អន្តរជាតិ
×![]()
ខ្យល់កខ្វក់នៅតែជាបញ្ហាសម្រាប់ប្រជាជនដែលកំពុងរស់នៅរាជធានីបាងកក និងខេត្តក្បែរៗខាង បើទោះបីជាអាជ្ញាធរថៃបានប្រឹងប្រែងយ៉ាងសកម្ម ដើម្បីដោះស្រាយបញ្ហានេះ។ ទាក់ទិននឹងរឿងនេះ នាយករដ្ឋមន្ត្រីថៃ បានស្នើឲ្យមានការចូលរួមចំណែកពីប្រជាជនគ្រប់គ្នា និងព្រមានអនុវត្តវិធានការក្តៅ ប្រសិនបើបញ្ហាខ្យល់កខ្វក់នៅក្រុងបាងកក ពុំត្រូវបានដោះស្រាយឲ្យមានប្រសិទ្ធភាពទេនោះ។
ថ្លែងនៅក្នុងសុន្ទរកថាបើកកម្មវិធីតាំងពិព៌ណ៍មួយកាលពីថ្ងៃពុធទី ៣០ ខែមករា លោកនាយករដ្ឋមន្ត្រីថៃ ប្រាយុទ្ធ ចន្ទអូចា បានព្រមានថា ប្រសិនបើបញ្ហាខ្យល់បំពុលនៅក្រុងបាងកកមិនមានភាពធូរស្បើយ ទេនោះ រដ្ឋាភិបាលនឹងដាក់ចេញវិធានការក្តៅមួយចំនួន ដូចជា ដាក់បម្រាមមិនឲ្យប្រជាជនបើកបរយានជំនិះតែឯកឯង, កំណត់ចំនួនប្រើប្រាស់យានយន្ត និងហាមមិនឲ្យប្រើប្រាស់រថយន្តដែលចាក់ប្រេងម៉ាស៊ូតជាដើម។
យោងតាមការចុះផ្សាយរបស់កាសែត The Nation លោក ប្រាយុទ្ធ បានលើកឡើងទៀតថា៖«ប្រជាជនមួយចំនួនបានលើកយកបញ្ហាខ្យល់បំពុលនេះមករិះគន់រដ្ឋាភិបាល ប៉ុន្តែរដ្ឋាភិបាលបានអះអាងថា យើងបានអនុវត្តវិធានការចាំបាច់ជាច្រើន ដើម្បីទប់ស្កាត់បញ្ហានេះ រួមមាន ការបាញ់ទឹកដើម្បីបន្ធូរបន្ថយកម្រិតខ្យល់កខ្វក់ និងការចែកម៉ាស់ការពារជាដើម។ យ៉ាងណាមិញ ប្រជាជនក៏មានកាតព្វកិច្ចរបស់ពួកគេផងដែរ ដើម្បីរួមចំណែកដោះស្រាយជាមួយរដ្ឋាភិបាល»។
សិស្សានុសិស្សនៃសាលារៀនមួយក្នុងទីក្រុង បាងកក កំពុងរង់ចាំឪពុកម្តាយរបស់ពួកគេមកទទួលយកទៅផ្ទះវិញ កាលពីរសៀលថ្ងៃទី ៣០ ខែមករា បន្ទាប់ពីអាជ្ញាធរក្រុង បញ្ជាឲ្យបិទសាលាជាបណ្តោះអាសន្ន (The Nation)
ទន្ទឹមនឹងគ្នានេះដែរ លោក ប្រាយុទ្ធ បានព្រមានខ្លាំងៗចំពោះមន្ត្រីថា អាជ្ញាធរថ្នាក់តំបន់ និងភ្នាក់ងារពាក់ព័ន្ធអាចប្រឈមមុខនឹងការដាក់ពិន័យ ប្រសិនបើពួកគេបរាជ័យក្នុងការគ្រប់គ្រងបញ្ហាខ្យល់បំពុល និងធ្វើឲ្យស្ថានការណ៍មានភាពធូរស្រាលបានទេនោះ។
ក្រៅពីព្រមានលេងធម៌ក្តៅចំពោះមន្ត្រីទាក់ទិននឹងអសមត្ថភាពដោះស្រាយបញ្ហាខ្យល់កខ្វក់ មេដឹកនាំរូបនេះ ក៏បានស្នើឲ្យម្ចាស់រោងចក្រ និងសហគ្រាសនានា កាត់បន្ថយប្រតិបត្តិការរបស់ពួកគេ អំឡុងពេលនេះ និងចង់ឲ្យពួកគេពិនិត្យឲ្យច្បាស់ថា រោងចក្រទាំងនោះត្រូវនឹងស្តង់ដារការពារបរិស្ថានរបស់រដ្ឋាភិបាល។ ត្រង់ចំណុចនេះ លោកថែមទាំងបានដាក់បញ្ជាឲ្យមានការបញ្ជូនកងយោធា ទៅត្រួតពិនិត្យដល់ទីតាំងរោងចក្រទាំងនោះដោយផ្ទាល់តែម្តង។
គួរបញ្ជាក់ផងដែរថា ដោយសារតែគុណភាពខ្យល់ក្នុងទីក្រុងបាងកក និងខេត្តនៅក្បែរខាងនោះនៅតែបន្តធ្លាក់ចុះជាលំដាប់ គិតត្រឹមថ្ងៃពុធសប្តាហ៍នេះ អាជ្ញាធរថៃបានចាប់ផ្តើមដាក់ចេញវិធានការយ៉ាងតឹងរ៉ឹងជាបណ្តើរៗ។ តួយ៉ាង អាជ្ញាធរថៃបានប្រកាសរាជធានីបាងកកទៅជា «តំបន់គ្រប់គ្រងការបំពុល» និងបានស្នើសុំឲ្យសាលា និងសកលវិទ្យាល័យនៅក្នុងទីក្រុងបាងកក បិទទ្វារជាបណ្តោះអាសន្នត្រឹមរយៈពេលពីរថ្ងៃសិន៕
Tag:
ថៃ
ប្រាយុទ្ធចាន់អូចា
ខ្យល់កខ្វក់
© រក្សាសិទ្ធិដោយ thmeythmey.com
