ប៉េរូ បានប្រកាសនៅថ្ងៃអង្គារទី ២៩ ខែមករាថា ដំណោះស្រាយដោយអន្តរាគមន៍យោធាប្រឆាំងរបបដឹកនាំវ៉េណេស៊ុយអេឡាលោក នីកូឡា ម៉ាឌុយរ៉ូ មិនត្រូវបានស្វាគមន៍ដោយបណ្តារដ្ឋអាមេរិកឡាទីន និងកាណាដាឡើយ។ ការទាត់ចោលដំណោះស្រាយដោយប្រើកម្លាំងបាយនេះកើតឡើងបន្ទាប់ពីមានព័ត៌មានថា អាមេរិកអាចនឹងប្រើប្រាស់កម្លាំងយោធាអន្តរាគមន៍ចូលក្នុងវិបត្តិវ៉េណេស៊ុយអេឡាក្នុងក្របខណ្ឌតំបន់ផង។
វិបត្តិវ៉េណេស៊ុយអេឡាបន្តអូសបន្លាយនិងកាន់តែដុនដាបខ្លាំង ដោយសារគ្មានដំណោះស្រាយនយោបាយណាមួយត្រូវសម្រេចចេញនោះឡើយ។ បច្ចុប្បន្នប្រធានាធិបតីពីរនៅតាំងខ្លួនជាមេដឹកនាំស្របច្បាប់ ដោយម្នាក់មានអំណាចពេញដៃ ឯម្នាក់ទៀតមានត្រឹមការទទួលស្គាល់ពីសហគមន៍អន្តរជាតិប៉ុណ្ណោះ។ ចំណែកបាតុកម្មហិង្សាផ្ទុះឡើងដើម្បីទាមទាររកការផ្លាស់ប្តូរកើតមានពេញទីក្រុង។
ជុំវិញការបន្តអូសបន្លាយនៃវិបត្តិនេះ មានព័ត៌មានថា អន្តរាគមន៍យោធាអាចនឹងកើតឡើងនៅវ៉េណេស៊ុយអេឡាដើម្បីជំរុញការផ្លាស់ប្តូរផ្នែកនយោបាយផង។
នៅអាមេរិក ទាំងលោក ដូណាល់ ត្រាំ រដ្ឋមន្ត្រីការពារជាតិស្តីទី និងទីប្រឹក្សាសន្តិសុខជាតិ សុទ្ធតែនិយាយក្នុងជំហររួមគ្នាលើវិធានការដោះស្រាយវិបត្តិវ៉េណេស៊ុយអេឡា។ ពួកគេបានអះអាងថា រាល់វិធានការទាំងអស់រាប់ទាំងយោធាស្ថិតនៅលើតុ បើសិនជាស្ថិតក្នុងករណីចាំបាច់នោះ។
ប៉ុន្តែដំណោះស្រាយប្រើកម្លាំងបាយនេះ ត្រូវបានទាត់ចោលដោយបណ្តារដ្ឋអាមេរិកឡាទីន និងកាណាដាដែលជាសមាជិកក្រុមលីម៉ា (Lima Group)។ ថ្វីបើសមាជិកក្រុមនេះភាគច្រើនមិនទទួលស្គាល់លោក ម៉ាឌុយរ៉ូជាមេដឹកនាំស្របច្បាប់ក្នុងអាណត្តិទីពីរក្តី ប្រទេសទាំងនេះយល់ថា ការប្រើកម្លាំងបាយនឹងបង្កើតវិបត្តិធ្ងន់ធ្ងរ។
បើតាមទីភ្នាក់ងារព័ត៌មាន AFP រដ្ឋមន្ត្រីការបរទេសប៉េរូលោក Nestor Popolizio បានថ្លែងដូច្នេះ៖« ក្នុងនាមជាសមាជិកក្រុមលីម៉ា យើងបាននិយាយហើយថា យើងមិនគាំទ្រឡើយរាល់ការអន្តរាគមន៍ដោយប្រើប្រាស់យោធានៅវ៉េណេស៊ុយអេឡា»។
ខណៈប្រកាសទាត់ចោលអន្តរាគមន៍យោធាពីសំណាក់រដ្ឋមន្ត្រីប៉េរូ រដ្ឋមន្ត្រីការបរទេសកាណាដាលោកស្រី Chrystia Freeland ឯណោះវិញ បានបង្ហើបថា សមាជិកក្រុមលីម៉ានឹងចាប់ផ្តើមជួបពិភាក្សាមួយនៅថ្ងៃ ៤ ខែកុម្ភៈខាងមុខដើម្បីស្វែងរកដំណោះស្រាយឆ្លើយតបនឹងបញ្ហានៅវ៉េណេស៊ុយអេឡា។
«លោក ម៉ាឌុយរ៉ូ បង្កើតវិបត្តិនយោបាយ សេដ្ឋកិច្ច និងសង្គមធ្ងន់ធ្ងរដែលបង្កបញ្ហាដល់តំបន់ទាំងមូល។ កាណាដានឹងរៀបចំកិច្ចប្រជុំបន្ទាន់សមាជីកក្រុមលីម៉ានៅ អូតាវ៉ា ថ្ងៃចន្ទទី ៤ ខែកុម្ភៈនេះដើម្បីជជែកពីជំហានបន្ទាប់ដើម្បីគាំទ្រប្រធានាធិបតីស្តីទី ហ័ន ក្វៃដូ និងប្រជាជនវ៉េណេស៊ុយអេឡា»។
