លៃថ្លៃជាងបន្លែធម្មតា និងមានការទទួលស្គាល់។ ជាពិសេស ហូបទៅមានសុខភាពល្អ»។
 

 

ស្ពៃ, សាឡាដ, សណ្ដែកគួរ, ត្រសក់, ជី និងបន្លែសរីរាង្គជាច្រើនទៀត ដែលលោកយាយ ទីវ ឆាត បានដាំ សម្រាប់លក់ឲ្យអតិថិជននៅក្នុងភូមិស្រុក និងផ្គត់ផ្គង់ឲ្យផ្សារកសិផលសរីរាង្គសេដាកនៅរាជធានីភ្នំពេញ។ បន្លែសរីរាង្គរបស់លោកយាយ ទីវ ឆាត មានតម្លៃថ្លៃចាប់ពី៥ពាន់ ដល់១ម៉ឺនរៀលក្នុង១គីឡូក្រាម។ ក្នុងផ្ទៃដីទំហំ៧អា ដែលលោកយាយ ឆាត កំពុងដាំបន្លែសរីរាង្គជាច្រើនប្រភេទនោះ ធ្វើឲ្យលោកយាយអាចរកចំណូលបានពី៨០ម៉ឺនរៀលទៅ១លានរៀលក្នុងមួយខែ។ 

 

បើទោះជា មានបទពិសោធដាំបន្លែច្រើនឆ្នាំក៏ពិតមែន ក៏លោកយាយ ទីវ ឆាត នៅតែជួបប្រទះនឹងបញ្ហាប្រឈម ដោយសត្វល្អិតបំផ្លាញបន្លែទាំងនោះម្តងម្កាលផងដែរ។ ប៉ុន្តែ បញ្ហាទាំងនេះមិនមែនជាឧបសគ្គធំសម្រាប់កសិករវ័យ៧៣ឆ្នាំម្នាក់នេះឡើយ។

 

បទពិសោធ១០ឆ្នាំជាមួយនឹងការដាំបន្លែតាមគោលការណ៍សរីរាង្គសេដាក លោកយាយ ទីវ ឆាត បានប្រឡងជាប់ជាកសិករគំរូប្រចាំភូមិថ្មរាប ឃុំពង្រ នៃស្រុករលាប្អៀរ ខេត្តកំពង់ឆ្នាំ។ ក្រោយជាប់ឈ្មោះជាកសិករគំរូ មានកសិកររស់នៅក្នុងភូមិស្រុក និងមកពីតាមខេត្ត រួមទាំងបណ្ដាប្រទេសមួយចំនួនផង បានមករៀនស្រូតពីបច្ចេកទេស និងការអនុវត្តពីរបៀបដាំ និងថែទាំបន្លែសរីរាង្គផ្ទាល់ពីលោកយាយ ទីវ ឆាត ។ បច្ចុប្បន្ន លោកយាយ ទីវ ឆាត បានលាឈប់ពីការដាំបន្លែសរីរាង្គនេះ ដោយលោកយាយ ផ្ទេរមុខរបរដាំបន្លែសរីរាង្គនេះទៅកូនចៅគ្រប់គ្រងវិញ៕​