នាយ ក្ដិប ត្រូវវះកាត់ជំងឺ២មុខទៀត ដោយត្រូវការចំណាយប្រាក់ ១៦,០០០ដុល្លារ

ជាតិ

នាយ ក្ដិប ត្រូវវះកាត់ជំងឺ២មុខទៀត ដោយត្រូវការចំណាយប្រាក់ ១៦,០០០ដុល្លារ

31, Jan 2019 , 2:50 pm

រូបភាព

រូបពីហ្វេសប៊ុក Chanlakhena Chorn

ដោយ: ប៉ូ សាគុន

ភ្នំពេញ៖ ជំងឺកៀបសរសៃឈាមបេះដូង និងកកសរសៃឈាមខួរក្បាល ជាជំងឺដែលលោក ឃុន ក្ដិប ចាំបាច់ត្រូវវះកាត់ ដោយចំណាយប្រាក់ប្រមាណ ១៦,០០០ដុល្លារអាមេរិក។ នេះបើយោងតាមវីដេអូ ដែលបង្ហោះនៅក្នុងទំព័រហ្វេសប៊ុករបស់អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ។

ដោយសារតែមិនមានប្រាក់ព្យាបានជំងឺ កៀបសរសៃឈាមបេះដូង និងកកសរសៃឈាមខួរក្បាល លោក ឃុន ក្ដិប បានអំពាវនាវតាមរយៈវីដេអូខ្លីមួយ ដល់សប្បុរសជន មេត្តាជួយជាថវិកាដើម្បីលោកបានព្យាបាលបន្ត។ តារាកំប្លែងរូបនេះ បានលើកដៃសំពះ ក្នុងសភាពរាងកាយស្គមស្គាំង ទាំងសំឡេងខ្សោយមិនសូវច្បាស់ថា ប្រាក់ ១៦,០០០ ដុល្លារអាមេរិក លោកមិនមានលទ្ធភាពឡើយ។

តារាកំប្លែងនាយ ក្ដិប អំពាវនាវទាំងទឹកមុខស្រងូត ៖« អំពាវនាវដល់សប្បុរសជនជួយខ្ញុំផង ព្រោះពេទ្យប្រាប់ថា ខ្ញុំត្រូវត្រៀមប្រាក់ ១៦,០០០ដុល្លារ ដើម្បីវះបេះដូង ហើយនឹងឈាមកកក្នុងខួរក្បាល។ ខ្ញុំមានលទ្ធភាពឯណាលោកអើយ? លក់ផ្ទះមើលខ្លួន ខ្លួនជាបានអ្វីរស់នៅ? អំពាវនាវដល់អ្នកមានគុណ សូមជួយខ្ញុំម្ដងទៀតផង»។

កន្លងមក លោក ឃុន ក្ដិប ហៅនាយក្ដិប បានទៅព្យាបាលជំងឺទឹកដក់ក្នុងសួត នៅខេត្តឧប៊ុន ប្រទេសថៃ ចំណាយប្រាក់អស់ប្រមាណ ៦,០០០ដុល្លារអាមេរិកផងដែរ។

សូមបញ្ជាក់ថា លោក ឃុន ក្តិប ហៅនាយ ក្ដិប វ័យ៥៨ឆ្នាំ បានធ្លាក់ខ្លួនឈឺធ្ងន់នៅដើមឆ្នាំ២០១៩។ បច្ចុប្បន្ននាយ ក្ដិប មានជំងឺកៀបសរសៃឈាមបេះដូង កកសរសៃឈាមខួរក្បាលធ្ងន់ធ្ងរ និងស្លាប់មួយចំហៀងខ្លួន៕