របាយការណ៍ FIFA៖ ទីផ្សារដោះដូរកីឡាករឆ្នាំ២០១៨ ចំណាយលើស ៧ ពាន់លានដុល្លារ

កីឡាអន្តរជាតិ

អន្តរជាតិ

របាយការណ៍ FIFA៖ ទីផ្សារដោះដូរកីឡាករឆ្នាំ២០១៨ ចំណាយលើស ៧ ពាន់លានដុល្លារ

31, Jan 2019 , 9:19 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អន្តរជាតិ (FIFA) បានចេញរបាយការណ៍ពីការចំណាយសរុបលើការទិញដូរកីឡាករសម្រាប់ឆ្នាំ២០១៨ ដែលមានទឹកប្រាក់រហូតដល់ ៧,០៣ពាន់លានដុល្លារអាមេរិក ។ ទំហំទឹកប្រាកដោះដូរកីឡាករនេះ លើសការចំណាយកាលពីឆ្នាំ២០១៧ ចំនួន១០,៣ភាគរយ និងជាកំណត់ត្រាខ្ពស់បំផុត ដែលមិនធ្លាប់មាន។ នេះបើតាមការចេញផ្សាយរបស់គេហទំព័រផ្លូវការ FIFA ។

FIFA បានរៀបរាប់លម្អិតអំពីតួលេខ និងស្ថិតិនៃប្រាក់ទាំងអស់ ដែលបានចំណាយលើការផ្ទេរកីឡាករក្នុងក្លិបបាល់ទាត់អាជីពនៅជុំវិញពិភពលោកក្នុងឆ្នាំ ២០១៨ ដូចខាងក្រោម៖

ការចំណាយជាកំណត់ត្រាក្នុងរង្វង់ទឹកប្រាក់ ៧,០៣ពាន់លានដុល្លារអាមេរិកនេះ គឺលើស ១០,៣ ភាគរយ ខ្ពស់ជាងការចំណាយកាលពីឆ្នាំ ២០១៧។ ទឹកប្រាក់ដ៏សន្ធឹកសន្ធាប់នេះ គឺមានដំណើរការផ្ទេរលើកីឡាករសរុប ១៦,៥៣៣នាក់ មកពី១៧៥ ជាតិសាសន៍ផ្សេងគ្នា កើន ឡើង៥,៦ភាគរយ បើធៀបនឹងឆ្នាំ២០១៧ ដែលមាន ១៤,១៨៦នាក់។

យ៉ាងណាក៏ដោយ ក្នុងចំណោមទឹកប្រាក់លើការផ្ទេទាំងអស់ ៧៨,២ ភាគរយ ស្ថិតក្នុងការដោះដូរកីឡាកររវាងក្លិបក្នុងតំបន់អ៊ឺរ៉ុប (UEFA)។ ក្នុងនោះដែរ ការទិញដូរក្នុងក្របខណ្ឌលីគទាំងអស់នៅបារាំង ត្រូវបានគេគណនាឃើញថា មានតម្លៃសរុបច្រើនបំផុត ៤៦៧,២ លានដុល្លារអាមេរិក ខណៈដែលអង់គ្លេសមានការផ្ទេរក្នុងតម្លៃទាបបំផុត ១,០៥ ពាន់លានដុល្លារអាមេរិក។

ដោយឡែកក្លិបក្នុងតំបន់អាស៊ី ពោលគឺក្នុងប្រទេសអារ៉ាប៊ីសាអូឌីត ស្ថិតក្នុងចំណាត់ថ្នាក់ទី៧ ក្នុងចំណោមក្លិបទាំងអស់លើលោក ដែលចំណាយច្រើនបំផុតលើការផ្ទេរកីឡាករក្នុងចំនួនទឹកប្រាក់ ១៧៣,៩ លានដុល្លារអាមេរិក នៅឆ្នាំ២០១៨៕