មន្ត្រីឧទ្យានុរក្ស៦នាក់នៅមណ្ឌលគិរី រងការបាញ់ប្រហារ ពេលដើរល្បាតព្រៃ

ជាតិ

សង្គមជាតិ

មន្ត្រីឧទ្យានុរក្ស៦នាក់នៅមណ្ឌលគិរី រងការបាញ់ប្រហារ ពេលដើរល្បាតព្រៃ

30, Jan 2019 , 3:15 pm

រូបភាព

មន្រ្តីឧទ្យានុរក្ស ត្រូវរបួសត្រង់ភ្លៅ ដោយសារការបាញ់ប្រហារពីពួកអ្នកប្រមាញ់សត្វព្រៃ។ រូបពីមន្ទីរព័ត៌មានខេត្តមណ្ឌលគិរី

ដោយ: ថ្មីៗ

ខណៈកំពុងដើរល្បាតព្រៃ ក្រុមមន្ត្រីឧទ្យានុរក្ស៦នាក់ ត្រូវបានខ្មាន់កាំភ្លើង បាញ់ប្រហារ នៅតំបន់ការពារសត្វព្រៃ ក្នុងស្រុកកោះញែក ខេត្តមណ្ឌគិរី កាលពីម៉ោង៣និង៣០នាទីទៀបភ្លឺ នាថ្ងៃទី២៩ ខែមករា ឆ្នាំ២០១៩។

ទំព័រហ្វេសប៊ុករបស់មន្ទីរព័ត៌មាន បានសរសេរថា ក្នុងការបាញ់ប្រហារនេះ មន្ត្រីឧទ្យានុរក្សម្នាក់ បានរងរបួសធ្ងន់ ដោយគ្រាប់កាំភ្លើងត្រូវចំភ្លៅ។ មន្ត្រីឧទ្យានុរក្ស ដឹងថា អ្នកដែលបាញ់ប្រហារនោះ គឺជាក្រុមប្រមាញ់សត្វព្រៃ។ ខាងមន្ត្រីឧទ្យានុរក្ស ក៏បានបាញ់តបវិញដែរ។

បើតាមប្រភពដដែល លោក កែវ សុភក៌ ប្រធានមន្ទីរបរិស្ថានប្រចាំខេត្តមណ្ឌគិរី បានរៀបរាប់ថា មន្ត្រីឧទ្យានុរក្សទាំង៦នាក់ ដោយមានកាំភ្លើង២ដើម បានដើរល្បាត ដើម្បីស្វែងរកបទល្មើសនានា ហើយក៏ឃាត់សួរក្រុមអ្នកប្រមាញ់សត្វព្រៃ៥-៦នាក់ ដែលធ្វើសកម្មភាពបរបាញ់សត្វព្រៃ។ ប៉ុន្តែ ដោយសារអាងមានគ្នា និងមានអាវុធទៀតនោះ ជនល្មើស ក៏បានផ្ទុះអាវុធជាមួយមន្ត្រីឧទ្យានុរក្សតែម្តង។

លោក កែវ សុភក៌ លើលឡើងថា បន្ទាប់មក មន្ត្រីឧទ្យានុរក្ស បានដកថយទៅជំរំវិញ។ លោក បន្តថា លុះដល់ម៉ោង៥ព្រលឹម ស្រាប់តែជនល្មើសទាំងនោះ បានឆ្លៀតទៅជំរំមន្ត្រីឧទ្យានុរក្ស និងបានបាញ់រះចំម៉ូតូរបស់មន្ត្រីឧទ្យានុរក្ស ហើយក៏រត់គេចខ្លួនបាត់។

ទំព័រហ្វេសប៊ុករបស់មន្ទីរព័ត៌មាន បានសរសេរពីសម្តីរបស់លោក សូ សុវណ្ណ ស្នងការរងនគរបាលខេត្តមណ្ឌលគិរី ថា លោក បានដាក់កម្លាំង ឲ្យចុះទៅត្រួតពិនិត្យ និងស្រាវជ្រាវនៅកន្លែងកើតហេតុ ដើម្បីប្រមូលវត្ថុតាង។ ប៉ុន្តែ រហូតមកដល់ពេលនេះ កម្លាំងរបស់លោក មិនទាន់ត្រឡប់មកវិញទេ ដូច្នេះ លោក មិនទាន់អាចសន្និដ្ឋានបានឡើយ៕