ជាតិ
រដ្ឋមន្រ្តីទេសចរណ៍កម្ពុជា ជួបរដ្ឋមន្រ្តីទេសចរណ៍ចិន។ រូបបីក្រសួងទេសចរណ៍
×![]()
ភ្នំពេញ៖ លោក ឡ ស៊ូកាង រដ្ឋមន្ត្រីក្រសួងទេសចរណ៍ និងវប្បធម៌នៃប្រទេសចិន និយាយ ថា មានភ្ញៀវទេសចរចិន មកលេងកម្ពុជាកាន់តែច្រើន ហើយទេសចរចិនទាំងនោះ បានសំណូមពរមួយចំនួន មកកម្ពុជា ក្នុងការរក្សាសុវត្ថិភាពទេសចរណ៍។ រដ្ឋមន្ត្រីទេសចរណ៍ចិនរូបនេះ បានអះអាងថា សុវត្ថិភាពទេសចរណ៍ គឺជាផ្នែកសំខាន់ជាងគេ ដោយសារការធានាបាននូវសុវត្ថិភាពទេសចរណ៍នេះហើយ បានអាចផ្តល់ការធានានិងការទុកចិត្តដល់ភ្ញៀវទេសចរ មកកម្សាន្តនៅកម្ពុជា។ 
លោក ឡ ស៊ូកាង បានបញ្ជាក់ចំពោះមុខ លោក ថោង ខុន រដ្ឋមន្ត្រីក្រសួងទេសចរណ៍កម្ពុជា ក្នុងជំនួបទ្វេភាគី កាលពីថ្ងៃទី២៩ ខែមករា ឆ្នាំ២០១៩ ថា សុវត្ថិភាពទេសចរណ៍ គឺទីមួយ សំដៅដល់ជីវិត និងទ្រព្យសម្បត្តិ។ លោក ធ្លាប់លើកបញ្ហានេះ កាលពីនៅឆ្នាំមុន ក្នុងប្រទេសថៃ ដែលបានធ្វើឲ្យទេសចរចិនជាង៤០នាក់ ត្រូវបាត់ប់ជីវិត ដោយសារការក្រឡាប់ទូក។ បញ្ហានេះ បានប៉ះពាល់ច្រើនណាស់ទៅដល់វិស័យទេសចរណ៍ថៃ។ មកដល់ពេលបច្ចុប្បន្ន ចំនួនភ្ញៀវទេសចរចិន ដែលបានទៅលេងប្រទេសថៃ បានថយចុះ៦០ភាគរយ។ ការធានាសុវត្ថិភាពភ្ញៀវទេសចរ គឺជាភារកិច្ចរដ្ឋាភិបាល ដែលប្រទេសចិន យកចិត្តទុកដាក់ជាងគេ។
បញ្ហាទីពីរ គឺធានាសណ្តាប់ធ្នាប់ ក្នុងការគ្រប់គ្រងសង្គមផងដែរ ដូចជា ចោរប្លន់ និងការលួចអីវ៉ាន់ផ្សេងៗ។ រដ្ឋមន្ត្រីទេសចរចិនរូបនេះ បាននិយាយយ៉ាងដូច្នេះ«ខ្ញុំសង្ឃឹមថា មានការប្រឹងប្រែពីភាគីទាំងពីរ ធ្វើយ៉ាងណាឲ្យសណ្តាប់ធ្នាប់ក្នុងសង្គមយើង ទទួលបានល្អ»។
លោក ឡ ស៊ូកាង បានបន្តលើកពីសំណូមពររបស់ភ្ញៀវទេសចរចិន ថាឲ្យរដ្ឋាភិបាលកម្ពុជា គួរដាក់ស្លាកសញ្ញា ជាពិសេសស្លាកសញ្ញាជាភាសាចិន នៅកន្លែងអាកាសយានដ្ឋាន សណ្ឋាគារ ស្ថានីយ៍រថយន្ត និងតំបន់រមណីយដ្ឋានជាដើម។
មួយវិញទៀត ក៏សុំឲ្យលើកស្ទួយមគ្គុទេសក៍ ដែលនិយាយភាសាចិន សុំឲ្យមានប៉ុស្តិ៍ទូរស្សន៍ជាភាសាចិន ក្នុងសណ្ឋាគារ និងសុំឲ្យមានការទូទាត់កាតធនាគារ ឲ្យមានភាពងាយស្រួលក្នុងប្រព័ន្ធផងដែរ។
អ្វីដែលបានលើកឡើងខាងនេះ គឺជាសំណូមពរដែលភ្ញៀវទេសចរចិន បានមកលេងកម្ពុជា។ នេះបើតាមការបញ្ជាក់ចុងក្រោយរបស់លោក ឡ ស៊ូកាង៕
Tag:
ទេសចរណ៍
ចិន
© រក្សាសិទ្ធិដោយ thmeythmey.com
