កីឡាអន្តរជាតិ
អន្តរជាតិ
ករណីបាត់ខ្លួន Sala៖ ប្រតិបត្តិការចុះទៅបាតសមុទ្រ ក្រោយរកឃើញកៅអី និងពូកយន្តហោះ
× ក្រុមអ្នកស្វែងរកយន្តហោះដែលដឹកកីឡាករ Emiliano Sala ហើយបាត់ការទាក់ទងនោះ បាននិយាយនៅថ្ងៃទី៣០ ខែមករានេះថា ការរុករកក្រោមទឹកនឹងចាប់ផ្តើមចុងសប្តាហ៍នេះ បន្ទាប់ពីពួកគេបានរកឃើញកៅអី និងពូកនៅលើឆ្នេរសមុទ្របារាំងដែលទំនងជារបស់យន្តហោះនោះ។
Sala ដែល Cardiff City ទិញពីក្រុម Nantes ក្នុងតម្លៃឯតទគ្គកម្មក្លិប ១៥លានផោន (១៩លានដុល្លារអាមេរិក) បានធ្វើដំណើរជាមួយអ្នកបើកយន្តហោះលោក David Ibbotson ពីប្រទេសបារាំងទៅក្រុង Cardiff ប្រទេសវែលិ៍ ដើម្បីចូលរួមជាមួយក្លិបថ្មីប៉ុន្តែជាអកុសល យន្តហោះដែលរូបគេជិះបានបាត់ការទាក់ទងកាលពីថ្ងៃទី២២ ខែមករា រហូតមកទល់ពេលនេះ។
បើតាមការផ្សាយរបស់ទីភ្នាក់ងារព័ត៌មាន Reuters ក្រុមអ្នកស៊ើបអង្កេតជើងអាកាសចក្រភពអង់គ្លេស (AAIB) និយាយថាពួកគេបានរកឃើញបំណែកកៅអីពូកយន្តហោះនៅលើឆ្នេរក្បែរតំបន់ Surtainville ក្នុងឧបទ្វីប Cotentin ភាគខាងជើងប្រទេសបារាំង។ ហើយពូកទ្រនាប់កៅអីមួយទៀតក៏រកឃើញនៅក្នុងតំបន់នោះដែរ។
AAIB សន្និដ្ឋានថា ពូកនិងកៅអីនោះទំនងជារបស់យន្តហោះដែលបានបាត់ជាមួយនឹងកីឡាករសញ្ជាតិអាហ្សង់ទីន វ័យ២៨ឆ្នាំ រួមទាំងពីឡុតសញ្ចាតិអង់គ្លេសវ័យ៥៩ឆ្នាំ នោះហើយ។
ក្រោយរកឃើញរបស់របរទាំងនេះ ក្រុមអ្នករុករកគ្រោងនឹងចាប់ផ្តើមចុះទៅក្រោមបាតសមុទ្រដើម្បីស្វែងរកបំណែកយន្តហោះនោះ។ ប៉ុន្តែយ៉ាងណាដោយសារលក្ខខណ្ឌអាកាសធាតុ ការស្វែងរកនឹងត្រូវចាប់ផ្តើមនៅចុងសប្តាហ៍នេះ និងចំណាយពេល៣ថ្ងៃ។
បើផ្អែកលើការវាយតម្លៃលម្អិតនៃផ្លូវហោះហើរ និងទីតាំងរ៉ាដាដែលបានកំណត់ចុងក្រោយបន្ទាប់ពីបាត់ការទាក់ទងជាមួយយន្តហោះធុនតូចម៉ាក Piper Malibu នោះ ភាគីខាង AAIB អាចកំណត់តំបន់ត្រូវរុករកដែលមានអាទិភាពជាងគេក្នុងរង្វង់ប្រមាណជាង៦គីឡូម៉ែត្របួនជ្រុង៕
Tag:
បាល់ទាត់
Emiliano Sala
Cardiff City
© រក្សាសិទ្ធិដោយ thmeythmey.com