លោក សយ សុភាព៖ សមាគមអ្នកសារព័ត៌មានកម្ពុជា-ចិន បង្កើតឡើងដើម្បីបម្រើផលប្រយោជន៍ប្រទេសទាំងពីរ

ជាតិ

បទយកការណ៍ / បទសម្ភាសន៍

លោក សយ សុភាព៖ សមាគមអ្នកសារព័ត៌មានកម្ពុជា-ចិន បង្កើតឡើងដើម្បីបម្រើផលប្រយោជន៍ប្រទេសទាំងពីរ

31, Jan 2019 , 9:41 am

រូបភាព

រូបពីហ្វេសប៊ុកលោក សយ សុភាព

ដោយ: រំដួល ចិត្រា (Romdoul Chetra)

ភ្នំពេញ៖ សមាគមអ្នកសារព័ត៌មានកម្ពុជា-ចិន បង្កើតឡើងដើម្បីបម្រើផលប្រយោជន៍ប្រទេសទាំងពីរ។ នេះជាការលើកឡើងរបស់លោក សយ សុភាព អគ្គនាយកមជ្ឈមណ្ឌលព័ត៌មានដើមអម្ពិល ដែលទើបតែទទួលបានសិទ្ធិបង្កើតសមាគមនេះ ពីរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ នៅថ្ងៃទី៣០ មករា ឆ្នាំ២០១៩។

លោក សយ សុភាព ដែលជាស្ថាបនិកផ្តួចផ្ដើមសមាគមនេះឡើង បាននិយាយថា គោលបំណងនៃការបង្កើតសមាគមអ្នកសារព័ត៌មានកម្ពុជា-ចិន គឺដើម្បីផ្សព្វផ្សាយពីភាពវិជ្ជមាននៃដំណើរការទំនាក់ទំនងពាណិជ្ជកម្ម វិនិយោគរវាងភាគីទាំងពីរទៅវិញទៅមក។ ប៉ុន្តែមិនមែននិយាយតែភាពវិជ្ជមាននោះទេ ពោលគឺសមាគមក៏នឹងផ្សព្វផ្សាយពីចំណុចអវិជ្ជមាន នៃភាពអនាធិបតេយ្យ អសន្តិសុខ ដែលបង្កឡើងដោយជនជាតិចិនផងដែរ។

សូមលោក-អ្នកនាងស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ និងលោក សយ សុភាព អគ្គនាយកមជ្ឈមណ្ឌលព័ត៌មានដើមអម្ពិល ដូចតទៅ៖

«ក្នុងក្តីបំណងរបស់យើងជាអ្នកសារព័ត៌មានហើយ យើងត្រូវតែរួមសាមគ្គីគ្នា។ ហើយវាមិនត្រឹមតែផ្ដោតទៅលើការបណ្ដុះបណ្ដាលអ្នកសារព័ត៌មានវិជ្ជាជីវៈប្រទេសទាំងពីរទេ ក៏ប៉ុន្តែយើងនឹងខិតខំសរសេរព័ត៌មាននូវអ្វីដែលវាបម្រើផលប្រយោជន៍រវាងប្រជាជនប្រទេសទាំងពីរ ឲ្យបានយល់គ្នាកាន់តែច្រើន ក៏ដូចជាឆ្លុះបង្ហាញឲ្យសហគមខាងក្រៅមើលឃើញអំពីចំណុចដែលថា វិជ្ជមានល្អច្រើនចំពោះប្រទេសទាំងពីរ ។ ជាពិសេសប្រទេសកម្ពុជាដែលនៅពេលនេះ ទទួលបានការវិនិយោគច្រើនពីប្រទេសចិនជាមិត្ត។ ជារួមបម្រើផលប្រយោជន៍ដល់ប្រទេសទាំងពីរ»។ នេះជាការអះអាងរបស់លោក សយ សុភាព។

ក្រៅពីមានបំណងជួយជំរុញការផ្សព្វផ្សាយព័ត៌មានពីទំនាក់ទំនងកម្ពុជា-ចិន ឲ្យបានទូលំទូលាយហើយ លោក សយ សុភាព ក៏ចង់បង្កើតសមាគមសម្រាប់ទុកឲ្យយុវជនជំនាន់ក្រោយ ចូលរួមបំពេញការងារក្នុងវិស័យសារព័ត៌មានឲ្យបានល្អត្រឹមត្រូវ ប្រកបដោយវិជ្ជាជីវៈ តាមរយៈការផ្សព្វផ្សាយបម្រើផលប្រយោជន៍ជាតិផងដែរ។

បើតាមអគ្គនាយកមជ្ឈមណ្ឌលព័ត៌មានដើមអម្ពិលរូបនេះ សមាគមអ្នកសារព័ត៌មានកម្ពុជា-ចិន ដែលបង្កើតឡើងនេះ គឺគ្មានមូលនិធិ ឬជំនួយឧបត្ថម្ភពីភាគីខាងណាទេ ពោលគឺបង្កើតឡើងដោយអ្នកសារព័ត៌មានជើងចាស់នៅកម្ពុជា ប្រមាណជា៦នាក់ និងការសហប្រតិបត្តិការជាមួយភាគីចិនប៉ុណ្ណោះ៕