ភូមិវប្បធម៌ខ្មែរ អាចនឹងបង្កើននៅជប៉ុន សម្រាប់ខ្មែរជួបជុំគ្នាពេលបុណ្យទាន

ជាតិ

សង្គមជាតិ

ភូមិវប្បធម៌ខ្មែរ អាចនឹងបង្កើននៅជប៉ុន សម្រាប់ខ្មែរជួបជុំគ្នាពេលបុណ្យទាន

01, Feb 2019 , 10:19 pm

រូបភាព

ជំនួបរវាងលោក អ៊ិត សំហេង និង លោក Fumio Yamada នៅទីស្តីការក្រសួងការងារ

ដោយ: ថ្មីៗ

អង្គការសមាគមសហប្រតិបត្តិការកម្ពុជា-ជប៉ុន បានស្នើសុំរដ្ឋាភិបាលកម្ពុជា បង្កើតភូមិវប្បធម៌ខ្មែរមួយ នៅប្រទេសជប៉ុន។ លោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុន បានលើកសំណើនេះ នៅចំពោះមុខលោក អុិត សំហេង រដ្ឋមន្ត្រីក្រសួងកាងារ ក្នុងជំនួប នៅថ្ងៃ១ ខែកុម្ភៈ ឆ្នាំ២០១៩នេះ។

បើតាមការចុះផ្សាយរបស់គេហទំព័ររបស់ក្រសួងការងារ ភូមិវប្បធ៌មនេះ ជាកន្លែងជួបប្រជុំគ្នារវាងប្រជាជនខ្មែរនៅជប៉ុន ក្នុងការធ្វើពិធីបុណ្យផ្សេងៗតាមប្រពៃណី ហើយម្យ៉ាងវិញទៀត ពលរដ្ឋខ្មែរ អាចទៅជួបប្រជុំនៅទីនោះ ដើម្បីបង្ហាញពីវប្បធម៌របស់ខ្មែរ។ យ៉ាងណាក៏ដោយ លោក Fumio Yamada ពុំបានប្រាប់លោក អុិត សំហេង លម្អិតនោះទេ ថាភូមិវប្បធម៌នេះ នឹងត្រូវបង្កើតឡើងនៅពេលណា។

លោក អុិត សំហេង បានឯកភាពចំពោះសំណើសុំបង្កើតភូមិវប្បធម៌នេះ ដោយលោក យល់ថា ដើម្បីបង្កលក្ខណៈងាយស្រួលដល់ការជួបជុំសាច់ញាតិរបស់ពលករ និងប្រជាជនខ្មែរទូទៅ នៅប្រទេសជប៉ុន។ គេហទំព័ររបស់ក្រសួងការងារ បានសរសេរពីសម្តីរបស់លោករដ្ឋមន្ត្រី ក្នុងជំនួបនោះ ថា ពលករខ្មែរប្រមាណ៩ពានក់ ដែលកំពុងធ្វើការនៅជប៉ុន ហើយលោកសង្ឃឹមថា នៅឆ្នាំក្រោយ នឹងមានការកើនចំនួនទ្វេរ។

បច្ចុប្បន្ន ក្រសួងការងារ កំពុងសហការជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឲ្យមានកិច្ចព្រមព្រៀងសហប្រតិបត្តិការជាមួយគ្នា ក្នុងគោលបំណងបង្កើនទីផ្សារការងារ និងឱកាសការងារដល់ប្រជាជនកម្ពុជា។ នេះបើតាមការចុះផ្សាយរបស់ក្រសួងការងារដដែល៕