ទោះជាមានការលើកឡើងបែបនេះក៏ដោយ រដ្ឋមន្ត្រីរូបនេះមិនបានបញ្ជាក់លម្អិតឡើយថា តើក្រុមលីម៉ានឹងអាចចាត់វិធានការ ឬចេញដំណោះស្រាយបែបណាជាក់លាក់ដើម្បីឆ្លើយតបនឹងស្ថានការណ៍បច្ចុប្បន្នឡើយ។
ការលើកឡើងពីកិច្ចប្រជុំតំបន់នេះធ្វើឡើងបន្ទាប់ពី រដ្ឋបាលអាមេរិកសម្រេចដាក់ទណ្ឌកម្មបន្ថែមដោយលើកនេះផ្តោតលើក្រុមហ៊ុនប្រេងរដ្ឋ PDVSA ក្នុងគោលដៅកាត់ផ្តាច់ហិរញ្ញវត្ថុរបបដឹកនាំលោក ម៉ាឌុយរ៉ូ ទាំងស្រុងផង។ ជាការឆ្លើយតប លោល ម៉ាឌុយរ៉ូ ចេញបញ្ជាឲ្យមន្ត្រីខ្លួនរៀបចំពាក្យបណ្ដឹងប្រឆាំងចំណាត់ការរដ្ឋបាលអាមេរិកទៅតុលាការអាមេរិកផងដែរ។
-ប្រធានាធិបតីថ្មីត្រូវបង្កកទ្រព្យ និងស្ថិតក្រោមបម្រាមចាកចេញពីប្រទេស
ខណៈដែលស្ថានការណ៍បន្តដុនដាប ដោយមានសម្ពាធពីអន្តរជាតិ និងកើនឡើងចលនាតវ៉ាហិង្សាប្រឆាំងនឹងរបបដឹកនាំលោក ម៉ាឌុយរ៉ូ តុលាការកំពូលវ៉េណេស៊ុយអេឡាដែលមានចៅក្រមសិ្នទ្ធនឹងរដ្ឋាភិបាលបានចេញសេចក្តីសម្រេចមួយហាមឃាត់លោក ហ័ន ក្វៃដូ ចាកចេញពីប្រទេស និងបង្កទ្រព្យសម្បត្តិរបស់លោកផង។
ប្រធានាតុលាការកំពូលវ៉េណេស៊ុយអេឡា Maikel Moreno បានបញ្ជាក់ដូច្នេះ៖ «លោក ហ័ន ក្វៃដូ វ័យ ៣៥ឆ្នាំជាប្រធានរដ្ឋភាត្រូវហាមឃាត់ចាកចេញពីប្រទេសរហូតដល់មានការបញ្ចប់ការស៊ើបអង្កេតបឋមជុំវិញការបង្កគ្រោះថ្នាក់ដល់សន្តិភាពជាតិ»។
គេដឹងច្បាស់ថា ការដាក់ចេញវិធានការថ្មីនេះបង្ហាញពីចេតនារបស់លោក ម៉ាឌុយរ៉ូ ក្នុងការបំបាត់ឥទ្ធិពលនឹងគូប្រជែងរបស់ខ្លួនលោក ហ័ន ក្វៃដូ ដែលនឹងអាចជំនួសតំណែងលោកក្នុងពេលឆាប់ៗផងនោះ។
ក្រោយតុលាការដាក់ចេញបម្រាមធ្វើដំណើរ និងបង្កកទ្រព្យសម្បត្តិលោក ក្វៃដូ បានសរសេរសារលើគណនី Twitter របស់ខ្លួនដោយព្រមានតុលាការកំពូលថា របបដឹកនាំលោក ម៉ាឌុយរ៉ូ ស្ថិតក្នុងដំណាក់កាលចុងក្រោយហើយ។ លោកបន្ថែមថា តុលាការនេះមិនគួរប្រឹងធ្វើគ្រប់យ៉ាងដោយលះបង់ខ្លួនឯងដើម្បីមេដឹកនាំផ្តាច់ការ និងបក្សពួកឡើយ។
ពីវ៉ាស៊ីនតោន ទីប្រឹក្សាសន្តិសុខរបស់លោក ត្រាំ លោក ចន បុលតុន បានព្រមានក្រុងការ៉ាកាស់តាមសារ Twitter ថា រាល់ចំណាត់ការទាំងឡាយណាដែលធ្វើឲ្យគ្រោះថ្នាក់ឬប៉ះពាល់ដល់លោក ក្វៃដូ នឹងត្រូវទទួលលទ្ធផលជាទីគាប់ចិត្ត។
«អនុញ្ញាឲ្យខ្ញុំនិយាយម្តងទៀត។ វានឹងមានលទ្ធផលធ្ងន់ធ្ងរចំពោះរាល់ជនទាំងឡាយណាដែលប៉ុនប៉ងធ្វើវិទ្ធង្សនាប្រឆាំងប្រជាធិបតេយ្យ និងធ្វើឲ្យគ្រោះថ្នាក់ដល់លោក ហ័ន ក្វៃដូ»។ លោក បុលតុន គំរាមបែបនេះ បន្ថែមពីលើការប្រកាសថា រាល់វិធានការទាំងអស់រាប់ទាំងកម្លាំងបាយផងគឺជាជម្រើសរបស់អាមេរិក៕