ជាតិ
ស្ថានទូតអាមេរិកថា អាមេរិកមិនពាក់ព័ន្ធរដ្ឋប្រហាររបស់ លន់ នល់ ឡើយ
× នៅថ្ងៃទី៣០មករា ស្ថានទូតសហរដ្ឋអាមេរិកប្រចាំកម្ពុជាស្រាប់តែផ្សាយសេចក្តីថ្លែងការណ៍មួយដែលអបអរព្រឹត្តិការណ៍៧មករា និងថ្កោលទោសរបបខ្មែរក្រហម នៅលើទំព័រហ្វេសប៊ុកផ្លូវការរបស់ខ្លួន។ សេចក្តីថ្លែងការណ៍នេះបានបង្កឲ្យមានការឆ្លងឆ្លើយច្រើនដាក់គ្នាច្រើន ជុំវិញព្រឹត្តិការណ៍ប្រវត្តិសាស្ត្ររបស់កម្ពុជានៅក្នុងពាក់កណ្តាលទស្សវត្សរ៍១៩៧០នោះ ពិសេសរដ្ឋប្រហារដែលដឹកនាំដោយលោកសេនាប្រមុខ លន់ នល់។
វាជាការឆ្លើយតបដ៏កម្រមួយ ដែលគេអាចបានឃើញពីស្ថានទូតអាមេរិកប្រចាំកម្ពុជា ទាក់ទងនឹងការចោទប្រកាន់ជាយូរឆ្នាំដែលថា អាមេរិកគឺជាអ្នកគាំទ្រពីក្រោយរដ្ឋប្រហាររបស់លោកសេនាប្រមុខ លន់ នល់ ទម្លាក់សម្តេចព្រះប្រមុខរដ្ឋ នរោត្តម សីហនុ ព្រះបរមរតនកោដ្ឋ។
ស្ថានទូតសហរដ្ឋអាមេរិកបានសរសេរឆ្លើយតបទៅនឹងម្ចាស់គណនីហ្វេសប៊ុកមួយដែលសរសេរថា «ប្រសិនបើអាមេរិកមិនជួយ លន់ នល់ ទម្លាក់សម្តេចតាទេ ក៏គ្មានខ្មែរក្រហមដែរ»។ ទំព័រហ្វេសប៊ុកស្ថានទូតអាមេរិកបានឆ្លើយតបយ៉ាងដូច្នេះ៖« តែយើងសូមធ្វើការកត់សំគាល់ថា សហរដ្ឋអាមេរិកមិនបានពាក់ព័ន្ធ នៅក្នុងរដ្ឋប្រហារដែលនាំអោយលោក លន់ នល់ ឡើងកាន់អំណាចនោះទេ។ រហូតមកដល់ពេលនេះ គ្មានភស្តុតាងណាមួយដែលបញ្ជាក់ពីការពាក់ព័ន្ធរបស់សហរដ្ឋអាមេរិកទេ»។ នៅក្នុងសារឆ្លើយតបដដែល ស្ថានទូតអាមេរិកបានលើកឡើងចំៗតែម្តងថាប្រទេសចិនបានគាំទ្ររបបខ្មែរក្រហម។ ស្ថានទូតអាមេរិកបានសរសេរបន្តយ៉ាងដូច្នេះ៖«ផ្ទុយទៅវិញ មានភស្តុតាងយ៉ាងច្រើនដែលបង្ហាញថា រដ្ឋាភិបាលចិនបានគាំទ្រយ៉ាងសកម្មដល់របបខ្មែរក្រហម ពីឆ្នាំ ១៩៧៥ ដល់ឆ្នាំ ១៩៧៩ និងក្នុងរយៈកាលក្រោយពីនោះមក»។
ការអធិប្បាយឆ្លើយឆ្លងនេះ បានកើតឡើងនៅក្រោមការបង្ហោះសេចក្តីថ្លែងការណ៍មួយរបស់ស្ថានទូតអាមេរិកស្តីពីថ្ងៃ៧មករា និងរបបខ្មែរក្រហម ដោយមានភ្ជាប់ជាមួយរូបថតនៃទីក្រុងភ្នំពេញដ៏បាក់បែកក្នុងឆ្នាំ១៩៧៩ រូបថតប៉ុល ពត និងមន្ត្រីជាន់ខ្ពស់ចិន និងរូបថតខៀវ សំផន នៅក្នុងសវនាការផង។
តាមរយៈសេចក្តីថ្លែងការណ៍ សហរដ្ឋអាមេរិកបានឧទ្ទិសដល់វិញ្ញាណក្ខន្ធពលរដ្ឋខ្មែរដែលបានស្លាប់នៅក្នុងសម័យខ្មែរក្រហមផង បានរំឭកពីសាលក្រមកាត់ទោសអតីតមេដឹកនាំកំពូលរបបខ្មែរ ដែលអាមេរិកបានបន្ទោសថាបានជឿយ៉ាងងប់ងល់ទៅលើប្រទេសចិន។
ឃ្លាចុងក្រោយនៃសេចក្តីថ្លែងការណ៍ ស្ថានទូតសហរដ្ឋអាមេរិកបានផ្តោតចំរដ្ឋាភិបាលតែម្តង ដោយបានសរសេរយ៉ាងដូច្នេះ៖«យើងសូមអំពាវនាវឲ្យកម្ពុជាប្រកាន់ខ្ជាប់នូវនយោបាយការបរទេសឯករាជ្យ អធិបតេយ្យ និងប្រកបដោយតុល្យភាព ដែលរក្សាបាននូវអនាគតរបស់ប្រទេសសម្រាប់ប្រជាជនកម្ពុជាទាំងអស់»។
សេចក្តីថ្លែងការណ៍នេះក៏ទំនងជានឹងមិនធ្វើឲ្យរដ្ឋាភិបាលកម្ពុជានៅស្ងៀមឡើយ៕
© រក្សាសិទ្ធិដោយ thmeythmey.com